Shikpɔŋkuku ni Atsuɔ Emli Nii Kpitiokpitio lɛ Mli Nitsumɔ
1 Wɔmii shɛɔ wɔhe akɛ wɔnine shɛɔ amaniɛbɔi ni tsɔɔ akɛ asafoi babaoo tsuɔ amɛ shikpɔŋkuku lɛ mli nii kpitiokpitio lɛ anɔ! (Mat. 24:14; 1 Tim. 2:3, 4) Eyɛ mli akɛ enɛ kɛ nitsumɔ ni wa ni yɔɔ sɔrɔto kwraa bafɔɔ wɔnɔ moŋ, shi niiashikpamɔ etsɔɔ akɛ abaanyɛ atsu he nii kɛ omanyeyeli kɛji wɔsaa wɔhe jogbaŋŋ ni wɔwaje wɔhe koni wɔtsu shihilɛi sɔrɔtoi ni teɔ shi lɛ ahe nii.
2 Hiɛkpamɔ Wiemɔi ni Mɔɔ Shi Jogbaŋŋ Ji Enɛ Naa Tsabaa: Ehe miihia waa diɛŋtsɛ akɛ ooosaa ohe jogbaŋŋ ni okɛ hiɛkpamɔ wiemɔi ni asusu he jogbaŋŋ kɛmɔ shi lɛ ateŋ ekome loo nɔ ni fe nakai aaatsu nii. Esa akɛ wiemɔi ni kɔɔ sane lɛ he pɔtɛɛ ni haa yiŋtoi ni he hiaa hewɔ ni wɔyaa mɛi aŋɔɔ kpitiokpitio lɛ feɔ faŋŋ lɛ afata he.
3 Reasoning wolo lɛ kɛ hiɛkpamɔ wiemɔi ahe nɔkwɛmɔ nii kpakpai babaoo ni sa jogbaŋŋ kɛha enɛ he nitsumɔ lɛ haa. Ato enɛɛmɛi ateŋ etɛ naa yɛ baafa 15 lɛ yɛ saneyitso ni ji “In Territory Often Worked” shishi lɛ mli. Kasemɔ enɛɛmɛi ateŋ nɔ ni ooosumɔ ni okɛtsu nii jogbaŋŋ yɛ oshikpɔŋkuku lɛ mli.
4 Shiɛlɔi komɛi yeɔ omanye yɛ enɛ mli yɛ be mli ni amɛkɛ saji ni jɛ maŋ nɛɛŋ adafitswaa woji amli tsuɔ nii kɛjeɔ sanegbaai ashishi yɛ shikpɔŋkuku ni atsuɔ mli nii kpitiokpitio lɛ mli. Reasoning wolo lɛ kɛ gbɛ ni aaatsɔ nɔ afee enɛ he nɔkwɛmɔ nii etɛ haa. Susumɔ hiɛkpamɔ wiemɔ ni ji enyɔ ni yɔɔ saneyitso “Crime/Safety” shishi yɛ baafa 10 lɛ kɛ klɛŋklɛŋ hiɛkpamɔ wiemɔi enyɔ ni yɔɔ saneyitso “Current Events” yɛ baafai 10 kɛ 11 lɛ he okwɛ.
5 Hiɛkpamɔ Wiemɔi ni Okɛsaa Ohe: Kwɛmɔ hiɛkpamɔ wiemɔi ni akɛha yɛ Reasoning wolo lɛ mli lɛ anɔ ofee hiɛkpamɔ wiemɔi ni sa jogbaŋŋ ni okɛtsu nii. Feemɔ enɛ yɛ gbɛ ni bo diɛŋtsɛ obaanyɛ okɛtsu nii lɛ nɔ yɛ bo diɛŋtsɛ owiemɔ mli. Obaanyɛ okɛ shiɛlɔ ni he esa asusu enɛ he dani okɛtsu nii yɛ shiɛmɔ nitsumɔ mli.
6 Akɛ nɔkwɛmɔ nɔ lɛ, obaanyɛ okɛɛ nɔ ko nɛkɛ akɛ:
◼ “Kɛjɛ beni wɔbasara bo nyɛsɛɛ lɛ kɛbashi amrɔ nɛɛ, [tsɔɔmɔ nɔ ko ni ba nyɛsɛɛ nɛɛ ni akutsoŋbii lɛ gbaa he sane]. Akɛni enɛ saa wɔ fɛɛ wɔhe yɛ gbɛ kome, loo gbɛ kroko nɔ hewɔ lɛ, wɔkutsoŋbii lɛ ateŋ mɛi pii kɛ hiɛdɔɔ esusu he. Ekolɛ bo hu osusu he yɛ gbɛ ko nɔ. [Mɛɛ fioo ni obo nɔ ni eeekɛɛ toi.] Yɛ bɔ ni je lɛŋ shihilɛi ji ha ŋmɛnɛ lɛ hewɔ lɛ, ani okɛ nɔ ni gbalɔ Yeremia ŋma yɛ Yitso 10, kuku 23 lɛ kpaŋ gbee?” Beni okane ŋmalɛ lɛ ogbe naa lɛ, kwɛmɔ ni ole nibii ni shiatsɛ lɛ ekadi yɛ he, no sɛɛ lɛ gbalamɔ ejwɛŋmɔ kɛya ŋmalɛ pɔtɛɛ ko ni tsɔɔ bɔ ni Yehowa baajie naagba diɛŋtsɛ ni nyɛgbaa he sane lɛ kɛya lɛ nɔ.
7 Aloo obaanyɛ okɛɛ akɛ:
◼ “Ŋwanejee ko bɛ he akɛ okadi yɛ adafitswaa wolo loo redio adafitswaa lɛ mli ŋmɛnɛ akɛ [tsɔɔmɔ nɔ ko pɔtɛɛ ni ba]. Ekolɛ okɛ mi baakpa gbee akɛ enɛ saa wɔ fɛɛ wɔhe. [Mɛɛ fioo ni obo nɔ ni eeekɛɛ toi.] Wɔbaanyɛ wɔna hiɛnɔkamɔ akɛ nɔyelii lɛ kɛ naagbai lɛ anaa tsabaa ni sɛɛ etsɛɛɛ baaba; shi kɛlɛ, Biblia lɛ tsɔɔ bɔ ni aaafee ajie naagba lɛ kɛya kwraa.” Gbalamɔ ejwɛŋmɔ kɛya ŋmalɛ pɔtɛɛ ni tsɔɔ nɔ ni Nyɔŋmɔ baafee lɛ nɔ.
8 “Mɛni Hewɔ Nyɛyaa Mɛi Aŋɔɔ Kpitiokpitio Lɛ?” Akɛ hetooi ni ja ni akɛaaha mɔ ni tsiɔ sanegbaa naa lɛ eha yɛ Reasoning wolo lɛ baafa 20 yɛ yitso “Why Do You People Call So Often?” lɛ shishi. Shi kɛ abiii wɔ he sane po lɛ, wɔbaanyɛ wɔye odase fɛfɛo kɛ wɔkɛ hegbɛ fɛɛ ni sa jogbaŋŋ tsu nii bɔni afee ni wɔye wɔbua mɛi krokomɛi ni amɛle akɛ anɔkwa suɔmɔ ni wɔyɔɔ kɛha Nyɔŋmɔ kɛ wɔnaanyo gbɔmɔ lɛ tsirɛɔ wɔ koni wɔya mɛi aŋɔɔ shii abɔ lɛ. Yesu wiemɔi ni yɔɔ Yohane 21:15-17 lɛ he susumɔ baanyɛ afee nɔ ni he baa sɛɛnamɔ waa yɛ enɛ gbɛfaŋ.
9 Nyɛhaa wɔyaa nɔ wɔtsua shikpɔŋkuku ni atsuɔ mli nii kpitiokpitio lɛ he kaa lɛ he nii kɛyashi Yehowa aaakɛɛ akɛ ehi. Kɛ wɔkɛ enɛ tsu nii akɛ wɔfashitswaa lɛ, no lɛ wɔbaana egbɛtsɔɔmɔ, hebuu, kɛ ejɔɔmɔ aahu kɛyashi naagbee.—Mat. 28:19, 20.