Mɔdɛŋbɔɔ Ni Wɔkɛaakpee Shia Kɛ Shia Sɔɔmɔ Nitsumɔ Lɛ Naa
1 Shia kɛ shia ni ayaa, kɛ sɛɛsaramɔi ni afeɔ yɛ mɛikpɔji anɔ lɛ biɔ mɔdɛŋbɔɔ diɛŋtsɛ yɛ mɛi ni kɛ amɛhe woɔ jamɔ krɔŋŋ mli lɛ agbɛfaŋ. Shi suɔmɔ diɛŋtsɛ ni ayɔɔ kɛha Yehowa lɛ haa mɔ ko nyɛɔ edamɔɔ kaa nɛɛ naa, ni mɛi ni yɛ amɛfɔmɔ su naa lɛ amɛhiɛ gboɔ nii lɛ po etee amɛhiɛ kɛyashɛ he ni amɛbatsɔmɔ sanekpakpa lɛ he be-fɛɛ shiɛlɔi.
2 Eyɛ faŋŋ yɛ Biblia lɛ mli akɛ mra be mli Kristofoi lɛ kɛ amɛhe wo Nyɔŋmɔ Maŋtsɛyeli lɛ he sanekpakpa shiɛmɔ mli yɛ shia kɛ shia. (Bɔf. 5:42; 20:20, 21) Akɛ afii ohai 20 nɛɛ mli Kristofoi lɛ, wɔ hu wɔkɛ wɔhe woɔ nitsumɔ nɛɛ mli. Suɔmɔ ni wɔyɔɔ kɛha Nyɔŋmɔ kɛ wɔnaanyo gbɔmɔ kanyaa wɔ koni wɔtsu nitsumɔ nɛɛ, eyɛ mli akɛ wɔkɛ shikpilikpii-feemɔ. mliawoo, ahorabɔɔ, loo shiteekɛwoo diɛŋtsɛ baakpe.
3 Nɔ ni Mɔdɛŋbɔɔ Iɛ Tsuɔ: Be fɛɛ be ni wɔɔya mɔ ko ŋɔɔ lɛ, wɔbɔɔ mɔdɛŋ ni wɔdu anɔkwale dumɔwui fioo ko, ejaakɛ wɔle akɛ nɔ ni baajɛ mli aba yɛ naagbee lɛ baanyɛ afee Maŋtsɛyeli yibiiwoo. (Jaj. 11:6) Shihilɛ mli ni aŋkroaŋkroi yɔɔ lɛ tsakeɔ. Nɔ ko baanyɛ aba ni baaha shiatsɛ lɛ asusu nɔ ni wɔteŋ mɔ ko kɛɛ lɛ yɛ eshinaa naa be ko lɛ he, ni ebaaha ebo toi be kroko.
4 Wɔ shia kɛ shia sɔɔmɔ lɛ haa mɛi ni sumɔɔ anɔkwale kɛ jalɛnifeemɔ lɛ naa hegbɛ amɛkaseɔ Yehowa kɛ eyiŋtoi ahe nii, ni enɛ haa amɛjeɔ gbɛ ni kɛ mɔ yaa naanɔ wala mli lɛ nɔ nyiɛmɔ shishi. Ajɛɔ suɔmɔ mli abɔɔ mɛi ni diɔ je lɛŋ akɔnɔi asɛɛ lɛ kɔkɔ akɛ ehe miihia ni amɛtsake koni amɛna Yehowa nɔkpɛlɛmɔ mli ŋɔɔmɔ. Sɔɔmɔ nɛɛ hu haa aleɔ Yehowa gbɛi ni ewoɔ hiɛ nyam, kɛ shiatsɛ lɛ bo toi jio ebooo toi jio.—Ezek. 3:11.
5 Sɔɔmɔ nitsumɔ lɛ mli ni wɔkɛ wɔhe woɔ lɛ yeɔ ebuaa wɔ ni wɔnaa mumɔ lɛ yibii lɛ, tamɔ suɔmɔ ni pɛsɛmkunya bɛ mli, miishɛɛ, toiŋjɔlɛ, kɛ tsuishiŋmɛɛ (Gal. 5:22) Eyeɔ ebuaa wɔ ni wɔbaa wɔhe shi ni wɔnuɔ nii ahe wɔhaa mɛi, ejaakɛ ekɔɔ ejurɔ ni aaafee mɛi krokomɛi lɛ he. Wɔhe ni wɔkɛwoɔ Yehowa nitsumɔ mli vii lɛ buɔ wɔhe kɛjɛɔ je lɛ he.—1 Kor. 15:58.
6 Yelikɛbuamɔ Koni Adamɔ Kaa lɛ Naa: Ehe miihia ni mɛi heei lɛ akase bɔ ni akɛ he woɔ nitsumɔ ni miishɛɛ yɔɔ mli nɛɛ mli. Bei pii lɛ amɛbɛ hekɛnɔfɔɔ yɛ amɛ diɛŋtsɛ amɛmli, ni shia kɛ shia ni amɛaaya lɛ he susumɔ pɛ jeɔ amɛnijiaŋ wui. Wɔbaanyɛ wɔkɛ amɛ asusu wiemɔi ni akɛteɔ shi awoɔ wɔ kɛ nɔ ni wɔbaanyɛ wɔkɛɛ ni wɔkɛha hetoo Iɛ ahe. Wɔbaanyɛ wɔkase ŋaawoi kpakpai ni akɛha yɛ Reasoning wolo lɛ mli ni kɔɔ bɔ ni ahaa mɛi ni kuɔ wɔwiemɔ naa lɛ ahetoo lɛ eko. Mɛni hewɔ okɛ ohe haaa akɛ oooye obua amɛ koni amɛsaa amɛhe kɛha sɔɔmɔ nitsumɔ lɛ? Amɛnine baanyɛ ashɛ yelikɛbuamɔ babaoo nɔ kɛ amɛtee kpeei kɛha shiɛmɔyaa lɛ shishi daa ni amɛkɛ shiɛlɔi ni he esa babaoo lɛ tsu nii lɛ. Kuu ko ni amɛkɛ amɛ aaatsu nii lɛ baawo amɛ hewalɛ waa.
7 Yɛ be mli ni wɔyaa shia kɛ shia lɛ, wɔnaa hegbɛ wɔdamɔɔ wɔ-Nyɔŋmɔ, Yehowa najiaŋ. Mɛɛ woo yɔɔ ni da fe enɛ, akɛ mɔ ko aaafee Nyɔŋmɔ hefatalɔ nitsulɔ? (1 Kor. 3:9) Kɛ wɔkɛ wɔhe fɔ enɔ lɛ, emumɔ lɛ baaye abua wɔ ni wɔkpee shia kɛ shia sɔɔmɔ nitsumɔ lɛ he kaa lɛ naa.—2 Kor. 3:5.