“Ayɛ Babaoo Feemɔ yɛ Nuntsɔ lɛ Nitsumɔ lɛ Mli”
1 Eka shi faŋŋ akɛ wɔmiikwɛ gbɛjianɔ ni ato kɛha teokrase nitsumɔi babaoo gbɛ yɛ April kɛ May mli! Wɔbaaye Kristo gbele lɛ Kaimɔ lɛ yɛ April 14. Esa akɛ awo mɛi babaoo hewalɛ bɔ ni aaanyɛ koni amɛba nakai nifeemɔ ni he hiaa lɛ shishi: nanemɛi nitsulɔi, wekumɛi ni heee yeee, nanemɛi skulbii, mɛi heei ni yɔɔ wiemɔ lɛ he miishɛɛ, kɛ Biblia mli nikaselɔi. Ŋmalamɔ mɛi ni oto gbɛjianɔ akɛ obaatsɛ amɛ lɛ agbɛi koni akashi mɔ ko.
2 Wɔbaawo mɛi fɛɛ ni ba Kaimɔ lɛ hewalɛ koni amɛbabo maŋshiɛmɔ krɛdɛɛ ni yitso ji “Apasa Jamɔ Naagbee Ebɛŋkɛ” ni abaaha yɛ otsi ni nyiɛ sɛɛ, yɛ April 23 lɛ toi. Ayɛ hiɛnɔkamɔ akɛ mɛi babaoo ni yɔɔ wiemɔ lɛ he miishɛɛ ni nuɔ shɛɛ sane ni mli ka shi faŋŋ nɛɛ baana bɔ ni ehe hiaa ha akɛ akɛ he aaabɔ asafo lɛ he daa shi ni jeee yɛ bei krɛdɛɛ komɛi amli pɛ.
3 Maŋtsɛyeli Sane Krɛdɛɛ ni Abaajie lɛ Kpo: April 23 kpee lɛ mli sane titri baafee Maŋtsɛyeli Sane No. 34 ni hiɛ baafai ejwɛ ni eba yɛ ebe naa pɛpɛɛpɛ lɛ kpojiemɔ, ni abaaja lɛ waa aahu kɛyashi May 14 lɛ. Ani okpɛlɛɛɛ nɔ akɛ abaana “babaoo feemɔ yɛ Nuntsɔ lɛ nitsumɔ lɛ mli” yɛ Kaimɔ be nɛɛ mli?—1 Kor. 15:58.
4 Akɛ Maŋtsɛyeli Sane lɛ saŋŋ baaha asafo fɛɛ asafo. Esa akɛ akɛ wolo adekai ni Maŋtsɛyeli Sane lɛ yɔɔ mli lɛ ato he ko ni hi jogbaŋŋ ni esaaa akɛ agbeleɔ naa aahu kɛyashi nifeemɔ ni baaya nɔ yɛ April 23 lɛ naagbee. Akɛ Maŋtsɛyeli Sane lɛ baaba yɛ nakai be lɛ mli koni aja aha nyɛmimɛi lɛ kɛ maŋbii. Kɛ agbe asafoŋ kpeei lɛ anaa yɛ April 23 lɛ, mɛi ni ba lɛ ateŋ mɔ fɛɛ mɔ baana ekome koni amɛnyɛ amɛle emli saji lɛ ni ewula amɛ kɛha ejaa.
5 Onukpai Baana Babaoo Feemɔ: Esa akɛ onukpai akuu lɛ akpe mra yɛ nyɔŋ nɛɛ nɔ koni amɛsusu tafaa krɛdɛɛ nɛɛ he sane fitsofitso. Esa akɛ asafoi lɛ abɔ mɔdɛŋ ni amɛtsu amɛ shikpɔŋkuku ni akɛwo amɛdɛŋ lɛ fɛɛ mli nii. Dani tafaa lɛ aaaba naagbee lɛ, nyɛbɔa mɔdɛŋ krɛdɛɛ ko koni nyɛtsu nakai shikpɔŋkukuji ni atsuko mli nii yɛ nyɔji ekpaa ni eho lɛ mli lɛ amli nii. Akɛni nitsumɔ nɛɛ he hiaa hewɔ lɛ, wɔbaasumɔ ni wɔto be wɔma shi bɔ ni aaanyɛ kɛha sɔɔmɔ nitsumɔ lɛ. Ŋwanejee ko bɛ he akɛ shiɛlɔi babaoo ni fa fe daa kɛ amɛhe baaha akɛ gbɛgbalɔi awalɔi. Eeenyɛ eba akɛ Biblia mli nikaselɔi babaoo hu baafata wɔhe akɛ shiɛlɔi heei ni abaptisiko amɛ ni akpɛlɛ amɛnɔ kpaako. Kwɛ miishɛɛ be ni wɔbaana yɛ be mli ni wɔtsuɔ nii kutuu yɛ Nuntsɔ lɛ nitsumɔ mli lɛ!
6 Esa akɛ Asafo Woloŋ Nikasemɔ nɔkwɛlɔi ato gbɛjianɔ pɔtɛɛ komɛi kɛha kutuu odaseyeli yɛ Hɔɔ kɛ Hɔgbaa. Esa akɛ awo kuu lɛ mlibii fɛɛ hewalɛ koni amɛkɛ amɛhe awo mli kɛmɔ shi. Esa akɛ ato gbɛkɛ odaseyeli he gbɛjianɔ, kɛ hoo lɛ shikome yɛ otsi mli yɛ tafaa lɛ mli, kɛfata otsi lɛ naagbee nitsumɔ lɛ he. Mɛi komɛi baasumɔ ni amɛkpe yɛ skul kpamɔ sɛɛ koni amɛya shiɛmɔ bɔni afee ni skul nikaselɔi ni baasumɔ ni amɛkɛ amɛhe awo mli ekoŋŋ lɛ ana mli gbɛ.
7 Esa akɛ ato kpee kɛha shiɛmɔyaa he gbɛjianɔ koni shiɛlɔi kɛ gbɛgbalɔi anyɛ aje shiɛmɔ nitsumɔ lɛ shishi mra, yɛ gbi lɛ fɛɛ eko nɔ. Esa akɛ aha kpeei lɛ afee kuku. Esa akɛ mɔ fɛɛ mɔ afee Maŋtsɛyeli Sane lɛ he shiɛmɔ wiemɔ kuku. Esa akɛ shiɛlɔi ahiɛ woji tɛtrɛbii heei lɛ hu eko, koni aja yɛ he ni ehe baahia yɛ. Abaanyɛ akɛ ŋaawoo kome loo enyɔ aha, yɛ kpeei ni afeɔ shwane kɛha shiɛmɔyaa, kɛ sɛɛsaramɔi yɛ mɛi ni ehe Maŋtsɛyeli Sane lɛ aŋɔɔ lɛ mli. Shi kɛlɛ, shiɛlɔi komɛi baasumɔ ni amɛkɛ amɛhe awo ejaa mli leebi kɛ shwane fɛɛ. Yɛ enɛ hewɔ lɛ, sɔɔmɔ nitsumɔ nɔkwɛlɔ lɛ baasumɔ ni ekwɛ akɛ shikpɔŋkuku ni fa bɔ ni sa yɛ. Esa akɛ aŋmala mɔ fɛɛ mɔ ni baatsɔɔ miishɛɛ lɛ gbɛi kɛ adrɛs awo shia-kɛ-shia kadimɔ wolo lɛ nɔ. Abaanyɛ aŋmala sane ni agba lɛ kuku lɛ mli otii lɛ awo saji aŋmalamɔ he lɛ. Enɛ baasaa gbɛ kɛha sɛɛsaramɔ yɛ sɛɛ mli yɛ otsi loo nyɔŋ lɛ mli.
8 Kɛ asafo kome ko ye ebua asafo kroko kɛtsu eshikpɔŋkuku lɛ mli nii lɛ, no lɛ esa akɛ akɛ mɛi ni yɔɔ he miishɛɛ lɛ agbɛi kɛ adrɛs aha asafo ni tsuɔ nakai shikpɔŋkuku lɛ mli nii lɛ.
9 Fɔlɔi, ani nyɛbii lɛ miibɔ mɔdɛŋ koni amɛbatsɔmɔ shiɛlɔi ni abaptisiko amɛ? Nɔ ni akadi yɛ asafoi komɛi amli ji akɛ, gbekɛbii ni baa amɛjeŋ jogbaŋŋ efata amɛfɔlɔi ni amɛjɔɔ amɛhe nɔ lɛ ahe kɛtee shiɛmɔ afii komɛi, ni gbekɛbii lɛ bɔɔ mɔdɛŋ waa, eyɛ mli akɛ amɛtsɔmɔko sanekpakpa lɛ he shiɛlɔi lolo. Esa akɛ fɔlɔi akwɛ kɛ amɛbii lɛ ahe esa kɛha hegbɛ nɛɛ lɛlɛŋ lo. Onukpai enyɔ baanyɛ amɛkɛ weku yitso lɛ agba nii ni he hiaa lɛ ahe sane koni amɛtsɔɔ kɛji abaanyɛ abu gbekɛ lɛ akɛ shiɛlɔ ni abaptisiko lɛ.—om pp. 99-100.
10 Ani shiɛlɔi ni yɔɔ nyɛ asafo lɛ shikpɔŋkuku lɛ mli lɛ ekomɛi nyɛɛɛ afee ekãa dɔŋŋ yɛ yijiemɔ afɔle ni akɛhaa Yehowa lɛ mli? (Heb. 13:15) Ekolɛ nijiaŋwujee loo shihilɛ mli yeyeeye-feemɔi eye mɛi komɛi ni ekpa shiɛmɔyaa lɛ anɔ, eyɛ mli akɛ amɛyaa nɔ amɛkɛ amɛhe kpɛtɛɔ Biblia mli jeŋba taomɔ nii ahe. Onukpai lɛ eko ni baaya ayasara amɛ yɛ naanyobɔɔ feemɔ mli lɛ baanyɛ akanya amɛ koni amɛsaa amɛkɛ asafo lɛ abɔ daa, ni yɛ be ni sa mli lɛ, amɛkɛ amɛhe awo shiɛmɔ nitsumɔ lɛ mli ekoŋŋ kɛ ekãa.
11 Mɔ Fɛɛ Mɔ ni Sa lɛ Baanyɛ Ana Nitsumɔ ni Yɔɔ Miishɛɛ Nɛɛ Mli Gbɛfaŋnɔ: Ani ewa kɛha nyɛ gbekɛbii lɛ loo mɛi ni eye kɛjɛ afii nyɔŋma kɛ etɛ kɛyaa lɛ ekomɛi akɛ nyɛaana shia-kɛ-shia shiɛmɔ nitsumɔ lɛ mli gbɛfaŋnɔ? Ni mɛi heei lɛ ni amɛ niiashikpamɔ yɛ shiɛmɔ nitsumɔ lɛ mli lɛ faaa kwraa lɛ hu? Nyɛbaana Maŋtsɛyeli Sane nɛɛ he nitsumɔ krɛdɛɛ lɛ akɛ eyɛ miishɛɛ waa! Nɔ ni he hiaa fe fɛɛ ji shiɛmɔ wiemɔ kuku.
Obaanyɛ okɛɛ nɔ ko tamɔ nɛkɛ:
◼ “Wɔkɛ shɛɛ sane ko ni he hiaa miiha yɛ shikpɔji 232 nɔ yɛ jeŋ fɛɛ yɛ nyɔŋ nɛɛ nɔ. Shɛɛ sane lɛ he hiaa ejaakɛ ekɛ yiŋtoi ni ma shi shiŋŋ ni baaha wɔhe wɔye akɛ naagbai ni wɔkɛkpeɔ ŋmɛnɛ lɛ he tsabaa yɛ lɛ haa wɔ. Wɔbaasumɔ ni oná bo diɛŋtsɛ onɔ̃.”
Aloo obaanyɛ oka enɛ okwɛ:
◼ “Aaafee mɛi akpekpei enumɔ ni kɛ amɛhe eha lɛ kɛ shɛɛ sane ko miiha yɛ wiemɔi nyɔŋmai abɔ mli yɛ nyɔŋ nɛɛ nɔ. Ato he gbɛjianɔ aha mɛi ni baasumɔ ni amɛna naagbai ni wɔkɛkpeɔ ŋmɛnɛ lɛ fɛɛ naagbee lɛ. Bo diɛŋtsɛ onɔ̃ lɛ nɛ.”
Shiɛmɔ wiemɔ kuku nɛɛ baahi aha bo:
◼ “Wɔmiiwo mɛi fɛɛ hewalɛ koni amɛkane shɛɛ sane ni he hiaa ni eyitso ji [kanemɔ Maŋtsɛyeli Sane lɛ saneyitso]. Kadimɔ nɔ ni ekɛɔ yɛ biɛ ni kɔɔ . . . [kanemɔ Maŋtsɛyeli Sane lɛ mli sane ni ahala] naagbai ni faa daa lɛ he yɛ baafa 2 lɛ. Wɔyɛ nɔmimaa akɛ obaana shɛɛ sane ni eba yɛ ebe naa pɛpɛɛpɛ nɛɛ mli sane ni eshwɛ lɛ kanemɔ he miishɛɛ. Bo onɔ̃ lɛ nɛ.”
12 Jiemɔ miishɛɛ kpo yɛ mɔ fɛɛ mɔ ni heɔ Maŋtsɛyeli Sane lɛ he. Wiemɔ blɛoo ni efee faŋŋ; ehe ehiaaa ni oye ohe oyai yɛ oshiɛmɔ wiemɔ lɛ mli. Wɔmiisumɔ ni wɔtsu wɔ shikpɔŋkuku fɛɛ mli nii koni wɔkwɛ ni aha mɛi fɛɛ ni naa Maŋtsɛyeli Sane lɛ kanemɔ he miishɛɛ lɛ ana lɛ diɛŋtsɛ enɔ̃. Kɛ mɔ ko bɛ shia lɛ, kadimɔ oshia-kɛ-shia kadimɔ wolo lɛ nɔ jogbaŋŋ koni onyɛ oku osɛɛ oya yɛ be ni sa mli ni okɛ Maŋtsɛyeli Sane lɛ ayaha shiatsɛ lɛ. Abaanyɛ akɛ Maŋtsɛyeli Sane lɛ atsu nii yɛ gbɛjegbɛ nɔ odaseyeli mli beni mɔ aŋkro lɛ etsɔɔ sane lɛ kanemɔ he miishɛɛ. Shi esaaa akɛ akɛhaa mɔ fɛɛ mɔ kɛkɛ tamɔ nɔ ni amɛji woji bibii ni aaja kɛkɛ. Shi moŋ, bɛŋkɛmɔ mɛi ni hoɔ lɛ, ni otsɔɔ bɔ ni shɛɛ sane ni awieɔ he lɛ he hiaa ha. Okɛ Maŋtsɛyeli Sane lɛ atsu nii yɛ trukaa odaseyeli mli, yɛ gbɛfaa mli, loo beni oyeɔ nanemɛi nitsulɔi odase beni akpa kɛha shwane niyeli. Mɛi ni nyɛɛɛ aje kpo loo ekolɛ amɛhe yeɔ lɛ baanyɛ ni amɛkɛha saralɔi, datrɛfoi kɛ helatsɛmɛi akwɛlɔi, nihɔɔlɔi, kɛ mɛi krokomɛi ni baa amɛ shia mli lɛ.
13 Sɛɛsaramɔi enyiɛ obaafee yɛ tafaa lɛ mli? Ŋwanejee ko bɛ he akɛ babaoo akɛni abaaya ayasara mɛi fɛɛ ni etsɔɔ Maŋtsɛyeli Sane lɛ he miishɛɛ lɛ ekoŋŋ hewɔ. Kɛ atee klɛŋklɛŋ saramɔ lɛ nɔ lɛ, nɔ ni hi fe fɛɛ ji ni awie Maŋtsɛyeli Sane lɛ pɛ he. No sɛɛ kɛ oku osɛɛ otee lɛ, wiemɔ bɔ ni Maŋtsɛyeli Sane lɛ mli shɛɛ sane lɛ eba yɛ ebe naa pɛpɛɛpɛ eha lɛ he sane fioo. Bo toi jogbaŋŋ be mli ni shiatsɛ lɛ tsɔɔ ejwɛŋmɔ yɛ nɔ ni ekane lɛ he lɛ. Saji ni eeewie yɛ he lɛ baaye ebua bo ni ole nɔ ni okɛbaaha yɛ woji tɛtrɛbii heei ni eba lɛ mli, kɛ ekolɛ bɔ ni obaasaa ohe kɛha sanegbai krokomɛi. Kɛ abo bo toi jogbaŋŋ yɛ sɛɛsaramɔ lɛ mli lɛ, bɔɔ mɔdɛŋ ni oje Biblia mli nikasemɔ shishi.—1 Kor. 3:6, 7.
14 “Nyɛ Mɔdɛŋbɔɔ lɛ Efeee Yaka”: Ani sɛɛnamɔ baaba nitsumɔ nɛɛ fɛɛ he? Paulo ha Korintobii lɛ le akɛ: “Nyɛ mɔdɛŋbɔɔ lɛ efeee yaka yɛ Nuntsɔ lɛ mli.” (1 Kor. 15:58) Ájɔɔ mɔdɛŋ ni wɔbɔɔ akɛ wɔja Maŋtsɛyeli Sane lɛ nɔ waa diɛŋtsɛ yɛ afii ni hoɔ lɛ mli. Gbalashihilɛ mli hefatalɔi ni miifa kɛmiiya tsu kroko ni mɔ ko bɛ mli lɛ mli lɛ na Maŋtsɛyeli Sane momo ko yɛ tso adeka ko mli. No pɛ ji nɔ ni ashi yɛ tsu muu lɛ fɛɛ mli. Beni amɛkane amɛgbe naa lɛ, amɛyana asafo ni yɔɔ jɛmɛ lɛ ni amɛbi ni akɛ amɛ afee Biblia mli nikasemɔ. Amɛbɔi kpeei lɛ fɛɛ eko yaa, ni sɛɛ mli lɛ amɛtsɔɔ akɛ amɛmiisumɔ ni abaptisi amɛ. Ekolɛ eko ni oshi lɛ kɛ yibiiwoo ni tamɔ nakai nɔŋŋ baaba!—Kwɛmɔ November 8, 1976 Awake! lɛ baafa 15 hu.
15 Nitsumɔ agbo ko ka wɔhiɛ. Oti ni ma wɔhiɛ kɛha asafo fɛɛ asafo ji ni etsu eshikpɔŋkuku lɛ mli nii dani May 14 aho loo yɛ nyɔŋ lɛ naagbee kɛ ehe miihia ni alɛɛ be lɛ mli kɛha Maŋtsɛyeli Sane lɛ jaa. Áto gbɛjianɔ koni daa gbɛgbalɔ fɛɛ daa gbɛgbalɔ kɛ gbɛgbalɔi awalɔ fɛɛ gbɛgbalɔi awalɔ ana Maŋtsɛyeli Sane lɛ ekomekomei 250. Asafoŋ shiɛlɔ fɛɛ shiɛlɔ baana kɛyashi ekomekomei 50. Esa akɛ shiɛlɔi kɛ gbɛgbalɔi ahe yibɔ ni amɛbaanyɛ amɛja lɛ pɛ, ni esa akɛ amɛkɛ dɛhiɛmɔ woji ni baashwɛ lɛ aku sɛɛ aba koni mɛi krokomɛi kɛtsu nii. Gbeekpamɔ kpakpa ni aaaba yɛ enɛ gbɛfaŋ lɛ baaha aja shɛɛ sane nɛɛ babaoo bɔ ni wɔɔnyɛ. Kɛ shikpɔŋkuku lɛ da, ni no hewɔ ni asafoi komɛi nyɛko amɛtsu amɛ shikpɔŋkuku lɛ mli nii amɛgbe naa yɛ May teŋgbɛ ni ekomɛi yɛ lolo lɛ, no lɛ ebaahi akɛ afɔ asafoi ni bɛŋkɛ lɛ nine koni amɛbaye amɛbua. Yɛ asafoi komɛi amli lɛ, abaanyɛ atsu hiamɔ nii ni yɔɔ lɛ he nii kɛ shiɛlɔi lɛ ha amɛnitsumɔ lɛ tee hiɛ, kɛtsɔ amɛhe ni amɛkɛ aaawo gbɛgbalɔi awalɔ nitsumɔ lɛ mli loo kɛtsɔ shiɛmɔ nitsumɔ lɛ ni amɛkɛ amɛhe aaawo mli kpitiokpitio nɔ.
16 Susuma muu fɛɛ mli ni ajɛɔ atuɔ he ahaa Yehowa lɛ he baahia kɛ wɔɔnyɛ wɔtsu wɔ nitsumɔ lɛ he nii wɔgbe naa. (Kol. 3:23) Wala he eba sane lɛ mli. Gbɔmɛi nyɛŋ amɛku amɛhiɛ amɛshwie nɔ ni je lɛŋ shihilɛi tsɔɔ ŋmɛnɛ lɛ nɔ. Be lɛ miitã. Esa akɛ amɛkpɛlɛ anɔkwale lɛ nɔ yɛ faŋŋ mli akɛ gbɔmɔ bɛ je nɛŋ naagbai lɛ ahe tsabaa. Nyɔŋmɔ yɔɔ tsabaa lɛ. Esa akɛ mɛi ni miisumɔ ni amɛna Nyɔŋmɔ dɛŋ jɔɔmɔ lɛ akpɛ amɛyiŋ, ni shishashaomɔ bɛ mli, ni ekɛ etaomɔ nii akpa gbee.
17 Ani wɔbaajɔɔ wɔhe, beni agbe tafaa krɛdɛɛ nɛɛ naa yɛ May 14 lɛ? Dabi! Wɔbaaya nɔ wɔtsu nii waa yɛ Paulo ŋaawoo ni jɛ mumɔŋ lɛ kɛ gbeekpamɔ naa.