Feemɔ Mɔ ni Hiɛ Yɔɔ Woji Tɛtrɛbii lɛ Anɔ Yɛ October

¹ Naanɔ sanekpakpa lɛ he shɛɛ sane ni shɛjeɔ mɔ mii ni woɔ mɔ hewalɛ lɛ yɛ Buu-Mɔɔ kɛ Awake! lɛ mli. Nɔ ni fata wolo tɛtrɛɛ lɛ eko ni ooosumɔ ni ona lɛ he ji otsui shi ni oooto ni okane amɛ jogbaŋŋ koni osusu bɔ ni mɛi baana amɛmli saji lɛ ahe miishɛɛ waa yɛ wɔ shikpɔŋkuku lɛ mli lɛ he.

² Klɛŋklɛŋ lɛ, le emli saji ni ama nɔ mi yɛ amɛsɛɛ lɛ jogbaŋŋ. Amɛsɛɛ mfonirii lɛ diɛŋtsɛ baaha ahe woji tɛtrɛbii lɛ. Halamɔ saji ni osusuɔ akɛ mɛi ni yɔɔ nyɛ shikpɔŋkuku lɛ mli lɛ baanyá he. Titri lɛ ani gbɔmɛi lɛ yɛ jamɔŋ hemɔkɛyeli kome mli? Mɛni ji amɛnaagbai titri? Esa akɛ onyɛ okɛ shiɛmɔ wiemɔ ko ni mɔɔ shi jogbaŋŋ asaa ohe, kɛ oosusu saji nɛɛ ahe yɛ ojwɛŋmɔ mli. Kadimɔ nɔ ni ato naa yɛ shishigbɛ nɛɛ.

³ Kɛ okɛ October 1 “Buu-Mɔɔ” miiha lɛ, obaanyɛ owie sane ni ji “Biblia Lɛ​—⁠Mɛni Ji Ehe Sɛɛnamɔ Diɛŋtsɛ?” lɛ he. Obaanyɛ okɛɛ akɛ:

◼ “Eehe efee akɛ obaanyɛ ona Biblia yɛ shia fɛɛ shia yɛ wɔ akutso lɛ mli. Mɛi ni yɔɔ eko lɛ nuɔ he akɛ sɛɛnamɔ titri ko yɛ he.” No sɛɛ lɛ obaanyɛ obi sane tɛɛ, akɛ: “Mɛni osusuɔ akɛ no haa Biblia lɛ feɔ sɔrɔto kwraa lɛ?” aloo, “Mɛni osusuɔ akɛ no baaye abua mɛi babaoo koni amɛna Biblia lɛ he sɛɛ?” Kɛ shiatsɛ lɛ ha hetoo egbe naa lɛ, obaanyɛ okɛ saji komɛi ni sa atsa nɔ, akɛ: “Odaseyelii babaoo yɛ ni baatsɔɔ akɛ Biblia lɛ jɛ Nyɔŋmɔ mumɔ mli ni eji gbɛtsɔɔmɔ ni anyɛɔ akɛ he fɔɔ nɔ kɛha wɔ. Nilee ni baanyɛ ekɛ wɔ aya naanɔ wala mli lɛ yɛ mli. [Kanemɔ Yohane 17:⁠3.] Mɛi babaoo yɛ bulɛ kɛha Biblia lɛ shi amɛleee bɔ ni akɛtsuɔ nii ahaa. Sane nɛɛ ni yɔɔ Buu-Mɔɔ lɛ mli lɛ tsɔɔ bɔ ni bo diɛŋtsɛ obaanyɛ okɛ Biblia lɛ atsu nii koni okɛha saji ni obiɔ yɛ wɔsɛɛ shihilɛ he lɛ ahetoo. Masumɔ ni mashi enɛ maha bo koni matsɔɔ bo bɔ ni obaanyɛ ofee ni onine ashɛ nɔ daa yɛ oshia.”

⁴ Kɛ okɛ September 15 “Buu-Mɔɔ” lɛ miiha lɛ, ooosumɔ ni oje shishi yɛ gbɛ kuku nɔ tamɔ nɛkɛ, akɛ:

◼ “Etamɔ nɔ ni mɔ fɛɛ mɔ susuɔ adesai ateŋ sharamɔi ni yaa nɔ efiteɔ lɛ ahe. Nɔnyɛɛ ni baa weku shihilɛ mli titri lɛ miiwo mɛi ahe gbeyei. Sane nɛɛ teeɔ sanebimɔ ko shi akɛ, ‘Mɛni Hewɔ Esa akɛ Okɛ Sane Ake?’ Mɛni osusuɔ akɛ weku shihilɛ baatamɔ kɛ́ mɔ fɛɛ mɔ kɛ sane keɔ kwraa lɛ? [Ha ni eha hetoo.] Kɛ oosumɔ ni ole bɔ ni Biblia lɛ haa nakai sanebimɔ lɛ hetoo ehaa lɛ, no lɛ ebaaŋɔɔ minaa akɛ mikɛ wolo tɛtrɛɛ nɛɛ aaaha bo.” Hiɛmɔ dɛhiɛmɔ wolo ni ji, Na Weku Shihilɛ Mli Ŋɔɔmɔ ni ofee kralo nɔŋŋ akɛ okɛaaha kɛji shiatsɛ lɛ miisumɔ sane ko ni yɔɔ kuku moŋ lɛ.

⁵ September 8 “Awake!” lɛ pɛiɔ Triniti tsɔɔmɔ, ni ji nibii ni tɔtɔɔ mɛi anane lɛ ekome ni haa Moslem­bii kɛ Yudafoi tsiɔ amɛhe kɛjɛɔ Kristendom jamɔi ahe lɛ mli fitsofitso. Kɛ okɛ saji ni damɔ wiemɔ ni ji “Have You Ever Won­dered?” lɛ nɔ lɛ miitsu nii lɛ, obaanyɛ obi sane nɛɛ akɛ:

◼ “Ani ole akɛ Triniti lɛ mli hemɔkɛyeli kɛ mɔ woɔ oshara mli? [Ha ni eha hetoo.] Yesu tsɔɔ wɔ akɛ wɔja Tsɛ lɛ ‘yɛ anɔkwale mli’ ni ekɛ nɔ ni Biblia lɛ tsɔɔ lɛ kpaa gbee. Kɛlɛ, jamɔi babaoo ni jajeɔ akɛ Kristofoi ji amɛ lɛ tsɔɔ Triniti, tsɔɔmɔ ni abiii he sane ni bɛ Biblia lɛ mli. Te osusuɔ akɛ esaa mɛi ni sumɔɔ ni amɛhi shi yɛ nɔ ni Biblia lɛ tsɔɔ lɛ naa lɛ ahe ehaa tɛŋŋ? [Ha ni eha hetoo.] Awake! nɛɛ wieɔ nakai sanebimɔ lɛ he ni etsɔɔ Biblia lɛ jwɛŋmɔ yɛ sane lɛ he.”

⁶ Bɔɔ mɔdɛŋ ni okɛ woji tɛtrɛbii lɛ aha ni oha ashɛ hu yɛ shinaa fɛɛ shinaa naa, kɛji onyɛɛɛ ogba Biblia lɛ he sane po. Mɛi babaoo ni heɔ woji tɛtrɛbii lɛ baanya he akɛ okɛ ehee ni baa lɛ eko baaba ekoŋŋ ni ekolɛ amɛbaasumɔ akɛ amɛaashɛ yɛ sɛɛ mli.