Hiɛkpamɔ Wiemɔi ni Akɛkanyaa Miishɛɛ
1 Yesu he esa waa yɛ hiɛkpamɔ wiemɔi ni akɛtsuɔ nii lɛ mli. Yesu gbalaa etoibolɔi ajwɛŋmɔ kɛ ekɛ mɛi pii loo mɔ kome miiwie, ni efeɔ enɛ kɛtsɔɔ bɔ ni ehaa sane lɛ kɔɔ amɛhe lɛ nɔ. Etsɔɔ etoibolɔi lɛ sɛɛnamɔ ni yɔɔ esane lɛ he.—Mat. 5:3-12; Yoh. 4:7-30.
2 Hesaamɔ ni Atsɔɔ Hiɛ Afeɔ He Miihia: Bɔni afee ni wɔkanya loo wɔtee miishɛɛ shi yɛ wɔwiemɔ lɛ he lɛ, esa akɛ wɔha wɔhiɛkpamɔ wiemɔi lɛ akɔ mɔ lɛ he, ni ekɔ nibii ni esusuɔ he lɛ ahe, ni wɔtsɔɔ akɛ Maŋtsɛyeli sane lɛ baaye abua lɛ diɛŋtsɛ.
3 Kɛ oosaa ohe kɛmiiha shiɛmɔ lɛ, susumɔ saji ni haoɔ gbɔmɛi ni yɔɔ akutso lɛ mli lɛ ahe. Ani sane ko ni ba nyɛsɛɛ nɛɛ egbala mɔ fɛɛ mɔ jwɛŋmɔ? Mɛni obalaŋtai lɛ baanya he? Ni onukpai hu? Ni wumɛi kɛ ŋamɛi kɛ fɔlɔi hu? Ni okɛ hiɛkpamɔ wiemɔ kometoo lɛ nɔŋŋ aaatsu nii yɛ shia fɛɛ shia lɛ, sɛɛnamɔ yɛ he akɛ okɛ hiɛkpamɔ wiemɔi sɔrɔtoi aaasaa ohe ni osaa ohe akɛ oootsake mli yɛ bɔ ni onaa shiatsɛmɛi lɛ ahetoo-hamɔ lɛ ohaa. Shiɛlɔi komɛi eye omanye babaoo yɛ hiɛkpamɔ wiemɔi sɔrɔtoi ni amɛjɛɔ Reasoning wolo lɛ mli amɛkɛsaa amɛhe be fɛɛ be ni amɛkɛ amɛhe aaawo shia kɛ shia sɔɔmɔ lɛ mli lɛ hewɔ. (rs bf. 9-15) Enɛ haa amɛshishijee wiemɔi lɛ feɔ ehee kɛ nɔ ni ŋɔɔ daa
4 Obaasumɔ ni okɛ wiemɔ ko ni tamɔ nɛkɛ atsu ni yɛ September nyɔŋ lɛ nɔ:
◼ “Ojekoo! Wɔkɛ akutseiaŋbii nɛɛ ekomɛi miiwie sui ni amɛbaasumɔ ni amɛna yɛ mɔ ni yeɔ mɛi krokomɛi anɔ lɛ he lɛ he. Ani manyɛ mabio sui enyɔ loo ekome ni osusuɔ akɛ amɛhe he hiaa fe fɛɛ? [Ŋmɛɛ gbɛ ni eha hetoo. Heremɔ nɔ. Kpɛlɛmɔ nɔ kɛ esa. Kaatsi “maŋkwramɔŋ saji” loo maŋkwramɔŋ wiemɔi komɛi ni baafutu shiatsɛ lɛ jwɛŋmɔ yɛ yiŋtoo ni yɔɔ owiemɔ lɛ sɛɛ lɛ he lɛ atã.] Ani ole akɛ Biblia lɛ tsɔɔ hesaa ni Mɔ ni akpɛlɛ enɔ akɛ efee adesai anɔyelɔ lɛ hiɛ lɛ mli? Eyɛ biɛ, yɛ Yesaia 9:5, 6. [Kanemɔ.] Te osusuɔ akɛ nɔyelɔ ni tamɔ nɛkɛ shishi ni ooohi lɛ baatamɔ aha tɛŋŋ?” Ŋmɛɛ gbɛ ni eha hetoo ni ogbala ejwɛŋmɔ kɛya Lala 146:3, 4 kɛ sane ni yɔɔ Reasoning wolo lɛ baafai 153-4 ni kɔɔ bɔ ni Yesu nɔyeli lɛ hi ni ama nɔ mi lɛ nɔ. Aloo abaanyɛ akɛ Obaanyɛ Ohi Shi Kɛya Naanɔ wolo lɛ baafai 112 kɛ 113 atsu nii.
5 Kɛ okɛ aŋkroaŋkroi ni susuɔ amɛwekui ahe miiwie lɛ, shiɛmɔ wiemɔ nɛɛ baahi jogbaŋŋ kɛ okɛ Obaanyɛ Ohi Shi Kɛya Naanɔ wolo lɛ miitsu nii.
Beni oŋa lɛ sɛɛ lɛ, obaanyɛ okɛɛ akɛ:
◼ “Ani oyoo akɛ daa gbi shihilɛ mli nɔnyɛɛi kɛ naagbai kɛ haomɔi pii bafɔɔ wekui anɔ ŋmɛnɛ? [Ŋmɛɛ gbɛ ni eha hetoo.] Ani oyiŋ feɔ bo kɔshikɔshi yɛ he ni wekui baanyɛ atsɔ amɛhe kɛya kɛha ŋaawoo kpakpa? [Ŋmɛɛ hetoohamɔ gbɛ.] Wɔmiigbala jwɛŋmɔ kɛmiiya nɔ ni Biblia lɛ yɔɔ kɛɛmɔ yɛ nɛkɛ sane nɛɛ he lɛ nɔ. Kadimɔ nɔ ni gbalashihilɛ Shishijelɔ lɛ kɛɛ klɛŋklɛŋ adesai enyɔ lɛ” Kanemɔ 1 Mose 1:28 ni ogbele Obaanyɛ Ohi Shi Kɛya Naanɔ wolo lɛ baafa 238 ni otsa osanegbaa lɛ nɔ, ni okɛ saji otii ni ohala kɛjɛ yitso 29 lɛ atsu nii.
6 Kɛ wɔkase gbɛ ni Yesu tsɔɔ nɔ egbalaa gbɔmɛi ajwɛŋmɔ lɛ ni wɔha sanegbaa lɛ kɔ toibolɔi lɛ ahe lɛ, belɛ wɔkɛ sɛɛnamɔ ni yɔɔ mumɔŋ nibii ahe lɛ miitsɔɔ mɛi ni yɔɔ tsuijurɔ lɛ.