Okɛ Young People Ask Wolo lɛ Aha

¹ Eyɛ mli ákɛ akɛ Kpojiemɔ wolo lɛ miitsu nii yɛ nyɔŋ nɛɛ nɔ moŋ, shi obaanyɛ okpɛ oyiŋ akɛ okɛ Young People Ask wolo lɛ baaha kɛ okɛ fɔlɔ ko loo obalaŋta ko ni susuɔ saji ni gbaa obalaŋtai anaa lɛ ahe lɛ kpe lɛ.

² Obaana akɛ ebaahi jogbaŋŋ akɛ ooowie nɔ ko ni tamɔ nɛkɛ:

◼ “Dalɛ yɛ jaramɔ bei nɛɛ amli lɛ bɛ mlɛo. Obalaŋtai kɛ shihilɛi heei pii ni biɔ ni amɛkpɛ amɛyiŋ yɛ saji ni he hiaa ahe lɛ kpeɔ. ‘Ani esa akɛ minu dãa ni wa? Mikɛ tsofai fɔji atsu nii? Mɛni ji jeŋba ni sa yɛ yoo loo nuu he?’ Kɛ obalaŋtai bi saji ni tamɔ nɛkɛ lɛ, bei pii lɛ, hetooi babaoo ni kɛ amɛhe kpaaa gbee ji nɔ ni amɛkɛkpeɔ. Nɛgbɛ ji he ni osusuɔ akɛ amɛteŋ mɛi pii tsɔɔ amɛhe kɛyaa kɛhaa ŋaawoo? [Ŋmɛɛ gbɛ ni eha hetoo.] Wolo nɛɛ, Questions Young People Ask​—⁠Answers That Work, kɛ saji ni yeɔ buaa haa. [Gbalamɔ jwɛŋmɔ kɛya emli saji ni ato naa, ni tsɔɔ saji sɔrɔtoi ni ewieɔ he lɛ nɔ.] Hetooi ni yɔɔ tɛ̃ɛ ni jwɛŋmɔ yɔɔ mli he miihia obalaŋtai lɛ. Biblia lɛ fiɔ hetooi ni yɔɔ wolo nɛɛ mli lɛ asɛɛ.”

³ Naa shiɛmɔ wiemɔ kroko ni obaanyɛ okɛtsu nii:

◼ “Nɔnyɛɛi pii baa obalaŋtai anɔ ŋmɛnɛ. Yelikɛbuamɔ he miihia amɛ koni amɛnyɛ amɛdamɔ naa yɛ omanyeyeli mli. Kɛ wɔmiibɔ mɔdɛŋ fɛɛ ni wɔɔnyɛ ni wɔye wɔbua amɛ lɛ, ani wɔtaooo nɔ ko ni kɛ gbɛtsɔɔmɔ ni anyɛɔ atsuɔ he nii diɛŋtsɛ haa? [Ŋmɛɛ hetoo gbɛ.] Nɔnyɛɛi ni mli wa fe fɛɛ lɛ ekomɛi baa kɛjɛɔ obalaŋtai krokomɛi, ni ji amɛtipɛŋfoi aŋɔɔ. Kwɛmɔ mfonirii ni yɔɔ wolo nɛɛ baafai 76 kɛ 77 lɛ. [Gbalamɔ jwɛŋmɔ kɛya wiemɔi ni tsɔɔ mfonirii lɛ amli lɛ kɛ wiemɔi ni atsɔmɔ ni yɔɔ baafa 77 lɛ anɔ.] Baafai ni nyiɛ sɛɛ yɛ yitso nɛɛ mli lɛ tsɔɔ hetooi ni ji anɔkwale ni anyɛɔ atsuɔ he nii.”

⁴ “Jaramɔ bei ni mli wa” kɛha obalaŋtai lɛ titri mli wɔyɔɔ nɛɛ. (2 Tim. 3:⁠1, NW) Young People Ask wolo lɛ baanyɛ aye abua obalaŋta diɛŋtsɛ koni enyɛ edamɔ kaai ni baa ŋmɛnɛ lɛ anaa yɛ omanyeyeli mli. Akɛ mfonirii fɛfɛji etsɔɔ yitsei 39 lɛ amli, ni emli saji lɛ sa ni anyɛɔ atsuɔ he nii hu. No hewɔ lɛ ha ohiɛ ahi ohe nɔ koni kɛ ona hegbɛ lɛ, ni okɛ wolo fɛfɛo nɛɛ atsu nii.