Maŋtsɛyeli Sane Krɛdɛɛ ko Kɛha Mɔ Fɛɛ Mɔ

¹ Wɔbɔi Maŋtsɛyeli Sane krɛdɛɛ ni etee mɛi ni yɔɔ hei sɔrɔtoi ni ekɔɔ amɛhe lɛ amiishɛɛ shi lɛ babaoo jaa kɛjɛ April 24! Jeee akɛ emli shɛɛ sane lɛ eba yɛ ebe naa kɛkɛ shi eba yɛ hiamɔ be mli hu. Shiɛlɔi ni yɔɔ asafoi fɛɛ mli lɛ kɛ amɛtsui fɛɛ efi sɛɛ, ni amɛmiisumɔ ni amɛkɛ shɛɛ sane nɛɛ awo mɛi akpei abɔ dɛŋ. Ani okɛ ohe miiwo mli kɛmiimɔ shi?

² Akɛ Maŋtsɛyeli Sane lɛ eko etee asafo fɛɛ asafo mli, ni akɛ aaafee 50 ha shiɛlɔ fɛɛ shiɛlɔ kɛ 250 kɛha gbɛgbalɔ fɛɛ gbɛgbalɔ. Enyiɛ onyɛ oja? Kɛ onyɛko ofee taakɛ ohiɛ ka nɔ lɛ, ani osusu gbɛi ni oootsɔ nɔ ofee babaoo lɛ he, dani agbe ejaa naa yɛ May 14? Ni ohe ni okɛ aaawo gbɛgbalɔi awalɔ nitsumɔ lɛ mli lɛ hu? Ani obaanyɛ ona kpeei krokomɛi ni afeɔ kɛha shiɛmɔyaa yɛ otsi lɛ mli lɛ he sɛɛ, taakɛ afeɔ kɛhaa gbɛkɛnaashi odaseyeli lɛ?

³ Onukpai lɛ kɛ mɔdɛŋbɔɔ baakwɛ akɛ aatsu shikpɔŋkuku lɛ mli nii jogbaŋŋ lo. Kɛ asafo ni akɛwo edɛŋ lɛ nyɛŋ atsu hei komɛi amli nii lɛ, onukpai lɛ ayana asafoi ni bɛŋkɛ amɛ lɛ kɛbi yelikɛbuamɔ. Esa akɛ mɔdɛŋ ni wɔɔbɔ kɛ wɔtsui fɛɛ, ni ekomefeemɔ kpakpa ni aaakã asafoi lɛ ateŋ fata he lɛ anyɛ aha atsu nitsumɔ lɛ agbe naa.

⁴ Ekolɛ ona nitsumɔ nɛɛ mli miishɛɛ babaoo ejaakɛ mɛi pii ni shiɛlɔi heei kɛ gbekɛbii fata he lɛ enyɛ amɛkɛ amɛhe ewo mli. Ayɛ hiɛnɔkamɔ akɛ, nɛkɛ mlifilimɔ mumɔ nɛɛ baaya nɔ, koni ewo mɔ fɛɛ mɔ hewalɛ ni enyiɛ sɛɛ kɛtsɔ mɛi ni kɛ miishɛɛ here nɔ lɛ ni aaaku sɛɛ ayasara amɛ lɛ nɔ. Awo wɔ hewalɛ koni wɔŋmala shia-kɛ-shia kadimɔ woji lɛ anɔ nii jogbaŋŋ, ni wɔkadi mɛi ni tsɔɔ miishɛɛ lɛ. May naagbee gbɛ lɛ baafee be kpakpa ni akɛaatsu sɛɛsaramɔ he nii titri koni akɛje nikasemɔ heei ashishi.

⁵ Mɛni wɔbaanyɛ wɔkɛɛ beni wɔtee eŋɔɔ ekoŋŋ lɛ? Ekolɛ obaana akɛ eeefee nɔ ni mɔɔ shi akɛ oookɛɛ akɛ: “Ekolɛ obaakai sane ni akala ni mishi miha bo nyɛsɛɛ nɛɛ lɛ; mihiɛ ka nɔ akɛ ona hegbɛ okane ni osusu sane lɛ he saŋŋ. Eka shi faŋŋ akɛ emli shɛɛ sane lɛ etee sanegbaa babaoo shi yɛ wɔ akutso lɛ mli, akɛni ewieɔ saji ni he hiaa ni adesai fɛɛ kɛkpeɔ he lɛ hewɔ.” Tsɔɔmɔ saji ni yɔɔ baafa ni ji enyɔ ni teeɔ sane hesusumɔ shi lɛ ekomɛi, koni obi akɛ: “Mɛni osusuɔ akɛ ehe miihia ni wɔfee koni wɔkɛna nɔmimaa akɛ wɔsaa wɔhe kɛha nɔ ni baaba wɔsɛɛ?” Ŋmɛɛ gbɛ ni ewie. Kɛ atsɔɔ miishɛɛ lɛ, nyɛgbaa otii krokomɛi ni yɔɔ Maŋtsɛyeli Sane lɛ baafai 2-4 lɛ he sane, ni obi ni nyɛfee Biblia mli nikasemɔ, loo kɛ no ehiŋ feemɔ lɛ, okɛ woji tɛtrɛbii heei aha.

⁶ Kɛ oyatsu nii yɛ asafo kroko shikpɔŋkuku mli lɛ, kwɛmɔ ni okɛ mɛi fɛɛ ni yɔɔ he miishɛɛ ni oyana lɛ agbɛi ayaha koni nakai asafo lɛ mli shiɛlɔi lɛ anyɛ afee sɛɛsaramɔi. Yɛ nakai gbɛ nɔ nɔŋŋ lɛ, kɛ abio ni osaa oyasara mɔ ko ekoŋŋ lɛ, kwɛmɔ ni oyatsu he nii amrɔ nɔŋŋ.

⁷ Maŋtsɛyeli Sane nɛɛ jaa yɛ gbɛ krɛdɛɛ nɔ lɛ ekanya mɛi, ni etsirɛ wɔ fɛɛ koni wɔha mɔdɛŋ ni wɔbɔɔ yɛ Maŋtsɛyeli shiɛmɔ nitsumɔ lɛ mli lɛ mli awa kɛya hiɛ. Wɔbaanyɛ wɔna nɔmimaa akɛ ebaaye omanye jogbaŋŋ, ni ebaaha mɛi ni yɔɔ he fɛɛ he lɛ ale Yehowa gbɛi kpeteŋkpele lɛ kɛ eyiŋtoo lɛ babaoo. (Yes. 12:4, 5) Kɛ wɔnyɛ wɔtsu babaoo lɛ, ebaaha wɔ miishɛɛ lɛ afa babaoo hu.—Lala 126:3.