Sɛɛkuu Koni Ayakanya Miishɛɛ Yɛ Biblia Lɛ He
1 Bei komɛi lɛ wɔkɛ mɛi kpeɔ yɛ shiɛmɔ mli ni amɛjieɔ miishɛɛ kpo yɛ sanekpakpa lɛ he, shi amɛnaaa deka amɛkɛ wɔ awie beni wɔtee amɛŋɔɔ lɛ. Ani wɔbɔɔ mɔdɛŋ ni wɔya amɛŋɔɔ be kroko ni wɔkɛ amɛ ayagba Maŋtsɛyeli lɛ he sane? Aloo ekolɛ wɔkɛ shiatsɛ ko na sanegbaa kɛ miishɛɛ, shi eheee wolo ko kwraa. Ani wɔkuɔ wɔsɛɛ wɔyaa koni wɔkɛ lɛ ayawie anɔkwale lɛ he babaoo kɛtsa nɔ?
2 Ehe miihia ni wɔtsu wɔ shikpɔŋkuku lɛ mli nii jogbaŋŋ ni wɔdi mɛi ni jieɔ miishɛɛ kpo lɛ fɛɛ asɛɛ. Ani wɔfeɔ sɛɛsaramɔi yɛ mɛi ni heɔ wolo loo woji tɛtrɛbii lɛ eko lɛ pɛ aŋɔɔ? Kɛ nakai lɛ, no lɛ wɔmiiku wɔhiɛ wɔmiishwie mɛi ni yɔɔ he miishɛɛ lɛ ekomɛi anɔ. Eka shi faŋŋ akɛ wɔsumɔŋ ni wɔkojo mɔ ko akɛ esaaa mɔ ni ayaa nɔ awoɔ lɛ hewalɛ yɛ mumɔŋ akɛni eheee wolo ko lɛ hewɔ. (Okɛto Romabii 14:4 he.) Ekolɛ yɛ wɔsaramɔ lɛ sɛɛ lɛ, shiatsɛ lɛ baasusu nɔ ni wɔkɛlɛ wie lɛ he, aloo ekolɛ ehiɛ baasɔ mɔdɛŋ ni wɔbɔ ni wɔbasara lɛ lɛ. Ni kɛji wɔku wɔsɛɛ wɔtee eŋɔɔ ekoŋŋ lɛ, ekolɛ ebaabo toi.
3 Kɛ otee mɔ ko ni klɛŋklɛŋ ni otee jɛmɛ lɛ ebɛ deka lɛ ŋɔɔ lɛ, obaanyɛ okɛɛ akɛ:
◼ “Eŋɔɔ minaa waa akɛ mibana bo ekoŋŋ. Nyɛsɛɛ ni miba biɛ lɛ, wɔnyɛɛɛ wɔgba sane ejaakɛ no mli lɛ obɛ be. Minaa akɛ odeka namɔ faaa kwraa, no hewɔ lɛ miwie kuku kɛkɛ. Misusuɔ akɛ osumɔɔ toiŋjɔlɛ kɛ shihilɛ kpakpa kɛha bo diɛŋtsɛ ohe kɛ osuɔlɔi hu. Ojogbaŋŋ ani ole akɛ Nyɔŋmɔ ewo shi akɛ ebaafo helai fɛɛ asɛɛ? Ani ebafeŋ miishɛɛ be diɛŋtsɛ? [Ŋmɛɛ gbɛ ni eha hetoo.] Kwɛmɔ oti ni yɔɔ wolo ni mihiɛ ni gbɛi ji Happiness How to Find It nɛɛ baafa 188 kuku 15 lɛ.” Kɛ be baaŋmɛ gbɛ lɛ, kanemɔ kuku lɛ koni no sɛɛ lɛ nyɛsusu ŋmalɛ ni feɔ jeŋ hee lɛ mli shihilɛi ahe mfoniri lɛ he. Kɛ shiatsɛ lɛ bo toi jogbaŋŋ lɛ, no lɛ obaanyɛ oje shia Biblia mli nikasemɔ shishi.
4 Kɛ oyasara mɔ ko ni he dɛhiɛmɔ wolo lɛ, obaanyɛ okɛɛ nɔ ko tamɔ nɛkɛ:
◼ “Nyɛsɛɛ ni wɔkpe lɛ, ohe nɛkɛ dɛhiɛmɔ wolo ni ji Na Weku Shihilɛ Mli Ŋɔɔmɔ nɛɛ eko. Ani okpɛlɛɔ nɔ akɛ abaanyɛ ana weku mli naagbai anaa kɛtsɔ Biblia tsɔɔmɔi kɛ nitsumɔ nɔ? [Ŋmɛɛ gbɛ ni eha hetoo.] Kadimɔ klɛŋklɛŋ kuku lɛ yɛ baafa 4.” Kanemɔ Biblia ŋmalɛi enyɔ lɛ, no sɛɛ lɛ bi akɛ: “Yɛ mɛɛ gbɛ nɔ shishitoo mla nɛɛ kɛ nitsumɔ baaye abua weku shihilɛ ni eya hiɛ?” Kɛ shiatsɛ lɛ ha hetoo lɛ, okɛ lɛ fɛɛ asusu ŋaawoo ni akɛha wumɛi kɛ ŋamɛi yɛ baafai 4 kɛ 5 lɛ he. Nyɛbaanyɛ nyɛya nɔ nyɛsusu dɛhiɛmɔ wolo lɛ mli saji ni eshwɛ lɛ ahe, no sɛɛ lɛ, obaanyɛ okɛ Making Your Family Life Happy wolo lɛ atsa nɔ aha lɛ.
5 Wɔyɛ yiŋtoo kpakpa hewɔ ni esa akɛ wɔna jwɛŋmɔ ni ja ni wɔkɛdi mɛi ni jieɔ miishɛɛ kpo yɛ wɔshiɛmɔ nitsumɔ lɛ mli lɛ asɛɛ, kɛ miishɛɛ bibioo po mɔ lɛ jie lɛ kpo. Ehe miihia waa ni wɔsusu mɛi krokomɛi ahe, ni ekanya wɔ ni wɔye wɔbua amɛ ni amɛkase anɔkwale lɛ. Yehowa gbɛjianɔtoo lɛ haa wɔ woji kɛ shiɛmɔ wiemɔi ni baanyɛ aye abua wɔ ni wɔkɛha mɛi krokomɛi ahɛle shi yɛ amɛmumɔŋ hiamɔ nii ahe.—Mat. 5:3.
6 Kɛ okɛ mɔ ko ni yɔɔ wiemɔ lɛ he miishɛɛ bibioo po na sanegbaa ni ena he miishɛɛ lɛ, kaaku ohiɛ ofɔ osɛɛ ni oooku ni oyakanya emiishɛɛ lɛ nɔ. Ekolɛ shia Biblia mli nikasemɔ shishijee baanyɛ ajɛ mli aba, ni okɛ mɔ lɛ baayi wala gbɛ lɛ nɔ. Wɔmiiwo mɔ fɛɛ mɔ hewalɛ ni ekɛ ekaa babaoo ana nɛkɛ yiwalaheremɔ nitsumɔ nɛɛ mli gbɛfaŋnɔ.—1 Tim. 4:16.