Teemɔ Miishɛɛ Shi yɛ Obaanyɛ Ohi Shi Wolo lɛ He
1 Kɛ wɔtee mɛi aŋɔɔ yɛ amɛshiai lɛ, bei pii lɛ wɔnaa akɛ gbɔmɛi kɛ amɛhe fɛɛ ewo “je nɛŋ he naagbamɔ” lɛ he nitsumɔ mli waa. (Mar. 4:19) Wɔkɛ kaa ko kpeɔ, ni no ji miishɛɛ ni wɔɔha amɛna yɛ sane lɛ he kɛtsɔ wiemɔ ko ni kanyaa niiahesusumɔ ni wɔɔwie nɔ. Kɛjɛ shishijee lɛ, ekolɛ mɛi pii yɛ ni miishɛɛ bibioo pɛ amɛyɔɔ yɛ nɔ ni wɔyɔɔ kɛɛmɔ lɛ he. Kɛ wɔbaanyɛ wɔwie nɔ ko ni baasa amɛshihilɛi ahe lɛ, no lɛ ekolɛ wɔbaanyɛ wɔtee amɛ miishɛɛ shi yɛ Maŋtsɛyeli shɛɛ sane lɛ he. Gbɛ titri ni atsɔɔ nɔ ajeɔ sanegbaai ashishi ji ni ahala wiemɔi ni akɛgbaa sane, ni anaa he miishɛɛ kɛjɛ Obaanyɛ Ohi Shi wolo lɛ mli. Mɛni obaanyɛ okɛɛ?
2 Obaanyɛ okɛ gbɛ ni tamɔ nɛkɛ atsu nii:
◼ “Kɛji oyɛ hewalɛ lɛ, mɛɛ naagba ko ni haoɔ mɔ yɛ wɔgbii nɛɛ amli obaasumɔ ni otsu he nii? [Ŋmɛɛ gbɛ ni ejie naa, ni kɛji esa lɛ, okpɛlɛ nɔ akɛ mɛi pii nuɔ he nakai.] Kɛbashi amrɔ nɛɛ, etamɔ nɔ ni omanye bibioo pɛ je lɛŋ hiɛnyiɛlɔi eye yɛ ŋmɛnɛ naagbai ni haoɔ wɔ waa nɛɛ ateŋ babaoo anaa tsabaa namɔ mli. Shi Mɔ ko yɛ ni baanyɛ ekɛ naagbai ni haoɔ adesai lɛ fɛɛ aba naagbee kwraa, ni ebaafee nakai hu. Ofainɛ kadimɔ nɔ ni awie yɛ Lala 145:16 lɛ. [Kanemɔ ŋmalɛ lɛ, ni ogbele mfonirii ni yɔɔ baafa 11-13 lɛ okɛ lɛ agba he sane.] Kuku 14, yɛ baafa 14 teeɔ sanebimɔ ni wɔsusu he nɛɛ shi, ni eyaa nɔ ebiɔ akɛ: ‘Shi mɛɛ be mli enɛ baaba?’” Tsɔɔmɔ lɛ akɛ wolo lɛ baaha nakai sanebimɔ lɛ hetoo, koni yɛ naamuu mli lɛ, okɛ wolo lɛ aha lɛ.
3 Aloo obaanyɛ okɛɛ nɔ ko tamɔ nɛkɛ:
◼ “Ekolɛ ole bɔ ni mɔ feɔ shwɛm ehaa kɛji elaaje esuɔlɔ ko yɛ gbele mli. Eeenyɛ ebalɛ akɛ ehaa owerɛ hoɔ ohe ni onuɔ nijiaŋwujee he waa. Ekolɛ osusu sanebimɔi nɛɛ ahe dã: [Kanemɔ sanebimɔi ni yɔɔ kuku 1 yɛ baafa 76 lɛ.] Ani efeŋ miishɛjemɔ akɛ wɔɔna nɛkɛ sanebimɔi nɛɛ ahetoo? Ekolɛ ebaawo bo hewalɛ akɛ ooole akɛ Biblia lɛ hiɛ shiwoo ko ni ma shi shiŋŋ kɛha mɛi ni egboi lɛ. [Kanemɔ Yohane 5:28, 29.] Wolo nɛɛ yeɔ ebuaa wɔ ni wɔnuɔ shihilɛ ni gbohii lɛ yɔɔ mli lɛ shishi, kɛ hiɛnɔkamɔ ni yɔɔ kɛha amɛ wɔsɛɛ.” Okɛ lɛ agba yitso 8 kɛ 20 lɛ he sane kuku. Kɛ ona akɛ eyɛ he miishɛɛ lɛ, ha shiatsɛ lɛ hegbɛ ni ekwɛ wolo lɛ mli ni owo lɛ hewalɛ ni ehe.
4 Eeenyɛ ebalɛ akɛ ekolɛ obaanyɛ okɛ hegbɛi komɛi akpe ni okɛye odase trukaa. Kɛji ebalɛ nakai lɛ, obaanyɛ owie nɔ ko tamɔ nɛkɛ, yɛ bo diɛŋtsɛ owiemɔ mli akɛ:
◼ “Gbii etɛ nɛɛ, je lɛ eyi obɔ kɛ naagbai, ni ŋwanejee ko bɛ he akɛ bo hu oyɛ onɔ. Shi dɔlɛ sane kome ji akɛ, etamɔ nɔ ni mɛi ni efeko nɔ ko lɛ moŋ naa amanehulu fe fɛɛ. Ani osusuɔ akɛ be ko baaba ni Nyɔŋmɔ baafo amanehulu fɛɛ sɛɛ kwraa? [Ŋmɛɛ gbɛ ni ejie naa.] Ha matsɔɔ bo nɔ ni Nyɔŋmɔ ewo shi akɛ ebaafee eha mɛi ni sɔmɔɔ lɛ lɛ. [Kanemɔ Lala 37:40 koni no sɛɛ lɛ ogbele Obaanyɛ Ohi Shi wolo lɛ baafa 99.] Nɛkɛ wolo nɛɛ tsɔɔ nɔ hewɔ ni Nyɔŋmɔ eŋmɛ efɔŋ feemɔ gbɛ lɛ, kɛ bɔ ni ebaafee ni ekɛba naagbee.”
5 Kɛ oji shiɛlɔ ni edako yɛ afii amli lɛ, no lɛ obaanyɛ okɛ shiɛmɔ wiemɔ ni damɔ mfonirii ni yɔɔ baafa 156-8 nɔ lɛ atsu nii. Obaanyɛ oje shishi ni obi akɛ:
◼ “Ani obaasumɔ ni ohi jeŋ ni tamɔ nɛkɛ mli? [Ŋmɛɛ gbɛ ni ejie naa.] Nɛkɛ mfonirii fɛfɛji nɛɛ eko fɛɛ eko damɔ shiwoo ni akɛha yɛ Nyɔŋmɔ Wiemɔ, ni ji Biblia lɛ mli lɛ nɔ. [Tsɔɔmɔ lɛ Ŋmalɛi ni atsɛ lɛ.] Wolo nɛɛ baanyɛ aye abua bo ni okase Nyɔŋmɔ shiwoo ni ekɛha akɛ ebaafee shikpɔŋ muu lɛ fɛɛ paradeiso lɛ he nii babaoo. Yiwalaheremɔ saji yɛ mli, ni be ni ooona ni okɛkane lɛ he baaba sɛɛnamɔ waa aha bo.”—Yoh. 17:3.