Akɛ Babaoo Ehã—Aabi Babaoo Shi
1 Kwɛ bɔ ni aduro wɔ aha akɛ wɔyɛ anɔkwale lɛ! Akɛni wɔjɔɔ wɔhe nɔ wɔha Yehowa hewɔ lɛ, “atu sanekpakpa lɛ awo wɔdɛŋ.” (1 Tes. 2:4) Enɛ kɛ gbɛnaa nii agbo ko bafɔɔ wɔnɔ. Yesu kɛɛ: “Mɔ fɛɛ mɔ ni aŋɔ pii aha lɛ, pii aaatao yɛ edɛŋ.”—Luka 12:48b.
2 Kwɛ bɔ ni nakai wiemɔi lɛ ji anɔkwale ha! Akɛni akɛ Nyɔŋmɔ Wiemɔ lɛ he nilee ko, nyɛmimɛi anaanyobɔɔ ni yɔɔ naakpɛɛ, kɛ hiɛnɔkamɔ ni yɔɔ naakpɛɛ ko ejɔɔ wɔ fɛɛ hewɔ lɛ, abaanyɛ akɛɛ yɛ anɔkwale mli akɛ aŋɔ pii aha wɔ. Jwɛŋmɔ yɛ mli akɛ, aaakpa pii gbɛ hu kɛaato najiaŋ.
3 Na Taomɔ Nii lɛ Ahe Jwɛŋmɔ Kpakpa Daa: Mɛi komɛi emu sane naa akɛ aakpa babaoo tsɔ gbɛ kɛmiijɛ wɔdɛŋ. Akɛ Kristofoi asafo lɛ Yitso lɛ, Yesu Kristo tsɔɔ “nɔ ni he hiaa” koni eha etsu nii jogbaŋŋ. (Efes. 4:15, 16, NW) Emaa nɔ mi kɛhaa wɔ akɛ ‘epã lɛ teremɔ waaa, ni ejatsu lɛ etsiii.’ (Mat. 11:28-30) Ejɛɔ suɔmɔ mli enaa mli ehaa mɛi ni yɔɔ naatsii komɛi lɛ. (Luka 21:1-4) Kɛ wɔfee nɔ fɛɛ nɔ ni wɔɔnyɛ, ni bɔ ni efalɛ ji ha kɔɔɔ he eko lɛ, abaajɔɔ wɔ.—Kol. 3:23, 24.
4 Bi ohe akɛ, ‘Ani Maŋtsɛyeli he nibii yeɔ klɛŋklɛŋ gbɛhe yɛ mishihilɛ mli? Ani mikɛ mibe kɛ minibii miitsu nii yɛ gbɛ ni kɛ yijiemɔ baa Nyɔŋmɔ gbɛi lɛ, ní he baa sɛɛnamɔ kɛhaa mɛi krokomɛi lɛ nɔ? Ani minaa akɛ miishɛɛ ni minaa fe fɛɛ lɛ jɛɔ Yehowa sɔɔmɔ mli kɛbaa fe nɔ ni eeejɛ heloonaa nibii ni akɛ pɛsɛmkunya feemɔ naa mli ŋɔɔmɔ lɛ mli?’ Hetooi ni wɔkɛaaha sanebimɔi nɛɛ yɛ anɔkwayeli mli lɛ jieɔ yiŋtoi ni yɔɔ wɔtsuii amli lɛ kpo.—Luka 6:45.
5 Kaaha Aaka Bo Koni Ofee Efɔŋ: Be ko bako ni kaai kɛ nɔnyɛɛi tamɔ nɛkɛ eba yɛ pɛsɛmkunya, fufeemɔ, kɛ heloonaa akɔnɔi ni asumɔɔ lɛ ahe nɛkɛ pɛŋ. Wɔkɛ jeŋba he kaai, kɛ kaai ni baa koni wɔŋmɛɛ saji ahe wɔkɛsaa lɛ kpeɔ daa gbi. Bɔni afee ni wɔdamɔ kaai nɛɛ anaa yɛ omanyeyeli mli lɛ, esa akɛ wɔbi ni Yehowa aye abua wɔ. (Mat. 26:41) Ebaanyɛ etsɔ emumɔ lɛ nɔ eha wɔhe awa. (Yes. 40:29) Nyɔŋmɔ Wiemɔ lɛ kanemɔ daa gbi yeɔ ebuaa waa diɛŋtsɛ. (Lala 1:2, 3) Tsɔsemɔ ni mɔ kɛaaha ehe kɛ henɔyeli hu tsuɔ gbɛfaŋnɔ wulu ko he nii.—1 Kor. 9:27.
6 Efaaa akɛ wɔɔsumɔ ekpakpa kɛkɛ—esa akɛ wɔnyɛ̃ efɔŋ hu. (Lala 97:10) Enɛ tsɔɔ akɛ esaaa ni wɔnaa nakai nibii fɔji lɛ ahe suɔmɔ ko. Abɛi 6:16-19 toɔ nibii kpawo ni Yehowa nyɛ̃ɔ lɛ anaa eshwieɔ shi. Eka shi faŋŋ akɛ, esa akɛ mɔ ni sumɔɔ ni esa Yehowa hiɛ lɛ anyɛ̃ nakai nibii lɛ hu. Akɛni akɛ anɔkwale lɛ he anɔkwa nilee ejɔɔ wɔ hewɔ lɛ, esa akɛ wɔsumɔ akɛ wɔɔfee nii yɛ nakai nilee lɛ kɛ gbeekpamɔ naa, ni wɔha wɔjwɛŋmɔ ahi nibii kpakpai anɔ.
7 Ehi akɛ wɔɔsɔle wɔbi ni wɔna shihilɛi ni hi kɛha “babaoo feemɔ yɛ Nuntsɔ lɛ nitsumɔ lɛ mli.” (1 Kor. 15:58, NW) Mɛi pii ena akɛ gbɛjianɔ ni atoɔ ni deka bɛ mli kwraa yɛ Yehowa sɔɔmɔ mli lɛ ji hebuu nɔ̃ ejaakɛ be fioo pɛ ehaa anaa kɛhaa nibii ni he bɛ sɛɛnamɔ lɛ asɛɛdii.
8 Be mli ni asusu nɔ fɛɛ nɔ he lɛ, hiɛshikamɔ yɛ nɔ ni Yehowa biɔ kɛjɛɔ wɔdɛŋ lɛ he waa. (Mika 6:8) Wɔyɛ nɔ fɛɛ nɔ ni wɔɔdamɔ nɔ wɔha wɔhiɛ asɔ sɔɔmɔ hegbɛi fɛɛ ni wɔnaa lɛ. (Efes. 5:20) No hewɔ lɛ wɔyaa nɔ “wɔtsuɔ nii waa ni wɔmiaa wɔhiɛ” kɛ hekɛnɔfɔɔ akɛ wɔnyɔmɔwoo lɛ baafa fe nɔ fɛɛ nɔ ni abiɔ kɛjɛɔ wɔdɛŋ lɛ.—1 Tim. 4:10, NW.