Wolo Ni Kɛ Anɔkwa Gbɛtsɔɔmɔ Haa
1 Je lɛ etsake waa yɛ afii oha ni eho lɛ mli. Eyɛ mli akɛ hiɛyaa eba yɛ nibii tamɔ gbɛi ni atsɔɔ nɔ akɛ mɛi yeɔ sharamɔ, tsofafeemɔ, kɛ gbɛfaa mli moŋ, shi bɔ ni weku shihilɛ yɔɔ haa lɛ etee nɔ eba shi kwraa. Gbɔmɛi akpekpei abɔ baa adesai anilee ni yaa nɔ etsakeɔ be fɛɛ be lɛ kudɔɔ amɛ.
2 Yɛ nɛkɛ jeŋ ni tsakeɔ oyayaayai nɛɛ mli lɛ, Yehowa webii ena amɛhe ni amɛkɛkpɛtɛɔ ewiemɔ lɛ he lɛ he sɛɛ waa. Biblia lɛ ehi shi nakai nɔŋŋ afii akpei abɔ ni etsakeee, ni eŋaawoo lɛ ji nɔ ni anyɛɔ akɛtsuɔ nii fe fɛɛ ni akɛkpeeɔ naagbai ni wɔkɛkpeɔ ŋmɛnɛ lɛ anaa. Mɛɛ gbɛ nɔ wɔɔtsɔ wɔye wɔbua mɛi ni yɔɔ he miishɛɛ lɛ ni amɛle akɛ Biblia lɛ pɛ yɔɔ anɔkwa gbɛtsɔɔmɔ kɛha wɔ ŋmɛnɛŋmɛnɛ gbii nɛɛ?
3 Kɛ oshi “Nɔ Hewɔ ni Obaanyɛ Okɛ Ohe Afɔ Biblia lɛ Nɔ” dɛhiɛmɔ wolo lɛ eko beni otee jɛmɛ klɛŋklɛŋ lɛ, obaanyɛ oku osɛɛ ni okɛɛ akɛ:
◼ “Akɛni Biblia lɛ kɛɔ faŋŋ akɛ eji shɛɛ sane ni jɛ Nyɔŋmɔ diɛŋtsɛ ŋɔɔ, ni akɛ ehaa wɔ naanɔ wala namɔ hegbɛ kɛ wɔhe wɔye ni wɔhi shi yɛ nɔ ni ekɛɔ lɛ naa hewɔ lɛ, ani onuɔ he akɛ ehi akɛ wɔtao nɛkɛ wiemɔi nɛɛ amli babaoo lolo? [Ŋmɛɛ gbɛ ni ewie.] Kadimɔ nɔ ni Biblia lɛ egba efɔ shi yɛ amrɔ nɛɛ je lɛ nibii agbɛjianɔtoo nɛɛ he. [Kanemɔ 2 Timoteo 3:1-5 fɛɛ kɛjɛ baafa 5 yɛ dɛhiɛmɔ wolo lɛ mli.] Ani osusuɔ akɛ bɔ ni atsɔɔ nɛɛ kɔɔ je lɛ he ŋmɛnɛ? [Ŋmɛɛ gbɛ ni ewie.] Ani yiŋtoo kpakpa ko yɛ ni aaadamɔ nɔ akpa shihilɛi kpakpai agbɛ wɔsɛɛ?” Agbɛnɛ obaanyɛ oto gbɛjianɔ kɛha saramɔ kroko kɛtsɔ dɛhiɛmɔ wolo lɛ naagbee kukuji enyɔ lɛ mli saji ahesusumɔ nɔ, aloo The Bible—God’s Word or Man’s? wolo lɛ baafa 161 kɛ nitsumɔ ni oma hiɛnɔkamɔ ni yɔɔ nyam ni Biblia lɛ haa adesai lɛ nɔ mi.
4 Kɛ shiatsɛ lɛ yɛ bɔ ni akɛ Biblia lɛ tsuɔ nii ahaa lɛ he miishɛɛ, ni omamɔ otii titrii komɛi anɔ mi yɛ “The Bible—God’s Word of Man’s?” wolo lɛ Yitso 12 lɛ, no lɛ obaanyɛ okɛɛ akɛ: ◼ “Wɔnáa nibii ni baahi jogbaŋŋ kɛha wɔ ŋmɛnɛ lɛ ahe miishɛɛ, aloo jeee nakai? Ani osusu bɔ akɛ tai ni aaafo sɛɛ lɛ baahi jogbaŋŋ kɛha wɔ? [Ŋmɛɛ gbɛ ni ewie.] Kɛji gbɔmɛi kase bɔ ni akɛ mɔji krokomɛi anɔ bii hiɔ shi yɛ toiŋjɔlɛ mli lɛ, enɛ baafee shishijee kpakpa, aloo efeŋ nakai? [Ŋmɛɛ gbɛ ni ewie.] Biblia lɛ egba nakai pɛpɛɛpɛ efɔ shi [Kanemɔ Yesaia 2:2, 3.] Ani osusu bɔ ni enɛ aaafee aba kɛ be mli ni eeeba lɛ he dã?” Ha ele akɛ obaasumɔ ni oku osɛɛ ni nyɛbasusu sanebimɔ nɛɛ he lolo yɛ be ni baahi eha shiatsɛ lɛ mli.
5 Kɛ oshi “New World Translation” lɛ eko lɛ, obaanyɛ oku osɛɛ ni okɛɛ akɛ:
◼ “Eka shi faŋŋ akɛ oji mɔ ko ni sumɔɔ Nyɔŋmɔ Wiemɔ lɛ. No hewɔ lɛ miheɔ miyeɔ akɛ abaana he miishɛɛ waa akɛ ooole sɔrɔtofeemɔi wuji ni yɔɔ New World Translation lɛ kɛ ekrokomɛi lɛ ateŋ lɛ ekome. Nɛkɛ sɔrɔtofeemɔ nɛɛ kɔɔ Mɔ ni he hiaa fe fɛɛ ni awie ehe yɛ Ŋmalɛi lɛ amli lɛ gbɛi he. Ani ole mɔ ni ji?” Ŋmɛɛ shiatsɛ lɛ gbɛ ni eha heloo, no sɛɛ lɛ kanemɔ Lala 83:19. Obaanyɛ ona saji krokomɛi hu yɛ yitso ni ji ‘Yehowa,’ ni jeɔ shishi yɛ Reasoning wolo lɛ baafa 191 lɛ shishi
6 Biblia lɛ pɛ kɛ gbɛtsɔɔmɔ ni he hiaa adesai lɛ haa. (Yer. 10:23) Nyɔŋmɔ Wiemɔ lɛ kasemɔ ji gbɛ pɛ ni wɔɔtsɔ nɔ wɔle E-yiŋtoi ahe nii ni wɔna ehiɛ duromɔ. No hewɔ lɛ, nyɛhaa wɔkɛ ekaa afɔa mɛi krokomɛi anine ni amɛna eŋaawoo ni nilee yɔɔ mli, ni anyɛɔ atsuɔ he nii lɛ he sɛɛ.