Sanekpakpa lɛ Kɛhamɔ Kɛ Hehiamɔ Henumɔ
1 Wɔtsɔɔ bɔ ni wɔhiɛ sɔɔ Nyɔŋmɔ Maŋtsɛyeli he shiwoi lɛ waa kɛtsɔɔ Kristofoi ashiɛmɔ nitsumɔ ni wɔkɛ wɔhe woɔ mli kɛ wɔtsui fɛɛ lɛ nɔ. Ehe miihia ni wɔkɛ wɔhe awo nitsumɔ nɛɛ mli kɛ hehiamɔ henumɔ. Mɛni hewɔ? Ejaakɛ nitsulɔi lɛ faaa, nibii agbɛjianɔtoo fɔŋ nɛɛ naagbee miibɛŋkɛ, ni mɛi ni yɔɔ wɔ shikpɔŋkuku lɛ mli lɛ awala yɛ oshara mli. (Ezek. 3:19; Mat. 9:37, 38) Gbɛnaa nii ni tsii ni tamɔ nɛkɛ biɔ mɔdɛŋbɔɔ ni fe fɛɛ ni wɔkɛaatsu nii yɛ shiɛmɔ nitsumɔ lɛ mli. Mɛɛ gbɛ nɔ wɔɔtsɔ wɔjie hehiamɔ henumɔ kpo wɔtsɔɔ yɛ wɔ shiɛmɔ nitsumɔ lɛ he? Kɛ wɔto shiɛmɔ wiemɔi kpakpai ahe gbɛjianɔ kɛtsɔ hiɛ, kɛ wɔkɛ ekãa tao gbɔmɛi yɛ he fɛɛ he ni wɔɔna amɛ yɛ, kɛ wɔŋmala mɛi fɛɛ ni jieɔ miishɛɛ kpo amɛtsɔɔ lɛ ahe saji ni ja, kɛ wɔyadi nakai miishɛɛ lɛ sɛɛ amrɔ nɔŋŋ, kɛ agbɛnɛ, kɛ wɔkai akɛ akɛni mɛi awala he eba oshara hewɔ lɛ, esa akɛ wɔkɛ hiɛdɔɔ atsu wɔ shiɛmɔ nitsumɔ lɛ he nii lɛ. Gbɛtsɔɔmɔi ni nyiɛ sɛɛ nɛɛ baanyɛ aye abua yɛ be mli ni wɔsaa wɔhe koni wɔkɛ sanekpakpa lɛ aha kɛ hehiamɔ henumɔ yɛ February mli lɛ. Nɔ ni akɛbaatsu nii ji Kpojiemɔ—Enaagbee Kwraa lɛ Ebɛŋkɛ! wolo lɛ.
2 Obaanyɛ oje sanegbaa shishi kɛtsɔ naagbai komɛi ni akɛkpeɔ yɛ akutso lɛ mli lɛ tã ni oootsĩ kuku lɛ nɔ, no sɛɛ lɛ, obaanyɛ okɛɛ akɛ:
◼ “Mɛi babaoo heɔ yeɔ akɛ Nyɔŋmɔ ko yɛ, shi amɛsusuɔ akɛ: ‘Mɛɛ wɔsɛɛ shihilɛ etaoɔ ekɛha wɔ?’ Te obaaha hetoo oha tɛŋŋ? [Ŋmɛɛ gbɛ ni ewie.] Ani ole akɛ Biblia lɛ tsɔɔ Nyɔŋmɔ suɔmɔnaa nii ni eyɔɔ kɛha adesai kɛ nɔ ni efeɔ koni ekɛtsu he nii lɛ amli faŋŋ?” Gbelemɔ Kpojiemɔ Naagbee wolo lɛ baafa 301. Kanemɔ Kpojiemɔ 21:1 ni yɔɔ kuku 1 lɛ, no sɛɛ lɛ kanemɔ emlitsɔɔmɔ ni akɛha yɛ kuku 2 lɛ naagbee fã lɛ. Gbelemɔ mfoniri ni yɔɔ baafa 302 lɛ koni okɛtsɔɔ nɔ ni enɛ tsɔɔ kɛha wɔ wɔsɛɛ be. Kanemɔ Kpojiemɔ 21:4 yɛ kuku 6 lɛ mli. Okɛ wolo lɛ aha ni oto be ni hi oma shi koni oku osɛɛ oyatsa sanegbaa lɛ nɔ.
3 Obaanyɛ okɛ shiɛmɔ wiemɔ kuku nɛɛ atsa Kpojiemɔ 21:1, 4 he sane ni nyɛgba nyɛsɛɛ lɛ nɔ:
◼ “Beni mibasara bo nyɛsɛɛ lɛ, wɔgba shi ni Nyɔŋmɔ ewo akɛ ebaato shikpɔŋ nɔ shihilɛ hee ko he gbɛjianɔ eha adesai lɛ he sane. [Gbalamɔ jwɛŋmɔ kɛya Kpojiemɔ Naagbee wolo lɛ mli mfoniri ni yɔɔ baafa 302 lɛ nɔ ekoŋŋ.] Ani obaasumɔ ni ona akɛ oweku lɛ miina miishɛɛ shihilɛi amli ŋɔɔmɔ? [Ŋmɛɛ gbɛ ni ewie.] Sanebimɔ lɛ ji, Ani abaanyɛ akɛ he afɔ Nyɔŋmɔ shiwoi lɛ anɔ? Ofainɛ kadimɔ nɔ ni lɛ diɛŋtsɛ ekɛɔ.” Kanemɔ Kpojiemɔ 21:5, 6a yɛ baafa 303 lɛ kuku 8. Bi sane ni akala aha kuku 9 lɛ yɛ baafa 303, ni okane hetoo lɛ ofata kuku lɛ naagbee wiemɔi lɛ ahe. Tsĩi Biblia mli nikasemɔ ni aheee nɔ ko yɛ he lɛ tã otsɔɔ. Too gbɛjianɔ koni obafee otsɔɔ lɛ be kroko.
4 Akɛni naagbai ni faa ni adesai kɛkpeɔ lɛ gbaa mɛi babaoo naa hewɔ lɛ, obaanyɛ okɛɛ nɔ ko ni tamɔ nɛkɛ yɛ klɛŋklɛŋ saramɔ lɛ mli:
◼ “Etamɔ nɔ ni naagbai ni wɔkɛkpeɔ yɛ wɔ akutso lɛ mli lɛ gbaa mɔ fɛɛ mɔ naa. [Tsĩi fioo ko tã.] Maŋkwralɔi kɛ afii nyɔŋmai abɔ ewo shi akɛ amɛkɛ naagbai anaa tsabaa ni hiɔ shi daa baaba, ni amɛteŋ mɛi komɛi ebɔ mɔdɛŋ akɛ amɛaafee nakai. Mɛni osusuɔ akɛ no haa shihilɛi amli yaa nɔ ewoɔ wu lɛ? [Ŋmɛɛ gbɛ ni ewie.] Biblia lɛ kɛ sane mlitsɔɔmɔ ko ni mɛi pii susuko he pɛŋ lɛ haa. Kpojiemɔ wolo lɛ tsɔɔ ta ko ni ba yɛ ŋwɛi. Kwɛmɔ nɔ ni ba, taakɛ atsɔɔ yɛ Kpojiemɔ 12:9 lɛ.” Kanemɔ kuku lɛ, koni no sɛɛ lɛ ogbele Kpojiemɔ Naagbee wolo lɛ baafa 182. Okɛ mfoniri lɛ atsu nii koni okɛtsɔɔ bɔ ni Satan kɛ ehe ewo adesai asaji amli eha lɛ. Okɛ wolo lɛ aha kɛ miishɛɛ. Too gbɛjianɔ ni oku osɛɛ oba koni nyɛbagba bɔ ni Nyɔŋmɔ baafee ekɛ adesai anaagbai anaa tsabaa aba lɛ he sane.
5 Kɛ owo shi akɛ obaaku osɛɛ oba koni obatsɔɔ ŋmɛnɛŋmɛnɛ beaŋ naagbai anaa tsabaa ni Nyɔŋmɔ kɛbaaba lɛ mli lɛ, obaanyɛ oka gbɛ ni tamɔ nɛkɛ okwɛ:
◼ “Mibɔ mɔdɛŋ waa akɛ maba ekoŋŋ koni wɔnyɛ wɔtsa naagbai ni adesai kɛkpeɔ lɛ anaa tsabaa diɛŋtsɛ he sane ni wɔgba lɛ nɔ. Beni mibasara bo nyɛsɛɛ lɛ, wɔna akɛ Biblia lɛ yɔseɔ Satan Abonsam akɛ mɔ ni lakaa shikpɔŋ nɔ bii fɛɛ. Akɛni mumɔŋ bɔɔ nɔ ni he wa fe adesai ji lɛ hewɔ lɛ, ani osusuɔ akɛ gbɛ ko yɛ ni abaanyɛ atsɔ nɔ ajie hewalɛ ni ena yɛ mɛi anɔ lɛ kɛya? [Ŋmɛɛ gbɛ ni ewie.] Ofainɛ kadimɔ nɔ ni Biblia lɛ kɛɔ.” Kanemɔ Kpojiemɔ 20:1-3 koni otsɔɔ mli. Okɛ mfoniri ni yɔɔ Nilee wolo lɛ baafai 4-5 atsu nii, koni okɛtsɔɔ bɔ ni shihilɛi baatamɔ aha kɛ́ hewalɛ ni Satan naa yɛ mɔ nɔ lɛ bɛ mli. Kɛɛmɔ lɛ akɛ, okɛ lɛ baafee Biblia mli nikasemɔ, ni obɔ mɔdɛŋ oje shishi amrɔ nɔŋŋ.
6 Akɛni mɛi pii yɔɔ shihilɛi ni ebɔle amɛhe kɛkpe lɛ ahe miishɛɛ hewɔ lɛ, obaanyɛ okɛɛ nɔ ko tamɔ nɛkɛ koni okɛje sanegbaa shishi:
◼ “Nɔ ni wɔna ji akɛ, etamɔ nɔ ni mɔ fɛɛ mɔ ehao yɛ muji ni akɛwoɔ wɔ kɔɔyɔɔ, nu, kɛ niyenii amli lɛ hewɔ. Yɛ maji komɛi amli lɛ, bɔ ni shihilɛi ni ebɔle mɛi ahe kɛkpe lɛ yɔɔ ha lɛ miiwo wala he gbeyei momo. Akɛni Nyɔŋmɔ ji shikpɔŋ lɛ Bɔlɔ hewɔ lɛ, mɛni osusuɔ akɛ ebaafee yɛ enɛ he? [Ŋmɛɛ gbɛ ni ewie.] Biblia lɛ kɛɛ akɛ Nyɔŋmɔ baaha wɔbu bɔ ni wɔkɛ shibɔlemɔ ŋulami lɛ tsuɔ nii wɔhaa lɛ he akɔntaa. [Kanemɔ Kpojiemɔ 11:18b.] Ŋɔɔ lɛ akɛ oyɛ shikpɔŋ ko ni mujiwoo ko kwraa bɛ mli lɛ nɔ!” Tsɔɔmɔ paradeiso he shiwoo ni Nyɔŋmɔ kɛha, taakɛ atsɔɔ yɛ Kpojiemɔ 21:3, 4 lɛ. Tsɔɔmɔ mfoniri ni yɔɔ Kpojiemɔ Naagbee wolo lɛ baafa 302 lɛ. Okɛ wolo lɛ aha ni oto gbɛjianɔ ni oba ekoŋŋ.
7 Kɛ ooku osɛɛ oya mɔ ni jie miishɛɛ kpo yɛ Paradeiso shikpɔŋ lɛ he lɛ ŋɔɔ lɛ, obaanyɛ okɛɛ akɛ:
◼ “Beni mibasara bo nyɛsɛɛ lɛ, wɔkpɛ̃lɛ nɔ akɛ, kɛ́ akɛ shikpɔŋ ni áfite nɔ lɛ he tsabaa baaba lɛ, no lɛ esa akɛ Nyɔŋmɔ kɛ ehe awo adesa saji amli. Shi, sanebimɔ lɛ ji, Mɛni esa akɛ wɔfee koni abaa wɔ yi kɛbote jalɛ jeŋ hee ni Nyɔŋmɔ kɛbaaba lɛ mli?” Kanemɔ Yohane 17:3. Ha shiatsɛ lɛ aná wɔ Biblia mli nikasemɔ ni wɔheee nɔ ko yɛ he lɛ he sɛɛ, koni enine ashɛ nilee krɛdɛɛ ni tamɔ nɛkɛ nɔ.
8 Mɛɛ hegbɛ eji nɛkɛ, ákɛ akɛ wɔ aaatsu nii akɛ ŋmɛnɛŋmɛnɛ beaŋ nikpamɔ lɛ he nitsulɔi, koni wɔtsu shiɛmɔ nitsumɔ ni hereɔ mɔ yiwala lɛ he nii! Eba akɛ wɔ fɛɛ wɔkɛ hiɛdɔɔ aaatsu nii koni wɔkɛ hehiamɔ henumɔ atsu sanekpakpa lɛ kɛhamɔ he nii, ‘yɛ be mli ni wɔle akɛ wɔ mɔdɛŋbɔɔ lɛ efeee yaka.’—1 Kor. 15:58.