Tafãa Krɛdɛɛ Kɛjɛ October 16 Kɛyashi November 12!

¹ Maŋtsɛyeli Sane ni Ji 37 ni abaaja yɛ jeŋ fɛɛ kɛjɛ wɔsɛɛ nyɔŋ lɛ nɔ kɛyaa lɛ yitso ji “Apasa Jamɔ Naagbee Ebɛŋkɛ!” Wɔbaaja Buu-Mɔɔ kɛ Awake! woji tɛtrɛbii lɛ yɛ klɛŋklɛŋ otsii enyɔ ni yɔɔ October mli lɛ mli. Kɛkɛ lɛ, kɛjɛ Ju October 16 kɛyashi Hɔgbaa November 12 lɛ, wɔbaatsu nii waa kɛja Maŋtsɛyeli Sane ni Ji 37 lɛ. Yɛ otsii lɛ anaagbee yɛ tafãa be lɛ mli lɛ, wɔkɛ woji tɛtrɛbii heei ni eba lɛ baafata Maŋtsɛyeli Sane ni Ji 37 lɛ he kɛha.

² Namɛi Baanyɛ Aná Mli Gbɛfaŋnɔ: Sanekpakpa shiɛlɔi fɛɛ ni buɔ amɛshiɛmɔyaa he akɔntaa daa nyɔŋ nɔ lɛ baasumɔ ni amɛkɛ amɛhe awo tafãa nɛɛ mli kɛmɔ shi. Mɛi komɛi baanyɛ amɛkɛ amɛhe awo gbɛgbalɔi awamɔ nitsumɔ lɛ mli. Ani oyɛ bii loo Biblia kaselɔi ní miiya amɛhiɛ babaoo yɛ mumɔŋ? Okɛ amɛ agba sane koni amɛyana asafoŋ onukpai lɛ kɛkwɛ akɛ abaanyɛ akpɛlɛ amɛnɔ akɛ shiɛlɔi ni abaptisiko amɛ lo. Esa akɛ onukpai lɛ aŋɔ hegbɛ lɛ koni amɛkɛ mɛi ni ekpa shiɛmɔyaa lɛ agba sane kɛwo amɛ hewalɛ ni amɛkɛ amɛhe awo tafãa lɛ mli, amɛbaanyɛ amɛkɛ shiɛlɔi ni he ekwakwao lɛ atsu nii.

³ Akɛ Maŋtsɛyeli Sane ni Ji 37 lɛ saŋŋ miimaje asafoi fɛɛ, ni kɛ́ hooo kwraa lɛ, shiɛlɔi kɛ daa gbɛgbalɔi lɛ ateŋ mɔ fɛɛ mɔ nine baashɛ ekomekomei 50 nɔ. Mɛi ni yɔɔ wiemɔ lɛ he miishɛɛ ni amɛbɔiko shiɛmɔyaa lɛ anine baanyɛ ashɛ enumɔ nɔ koni amɛja amɛha amɛwekumɛi kɛ nanemɛi. Esa akɛ mɔ fɛɛ mɔ akadi yibɔ ni ekɛbaaha lɛ koni kɛ́ ekɛ eshiɛmɔyaa he akɔntaabuu kɛha October kɛ November miiha lɛ, eŋmala yɛ akɔntaabuu wolo lɛ sɛɛ. Nyɛsafo lɛ woloŋmalɔ lɛ baabu yibɔ ni nyɛkɛha lɛ naa ni ekɛmaje nitsumɔhe nine lɛ yɛ nyɔji enyɔ lɛ eko fɛɛ eko naagbee. Kɛ́ tafãa lɛ ba naagbee lɛ, abaanyɛ akɛ Maŋtsɛyeli Sane ni baashwɛ lɛ atsu nii yɛ shiɛmɔ nitsumɔ lɛ fãi lɛ eko fɛɛ eko mli.

⁴ Nɔ ni Obaakɛɛ: Ha ohiɛkpamɔ wiemɔ lɛ afee kuku, ejaakɛ no baaha onyɛ oja babaoo. Obaanyɛ okɛɛ akɛ: “Mikɛ wɔnyɛmimɛi ni yɔɔ jeŋ fɛɛ lɛ miija woji ni shɛɛ sane ni he hiaa waa yɔɔ mli nɛɛ wɔmiiha mɛi fɛɛ. Onɔ̃ nɛ. Ofainɛ bɔɔ mɔdɛŋ ni okane.” Ebaafee nɔ ni hi jogbaŋŋ akɛ okahiɛ shiɛmɔ baagi. Bɔɔ mɔdɛŋ ni oŋmala mɛi fɛɛ ni baaná shɛɛ sane lɛ he miishɛɛ kɛ hei ni amɛyɔɔ lɛ ahe saji jogbaŋŋ oshwie shi.

⁵ Bɔ ni Ooofee Otsu Oshikpɔŋkuku lɛ Mli Nii Kɛmɔ Shi: Bɔɔ mɔdɛŋ akɛ obaaja Maŋtsɛyeli Sane lɛ titri yɛ shĩa kɛ shĩa kɛ shikpɔŋkukuji ni nitsumɔhei yɔɔ mli lɛ amli moŋ fe nɔ ni oooja yɛ gbɛjegbɛi ahe. Kadimɔ tsũi ni oyanaaa mɔ ko yɛ mli lɛ koni oya jɛi ekoŋŋ be kroko mli yɛ nakai gbi lɛ nɔ nɔŋŋ aloo yɛ gbi kroko nɔ yɛ otsi lɛ mli. Kɛjɛ Ju, November 6 lɛ kɛyaa lɛ, abaanyɛ ashi wolo lɛ ekome awo mɛi ni ayanaaa amɛ yɛ shĩa lɛ ashinaai ashishi. Shi kɛlɛ, kɛji nyɛsafo lɛ shikpɔŋkuku lɛ da ni nyɛnyɛŋ nyɛtsu fɛɛ mli nii yɛ be ni ato kɛha tafãa lɛ mli lɛ, no lɛ onukpai lɛ baanyɛ akpɛ amɛyiŋ koni ashi Maŋtsɛyeli Sane lɛ eko awo mɛi ni ayanaaa amɛ yɛ shĩa lɛ ashinaai ashishi yɛ tafãa be lɛ mli fɛɛ.

⁶ “Babilon Kpeteŋkpele lɛ” hiɛkpatamɔ ebɛŋkɛ kpaakpa. Esa akɛ mɛi ni yɔɔ mli lɛ aje mli dani akpata hiɛ kwraa. (Kpoj. 14:8; 18:8) Bɔɔ mɔdɛŋ ni oto gbɛjianɔ amrɔ nɛɛ koni onyɛ okɛ ohe awo ta ni abaafã yɛ jeŋ fɛɛ ni akɛha gbɔmɛi fɛɛ ale akɛ apasa jamɔ naagbee ebɛŋkɛ lɛ mli kɛmɔ shi!