Nyɔŋmɔ Wiemɔ lɛ Kɛ Gbɛtsɔɔmɔ Haa
1 “Jeŋ ko ni naagbai babaoo tsɔ yɔɔ mli ni fioo pɛ ayɔɔ amɛnaa tsabaa lɛ mli wɔyɔɔ lɛ. Gbɔmɛi akpekpei babaoo yɛ ni hɔmɔ yeɔ amɛ daa. Tsofai fɔji ni akɛtsuɔ nii lɛ eka mɛi babaoo ni amɛyi faa daa lɛ ahe. Wekui babaoo ni faa daa lɛ amli miigbála. Atswaa wekunyo ni bɛŋkɛ kpaakpa ni akɛ lɛ naa bɔlɛ kɛ weku mli basabasa feemɔ he adafi daa. Akɛ ebɔɔ woɔ kɔɔyɔɔ ni wɔmuɔ kɛ nu ni wɔnuɔ lɛ mli fiofio. Yɛ nakai beaŋ nɔŋŋ lɛ, ayeɔ wɔteŋ mɛi babaoo ni faa lɛ awui.”
2 Enɛ ji wiemɔi ni jeɔ The Bible—God’s Word or Man’s? wolo lɛ shishi. Emli hiɛkpamɔ wiemɔ lɛ he miihia waa diɛŋtsɛ ŋmɛnɛ po fe beni afee wolo lɛ afii kpawo ni eho nɛ lɛ. Ehe miihia ni gbɔmɛi ale akɛ Nyɔŋmɔ Wiemɔ lɛ kɛ gbɛtsɔɔmɔ haa, ni ekɛ naagbai fɛɛ ni baa amɛnɔ lɛ anaa tsabaa haa. Wɔbaabɔ mɔdɛŋ ni wɔye wɔbua mɛi yɛ December mli kɛtsɔ New World Translation kɛ The Bible—God’s Word or Man’s? wolo lɛ ni wɔkɛaaha amɛ lɛ nɔ. Shi kɛlɛ, wolo ni aaashi aha mɔ ko lɛ etsɔɔɔ diɛŋtsɛ akɛ ebaakpɛlɛ Nyɔŋmɔ gbɛtsɔɔmɔ nɔ. Wɔbaafee sɛɛsaramɔi kɛ oti ni ma hiɛ akɛ wɔɔje Biblia mli nikasemɔ shishi. Wɔyɛ nɔmimaa akɛ wɔbaana yelikɛbuamɔ, kɛ wɔbɔ mɔdɛŋ ni tamɔ nɛkɛ. (Mat. 28:19, 20) Naa shiɛmɔ wiemɔi komɛi ni akɛha:
3 Kɛ okɛ mɔ ni eda yɛ afii amli ko kpe lɛ, obaanyɛ oka gbɛ ni tamɔ nɛkɛ okwɛ:
◼ “Masumɔ mabi akɛ: Beni oji gbekɛ lɛ, no mli lɛ te mɛi ni yɔɔ akutso lɛ mli lɛ kɛ amɛhe yeɔ amɛhaa tɛŋŋ? [Ŋmɛɛ gbɛ ni ewie.] Nibii etsake kwraa agbɛnɛ, aloo jeee nakai? Mɛni osusuɔ akɛ no eha nibii etsake lɛ? [Ŋmɛɛ gbɛ ni ewie.] Wɔmiina akɛ Biblia gbalɛ ko miiba mli lɛlɛŋ. [Kanemɔ 2 Timoteo 3:1-5.] Kɛfata bɔ ni Biblia lɛ tsɔɔ bɔ ni je lɛ ji ha lɛ mli pɛpɛɛpɛ ŋmɛnɛ lɛ he lɛ, ekɛ jeŋ ni hi ni baaba yɛ wɔsɛɛ ko ni ebɛŋkɛ lɛ he shiwoo haa. Yɛ no hewɔ lɛ, wɔmiiwo mɔ fɛɛ mɔ hewalɛ koni ekane Biblia lɛ. Ani oyɔse bɔ ni Biblia ni ji New World Translation ni mikaneɔ lɛ mli wiemɔ lɛ yɔɔ faŋŋ ha?” Tsɔɔmɔ akɛ aŋma yɛ ŋmɛnɛŋmɛnɛ Ŋleshi wiemɔ mli, ni ehaa anuɔ Biblia lɛ shishi jogbaŋŋ diɛŋtsɛ. Okɛ The Bible—God’s Word or Man’s? wolo lɛ atsɔɔ, ni okɛ yitso 10 ni tsɔɔ gbalɛ kroko ni wɔna akɛ eba mli lɛ atsɔɔ lɛ. Okɛ Biblia lɛ kɛ wolo lɛ aha.
4 Kɛ osaa otee mɔ ni eda yɛ afii amli ni okɛ Biblia lɛ kɛ wolo lɛ ha lɛ lɛ ŋɔɔ lɛ, obaanyɛ okɛɛ akɛ:
◼ “Beni wɔwie nyɛsɛɛ lɛ, wɔkpɛlɛ nɔ akɛ ŋmɛnɛŋmɛnɛ adesai ashihilɛ efite kwraa, kɛ akɛto bɔ ni shihilɛ lɛ ji afii fioo ni eho nɛ lɛ he lɛ. Shi kɛlɛ, masumɔ ni matsɔɔ bo akɛ, Biblia lɛ kɛ nibii ni wɔbaanyɛ wɔkpa gbɛ akɛ wɔbaaná yɛ wɔsɛɛ be jeŋ kpakpa ko mli lɛ mamɔɔ shi. [Kanemɔ Kpojiemɔ 21:3, 4.] Esa akɛ le ni wɔle akɛ enɛ ji Nyɔŋmɔ Wiemɔ lɛ awo wɔ hewalɛ ni wɔkwɛ nɔ kroko hu ni Biblia lɛ yɔɔ kɛɛmɔ lɛ mli.” Gbelemɔ God’s Word wolo lɛ yitso 14, ní okane kukuji 3-4. Kɛɛmɔ lɛ akɛ okɛ lɛ baafee shia Biblia mli nikasemɔ ni oheee nɔ ko.
5 Kɛ okɛ mɔ ni edako tsɔ̃ ko gba sane lɛ, obaanyɛ okɛɛ akɛ:
◼ “Masumɔ ni mabi bo sane ko: Akɛ mɔ ni edako tsɔ̃ lɛ, ani osusuɔ akɛ oyɛ nɔ ni ooodamɔ nɔ okpa nɔ ko kpakpa gbɛ yɛ wɔsɛɛ be mli? Te onaa wɔsɛɛ be ohaa tɛŋŋ? [Ŋmɛɛ gbɛ ni ewie.] Heniianaa lɛ, yiŋtoo kpakpa yɛ ni wɔɔdamɔ nɔ wɔkpa nɔ ko kpakpa gbɛ yɛ wɔsɛɛ be mli. [Kanemɔ Lala 37:10, 11.] Akɛni gbɔmɛi hiɛ jwɛŋmɔi sɔrɔtoi yɛ Biblia lɛ kɛ emli saji lɛ ahe lɛ hewɔ ni wɔfee wolo ni ji The Bible—God’s Word or Man’s? wolo nɛɛ. Kadimɔ yiŋtoi ni ekɛhaa ni aaadamɔ nɔ akane Biblia lɛ. [Kanemɔ kukuji 16-17 yɛ baafai 10-11.] Kɛ wɔna wɔle akɛ nɔ ni Biblia lɛ kɛɔ lɛ ji anɔkwale nɔŋŋ pɛ lɛ, wɔbanáa wɔsɛɛ be lɛ he hiɛnɔkamɔ ni ma shi shiŋŋ. Kɛ oosumɔ ni okane wolo nɛɛ, belɛ ebaaŋɔɔ minaa akɛ mashi eko maha bo.”
6 Kɛ oku osɛɛ otee mɔ ni edako tsɔ̃ ni he “God’s Word” wolo lɛ ŋɔɔ lɛ, obaanyɛ oje shishi kɛtsɔ enɛ kɛɛmɔ nɔ:
◼ “Mihiɛ sɔ akɛ minu bɔ ni osusuɔ wɔsɛɛ shihilɛ he ohaa lɛ he sane. Kaimɔ akɛ mikɛ Biblia mli ŋmalɛ ko ni woɔ wɔ shi akɛ wɔbaana wɔsɛɛ be ni miishɛɛ kɛ shweshweeshwe shihilɛ yɔɔ mli lɛ tsɔɔ bo. Ekroko hu nɛ. [Kanemɔ Kpojiemɔ 21:3, 4.] Wolo ni mishi miha bo lɛ kɛ odaseyeli ni mli wa ni tsɔɔ akɛ Biblia lɛ ji Nyɔŋmɔ Wiemɔ, ni jeee gbɔmɔ nɔ̃ lɛ haa. Nakai anɔkwa sane lɛ tsɔɔ nibii komɛi amli jogbaŋŋ. Kadimɔ nɔ ni amɛji. [Kanemɔ kukuji 1-2 yɛ baafai 184-5.] Kɛ obaasumɔ lɛ, ebaaŋɔɔ minaa akɛ mikɛ bo baakase Biblia lɛ ni miheee nɔ ko.” Gbalamɔ jwɛŋmɔ kɛya sɛɛnamɔi ni yɔɔ New World Translation lɛ he lɛ, koni no sɛɛ lɛ okɛha.
7 Ekolɛ mɔ ko ni leee he ni ebaaná gbɛtsɔɔmɔ ni ekɛbaadamɔ shihilɛ mli naagbai anaa kɛjɛ lɛ baanyɛ ahere sane ni tamɔ nɛkɛ nɔ:
◼ “Wɔyɛ be ko ni etamɔ nɔ ni mɔ fɛɛ mɔ kɛ naagbai ni hiɛdɔɔ yɔɔ mli miikpe lɛ mli. Gbɔmɛi babaoo yaa ŋaawolɔi sɔrɔtoi fɛɛ aŋɔɔ kɛha gbɛtsɔɔmɔ. Mɛi komɛi yaa mumɔi atsɛlɔi aŋɔɔ kɛha yelikɛbuamɔ. Nɛgbɛ osusuɔ akɛ wɔbaanyɛ wɔna ŋaawoo kpakpa ni he baaba sɛɛnamɔ diɛŋtsɛ aha wɔ lɛ yɛ? [Ŋmɛɛ gbɛ ni ewie.] Biblia lɛ wieɔ anɔkwa sane ko ni ehe miihia ni wɔ fɛɛ wɔnu shishi.” Kanemɔ Yeremia 10:23. Gbelemɔ The Bible—God’s Word or Man’s? lɛ baafa 187, ní okane kuku 9. “Wolo nɛɛ baaye abua bo koni ole bɔ ni abaajie wɔ naagbai lɛ fɛɛ kɛya yɛ Nyɔŋmɔ Maŋtsɛyeli lɛ shishi. Ani obaasumɔ ni okane?” Okɛ wolo lɛ aha ni oto gbɛjianɔ ni oba ekoŋŋ.
8 Kɛ nyɛgba sane ni tsɔɔ bɔ ni ehe hiaa ni gbɔmɔ ana gbɛtsɔɔmɔ lɛ he sane yɛ klɛŋklɛŋ saramɔ lɛ mli lɛ, obaanyɛ otsa sanegbaa lɛ nɔ yɛ sɛɛsaramɔ lɛ mli kɛtsɔ enɛ kɛɛmɔ nɔ:
◼ “Beni wɔkpe klɛŋklɛŋ lɛ, wɔkpɛlɛ nɔ akɛ, kɛ wɔɔnyɛ wɔdamɔ shihilɛ mli naagbai anaa yɛ omanyeyeli mli lɛ, belɛ gbɛtsɔɔmɔ ni jɛ Nyɔŋmɔ ŋɔɔ he miihia wɔ. Yɛ no gbɛfaŋ lɛ, misusuɔ akɛ obaanya naagbee saji ni awie yɛ wolo ni mishi miha bo lɛ he lɛ he. [Kanemɔ kukuji 12-13 yɛ baafa 189 lɛ yɛ God’s Word wolo lɛ mli.] Eŋɔɔ minaa akɛ mikɛ bo aaafee shia Biblia mli nikasemɔ ni miheee nɔ ko, ni misaa mihe akɛ mafee ehe nɔkwɛmɔ nɔ matsɔɔ bo bianɛ.”
9 Yehowa baajɔɔ wɔ mɔdɛŋbɔi anɔ, yɛ be mli ni wɔyeɔ wɔbuaa onukpai kɛ gbekɛbii fɛɛ koni amɛle sɛɛnamɔ ni yɔɔ Nyɔŋmɔ Wiemɔ lɛ kɛ emli gbɛtsɔɔmɔ he yɛ wɔ shihilɛ mli lɛ.—Lala 119:105.