Ye Obua Gbɔmɛi ni Tamɔ Tooi Iɛ ni Amɛtswa Amɛma Shishitoo ni Wa Nɔ
1 Tsumaa biɔ gbɛjianɔtoo kpakpa kɛ hewalɛ babaoo. Be mli ni ato shia lɛ maa he gbɛjianɔ awo wolo nɔ sɛɛ lɛ, esa akɛ asaa he ni abaama tsu lɛ yɛ lɛ, ni aha lɛ shishitoo nii ni wa. Nakai nɔŋŋ hu wɔtoɔ shishi kɛtsɔɔ Nyɔŋmɔ anɔkwale lɛ mli shishijee nibii lɛ kɛ eyiŋtoo ni eyɔɔ kɛha adesai lɛ he nii ni wɔtsɔɔ mɛi lɛ nɔ.—Luka 6:48.
2 Shi dani aaanyɛ ato shishi lɛ, ehe miihia ni wɔsaa heni abaama tsu lɛ yɛ lɛ wɔto, taakɛ eji lɛ, ni wɔsusu shiatsɛ lɛ shihilɛ he. Mɛni ji sane ni asusu he nyɛsɛɛ lɛ? Mɛɛ ŋmalɛi akɛtsu nii? Te efee enii eha tɛŋŋ? Mɛɛ wolo akɛshi lɛ? Kɛ ooku osɛɛ oya eŋɔɔ lɛ, ha saji otii pɔtɛɛ komɛi ahi ojwɛŋmɔ mli ni otswa oma shishitoo nɔ lɛ nɔ fiofio.
3 Kɛ okɛ “Kingdom Come” wolo ha lɛ lɛ, no lɛ obaanyɛ okɛɛ akɛ:
◼ “Eŋɔɔ minaa waa akɛ mina bo yɛ shia. Obaakai akɛ nyɛsɛɛ ko beni wɔgba sane lɛ, wɔsusu gbalɛi ni kɔɔ nibii agbɛjianɔtoo fɔŋ nɛɛ naagbee gbii lɛ amlibaa he. Biblia lɛ feɔ lɛ faŋŋ akɛ Nyɔŋmɔ yɛ adesai ahe miishɛɛ ni akɛ yɛ naagbee mli kwraa kɛ e-Maŋtsɛyeli lɛ bɔi shikpɔŋ lɛ fɛɛ nɔyeli lɛ abaatsɔ no nɔ ajɔɔ jalɔi lɛ. [Kanemɔ Mateo 6:9, 10.] Maŋtsɛyeli nɛɛ nɔ abaatsɔ ni jalɛ kɛ jalɛsaneyeli aya nɔ.” Kanemɔ Yesaia 11:3-5, koni ogbala shiatsɛ lɛ jwɛŋmɔ kɛya “Kingdom Come” wolo lɛ yitso 1 lɛ mli klɛŋklɛŋ kukuji enyɔ lɛ anɔ. Feemɔ gbɛ ni abaatsɔ nɔ akase enɛ lɛ he nɔkwɛmɔ nɔ otsɔɔ lɛ.
4 Kɛji akɛ Toiŋjɔlɛ Jeŋ Hee dɛhiɛmɔ wolo lɛ eko ha beni atee eŋɔɔ klɛŋklɛŋ lɛ, no lɛ, abaanyɛ asaa asusu saji otii ni asusu he kɛtsɔ hiɛ ni kɔɔ bɔ ni ehe hiaa ni ana shihilɛ kpakpa lɛ kɛ agbɛnɛ shi ni Biblia lɛ ewo lɛ he ekoŋŋ. Maa nɔ mi oha lɛ akɛ, bɔni afee ni wɔhi jeŋ hee lɛ mli lɛ, esa akɛ wɔna anɔkwa nilee. Kanemɔ Yohane 2:17. Gbalamɔ mli otsɔɔ lɛ akɛ, beni wɔna nilee ni tamɔ nɛkɛ sɛɛ lɛ, esa akɛ wɔfee Nyɔŋmɔ suɔmɔnaa nii. Kanemɔ 1 Yohane 2:17. Gbalamɔ shiatsɛ lɛ jwɛŋmɔ kɛya saji otii pɔtɛɛ komɛi ni yɔɔ dɛhiɛmɔ wolo lɛ mli baafa 5 lɛ nɔ.
5 Kɛ klɛŋklɛŋ be ni akɛ “True Peace” wolo lɛ haa lɛ ama sane ni kɔɔ weku shihilɛ he lɛ nɔ mi lɛ, no lɛ obaanyɛ okɛɛ akɛ:
◼ “Nyɛsɛɛ ko beni miba oŋɔɔ lɛ, wɔsusu weku shihilɛ lɛ mli sane ko he ni wɔma nibii komɛi ni baaye abua ni ana shia ni toiŋjɔlɛ yɔɔ mli lɛ nɔ mi. Nɔ ni wɔkpɛlɛ nɔ ji akɛ, bɔni afee ni nine ashɛ weku shihilɛ ni miishɛɛ yɔɔ mli lɛ nɔ lɛ, esa akɛ anyiɛ gbɛtsɔɔmɔi ni yɔɔ Biblia mli lɛ sɛɛ. Mɛni osusuɔ akɛ ehe hiaa bɔni afee ni aye omanye yɛ gbalashihilɛ mli?” Ŋmɛɛ lɛ gbɛ ni ewie. Maa otii pɔtɛɛ komɛi ni atsɔɔ yɛ True Peace wolo lɛ baafai 142-7 kɛ 151 lɛ anɔ mi. Bi shiatsɛ lɛ nɔ ni eyɔɔ kɛɛmɔ yɛ ŋmalɛi ni yɔɔ mli lɛ he ni ohala otii komɛi ni nyɛsusu he, kɛ eeehi. Maa sɛɛnamɔ ni yɔɔ Biblia shishitoo mlai ni akɛaatsu nii lɛ he lɛ nɔ mi.
6 Kɛ Na Weku Shihilɛ Mli Ŋɔɔmɔ dɛhiɛmɔ wolo lɛ akɛshi lɛ, no lɛ nyɛsusua Biblia shishitoo mlai ni atsɔɔ yɛ baafai 4 kɛ 5 lɛ ahe. No sɛɛ lɛ, okɛ woji enyɔ lɛ aha. Jiemɔ sane yitsei 12, 13, kɛ 16 ni yɔɔ True Peace wolo lɛ mli lɛ fai komɛi akpo ni otsɔɔ bɔ ni abaanyɛ ni akɛ shiatsɛ lɛ kɛ eweku asusu enɛɛmɛi ahe yɛ shia Biblia mli nikasemɔ mli.
7 Esa akɛ wɔ fɛɛ wɔkɛ wɔhe awo sɛɛsaramɔ nitsumɔ lɛ mli daa. Nyiɛmɔ miishɛɛ ni ajie lɛ kpo lɛ sɛɛ oya nɔŋŋ kɛtsɔ sɛɛsaramɔ ni mɔɔ shi ni afeɔ yɛ September nyɔŋ nɛɛ mli lɛ nɔ.