Dii Miishɛɛ lɛ Fɛɛ Sɛɛ Koni Mɛi Krokomɛi Ana He Sɛɛ
1 Mɛni pɔtɛɛ yeɔ buaa wɔ ni wɔleɔ kɛji esa akɛ wɔku sɛɛ wɔyasara mɔ ko loo wɔkaya lɛ? No ji miishɛɛ! Be fɛɛ be ni mɔ ko baatsɔɔ miishɛɛ fioo ko po yɛ Maŋtsɛyeli shɛɛ sane lɛ he lɛ, wɔmiisumɔ ni wɔfee bɔ fɛɛ bɔ ni wɔɔnyɛ koni nakai mɔ lɛ ana he sɛɛ. No hewɔ lɛ wɔfeɔ sɛɛsaramɔi kɛ yiŋtoo akɛ wɔɔtee mɔ lɛ miishɛɛ shi ni wɔfee shia Biblia mli nikasemɔ. Enɛ ji oti ni ma wɔhiɛ kɛ́ wɔshiii wolo ko po. Mɛɛ gbɛ nɔ abaatsɔ afee enɛ?
2 Kɛ sane ni nyɛgba nyɛsɛɛ ko lɛ kɔɔ bɔ ni gbalashihilɛ mli naagbai efa babaoo eha lɛ he ni oshi “Obaanyɛ Ohi Shi” wolo lɛ, obaanyɛ oje osanegbaa lɛ shishi nɛkɛ:
◼ “Beni mibasara bo nyɛsɛɛ lɛ, wɔwie gbalashihilɛ kɛ Biblia mli ŋaawoo kpakpa ni baanyɛ aye abua wɔ fɛɛ koni wɔna miishɛɛ babaoo lɛ he. Ani ejeee anɔkwale akɛ naagbai baa yɛ wekui ni yaa nɔ jogbaŋŋ fe fɛɛ lɛ po mli yɛ bei komɛi amli? [Ŋmɛɛ gbɛ ni ewie.] Biblia lɛ kɛ ŋaawoo ni hi fe fɛɛ ni baanyɛ aye abua ni wɔsaa naagbai ni yaa nɔ yɛ wekui amli lɛ haa. Weku lɛ baanyɛ ana jɔɔmɔ kɛtsɔ Biblia lɛ kasemɔ kutuu nɔ.” Gbelemɔ baafa 246, ni ogba kuku 23 lɛ he sane. Kanemɔ Yohane 17:3, ni okɛ yelikɛbuamɔ ni baaha weku lɛ aje Biblia mli nikasemɔ shishi yɛ shia lɛ aha.
3 Kɛ owie gbekɛbii kɛ bɔ ni ehe hiaa ni amɛna tsɔsemɔ lɛ he lɛ, obaanyɛ otsa sanegbaa lɛ nɔ yɛ nɛkɛ gbɛ nɔ:
◼ “Nyɛsɛɛ ko lɛ wɔwie mumɔŋ tsɔsemɔ ni he hiaa gbekɛbii kɛ bɔ ni fɔlɔi baanyɛ aye abua amɛ lɛ he. Fɔlɔi babaoo ni mikɛ amɛ gba sane lɛ ehao yɛ obalahii kɛ obalayei bibii pii ni yɔɔ ŋmɛnɛ lɛ ajeŋba fɔŋ lɛ hewɔ. Mɛni osusuɔ yɛ . . . ? [Tsɔɔmɔ nɔkwɛmɔ nɔ ko ni kɔɔ obalahii kɛ obalayei bibii ajeŋba fɔŋ lɛ he, ní yaa nɔ yɛ nyɛ akutso lɛ mli. Ŋmɛɛ gbɛ ni ewie.] Ha matsɔɔ bo ŋaawoi kpakpai ni akɛha yɛ Biblia mli lɛ ekomɛi.” Gbelemɔ Obaanyɛ Ohi Shi wolo lɛ baafa 246 lɛ kuku 22, ni ogba oti titri lɛ he sane, ni okane Efesobii 6:4. Tsɔɔmɔ mli akɛ gbekɛbii pii yɛ ni miitao tsɔsemɔ kɛ gbɛtsɔɔmɔ lɛlɛŋ. Kɛ fɔlɔi kɛ ekãa tsu enɛ he nii lɛ, gbekɛbii lɛ naa miishɛɛ waa ni amɛjieɔ bulɛ kpo yɛ amɛjeŋba mli. Tsɔɔmɔ bɔ ni wɔfeɔ wɔkɛ wɔbii kaseɔ Biblia lɛ wɔhaa lɛ mli.
4 Kɛ Paradeiso shikpɔŋ lɛ ji osanegbaa lɛ yitso lɛ, no lɛ obaanyɛ okɛɛ enɛ ni okɛtee miishɛɛ lɛ shi:
◼ “Wɔ́kwɛ mfonirii komɛi yɛ wolo nɛɛ mli ni tsɔɔ wɔ bɔ ni shikpɔŋ lɛ baatamɔ aha beni Nyɔŋmɔ haa etsɔɔ paradeiso lɛ. Etsɔɔŋ nɔ ko tsɔ kɛhaŋ wɔ kɛji akɛ wɔkɛ wɔsuɔlɔi naŋ mli ŋɔɔmɔ. Ani oheee oyeee?” Ŋmɛɛ gbɛ ni ewie. No sɛɛ lɛ gbelemɔ Obaanyɛ Ohi Shi wolo lɛ baafa 162. Kanemɔ Kpojiemɔ 21:3, 4, ni otsɔɔ bɔ ni wɔsuɔlɔi lɛ baanyɛ ahi wɔmasɛi daa. Kɛ ebo toi jogbaŋŋ lɛ, kanemɔ Yohane 5:28, 29 ni otsɔɔ akɛ gbohii lɛ baaba wala mli ekoŋŋ. Tsɔɔmɔ lɛ wolo lɛ sɛɛ ni okɛɛ akɛ: “Eji anɔkwale lɛlɛŋ—wɔbaanyɛ wɔhi shi kɛya naanɔ yɛ Paradeiso shikpɔŋ nɔ!” Too saramɔ kroko he gbɛjianɔ ni ogba nɔ hewɔ ni wɔle akɛ ebɛŋkɛ lɛ he sane.
5 Yiŋtoo titri ni yɔɔ sɛɛsaramɔ feemɔ sɛɛ ji ni aye abua mɛi ni yɔɔ he miishɛɛ lɛ ni amɛna Maŋtsɛyeli shɛɛ sane lɛ he sɛɛ. Ehe miihia ni akanya mɛi babaoo koni atee amɛkɔnɔ shi kɛha mumɔŋ nibii. Gbalamɔ amɛ jwɛŋmɔ kɛya otii pɔtɛɛi ni he yɔɔ sɛɛnamɔ jogbaŋŋ lɛ nɔ yɛ wolo lɛ mli, ni oma bɔ ni ebaanyɛ eye ebua ni amɛnu Biblia lɛ shishi jogbaŋŋ lɛ nɔ mi. Sɛɛsaramɔi ni tsuɔ otii nɛɛ ahe nii lɛ baaye abua mɛi krokomɛi ni amɛna he sɛɛ yɛ gbɛ ni hi fe fɛɛ nɔ.