Maŋtsɛyeli Sane ni Eba yɛ Ebe Naa Pɛpɛɛpɛ ni Abaaja yɛ Jeŋ Fɛɛ
1 Abaaha maŋshiɛmɔ krɛdɛɛ ko ni hiɛ saneyitso ni gbalaa mɔ jwɛŋmɔ ni ji, “Apasa Jamɔ Naagbee Ebɛŋkɛ” yɛ Hɔgbaa, April 23. Kɛ agbe kpee lɛ naa nakai gbi lɛ, abaajie Maŋtsɛyeli Sane ni teeɔ sane hesusumɔ shi, ni hiɛ baafai ejwɛ kpo. Akɛ otsii etɛ baaja emli shɛɛ sane ni eba yɛ ebe naa pɛpɛɛpɛ lɛ yɛ jeŋ fɛɛ kɛjɛ April 24 kɛyashi May 14.
2 Gbɔmɛi efee basaa yɛ je lɛŋ he fɛɛ he. Naagbai baa amɛnɔ, ni he ni amɛyɔɔ lɛ kɔɔɔ he eko. Mɛi ni susuɔ nɔ ni yaa nɔ lɛ he yɛ anɔkwayeli mli lɛ baanya Maŋtsɛyeli Sane lɛ he waa diɛŋtsɛ, akɛni ebaagbala amɛ kɛya Nyɔŋmɔ Wiemɔ lɛ mli lɛ akɛ gbɛtsɔɔmɔ jɛɛhe ni tɔmɔ ko bɛ he kɛha gbɔmɔ hewɔ. (Lala 119:105) Wɔ fɛɛ wɔmiikpa gbɛ akɛ wɔnine baashɛ Maŋtsɛyeli Sane lɛ eko nɔ kɛ ajie lɛ kpo yɛ April 23. Shi amrɔ nɛɛ, ayɛ babaoo feemɔ koni akɛsaa he aha otsii etɛ tafaa ni akɛ ekãa baatsu he nii nɛɛ.
3 Wo Mɛi Fɛɛ Hewalɛ ni akɛ Ekãa Ana Mli Gbɛfaŋnɔ: Namɔ baana nitsumɔ lɛ mli gbɛfaŋnɔ? Eka shi faŋŋ akɛ mɔ fɛɛ mɔ ni shiɛlɔ ji lɛ momo lɛ baasumɔ waa akɛ efee nakai! Ni Biblia mli nikaselɔi ni baa asafoŋ kpeei daa hu? Mɛi komɛi kɛ wɔ ebɔ be saŋŋ ni amɛmiiya amɛhiɛ waa. Kɛ ámɛha amɛ shihilɛ kɛ Ŋmalɛ mli shishitoo mlai ekpa gbee lɛ, ani amɛhe esa bɔ ni aaanyɛ abu amɛ Maŋtsɛyeli jajelɔi? Shiɛlɔ ni kwɛɔ Biblia mli nikasemɔ nɔ lɛ baanyɛ ekɛ nikaselɔ lɛ agba he sane, ni kɛ nikaselɔ lɛ miitao ena shiɛmɔ nitsumɔ lɛ mli gbɛfaŋnɔ lɛ, onukpai enyɔ kɛ lɛ baati sane ni yɔɔ Organized to Accomplish Our Ministry wolo lɛ baafai 98 kɛ 99 lɛ amli. Esa akɛ afee enɛ oya bɔ ni aaanyɛ koni mɛi ni he basaa akɛ shiɛlɔi ni abaptisiko amɛ lɛ anyɛ ana tafaa lɛ mli gbɛfaŋnɔ kɛmɔ shi. Abaanyɛ awo Biblia kaselɔi ni he esako lolo bɔ ni aaabu amɛ shiɛlɔi ni abaptisiko amɛ lɛ hewalɛ koni amɛkɛ nanemɛi loo amɛ weku mli bii akwɛ Maŋtsɛyeli Sane ni eba yɛ ebe naa pɛpɛɛpɛ nɛɛ mli.—Kwɛmɔ June 15, 1989 Buu-Mɔɔ lɛ baafa 17 lɛ kuku 8.
4 Nɛkɛ nitsumɔ nɛɛ waaa; mɔ fɛɛ mɔ baanyɛ ana mli gbɛfaŋnɔ. Fɔlɔi baanyɛ ni amɛkɛ Maŋtsɛyeli Sane lɛ ni akɛbaaha lɛ he saji ni abaati mli nɔtonɔto akwɛ lɛ afata daa otsi weku Biblia mli nikasemɔ lɛ he akɛ efã, koni weku lɛ mli bii lɛ fɛɛ asaa amɛhe jogbaŋŋ ni amɛkɛha yɛ shia kɛ shia. Bei pii lɛ shiɛmɔ wiemɔ kuku hi fe fɛɛ. Beni okɛ wiemɔ kuku ekpa hiɛ ogbe naa lɛ, okɛ Maŋtsɛyeli Sane lɛ aha shiatsɛ lɛ, ni owo lɛ hewalɛ ni ekane. Kɛ shiatsɛmɛi lɛ jie miishɛɛ kpo lɛ, kadimɔ ofɔ shi, koni onyɛ oku osɛɛ oyakanya miishɛɛ lɛ. (1 Kor. 3:6, 7) Gbɛ ni abaatsɔ nɔ aye omanye lɛ damɔ shiɛmɔ wiemɔ kuku ni akɛaasaa he jogbaŋŋ lɛ nɔ.
5 Abaana “babaoo feemɔ” yɛ April kɛ May mli. Akɛ sane ni yitso ji “Ayɛ Babaoo Feemɔ yɛ Nuntsɔ lɛ Nitsumɔ lɛ Mli” ni baaje kpo yɛ nɔ ni aŋma ahɔ Wɔ Maŋtsɛyeli Sɔɔmɔ ni baa yɛ nyɔŋ ni baanyiɛ sɛɛ lɛ mli lɛ baaha.—1 Kor. 15:58, New World Translation.