Ye Obua ni Mɛi Krokomɛi Ana He Sɛɛ
1 Yehowa woɔ wɔ shi akɛ eeetsɔɔ wɔ nɔ ni he hiaa akɛ wɔɔle. Emaa nɔ mi ehaa wɔ yɛ Lala 32:8 akɛ: “Magbele ojwɛŋmɔ mli ni matsɔɔo gbɛ ní onyiɛ nɔ; mawoo ŋaa, mihiŋmɛi kã ohe.” Nɔmimaa ni akɛhaa nɛɛ he yɛ sɛɛnamɔ waa diɛŋtsɛ kɛha wɔ. Wɔmiisumɔ ni wɔtsɔ gbɛ ni pɛsɛmkunya bɛ mli lɛ nɔ wɔtsɔɔ bɔ ni mɛi krokomɛi aaafee ni amɛna he sɛɛ kɛtsɔ Biblia mli ŋaawoo ni nilee yɔɔ mli ni amɛaabo toi lɛ nɔ. (Yes. 48:17) Wɔbaanyɛ wɔfee enɛ kɛtsɔ Obaanyɛ Ohi Shi wolo lɛ kɛhamɔ nɔ yɛ September mli. Be mli ni wɔkɛ wɔshiɛmɔ wiemɔi haa lɛ, gbɛi sɔrɔtoi yɛ ni wɔbaanyɛ wɔtsɔ nɔ wɔtsɔɔ sɛɛnamɔ diɛŋtsɛ ni yɔɔ Biblia lɛ he.
2 Akɛni gbalashihilɛ mli naagbai efa babaoo ŋmɛnɛ hewɔ lɛ, ekolɛ obaasumɔ ni owie sane nɛɛ he kɛjɛ “Obaanyɛ Ohi Shi” wolo lɛ mli akɛ:
◼ “Mɛi ni mikɛgba sane lɛ ateŋ mɛi babaoo miisusu bɔ ni gbalashihilɛ ni miishɛɛ bɛ mli kɛ bɔ ni gbalamlitsemɔ efa babaoo tsɔ lɛ he waa. Te onuɔ naagba nɛɛ he ohaa tɛŋŋ? [Ŋmɛɛ gbɛ ni ewie.] Mɛi babaoo nyɛɛɛ ana nibii titrii ni kɛ enɛɛmɛi baa lɛ. Kɛ gbalashihilɛ mli hefatalɔi bɔ mɔdɛŋ yɛ anɔkwayeli mli lɛ, jeee akɛ amɛbaabaa amɛ gbalashihilɛ lɛ yi kɛkɛ, shi moŋ amɛbaanyɛ amɛna anɔkwa miishɛɛ hu. Gbɛ ni abaatsɔ nɔ aye omanye lɛ baajɛ Biblia mli ŋaawoo ni akɛaatsu nii lɛ mli.” Kanemɔ Efesobii 5:28, 29, 33. Gbelemɔ baafa 243, ni nyɛgba kukuji 16 kɛ 17 lɛ he sane, koni okɛ wolo lɛ aha.
3 Ehe miihia ni gbekɛbii ana be kɛ tsɔsemɔ ni he baa sɛɛnamɔ lɛ kɛjɛ amɛfɔlɔi aŋɔɔ. Beni owieɔ “Obaanyɛ Ohi Shi” wolo lɛ he lɛ, obaanyɛ okɛɛ akɛ:
◼ “Wɔ fɛɛ wɔmiisusu obalahii kɛ obalayei bibii ni wɔyɔɔ lɛ awɔsɛɛ be mli hilɛ-kɛhamɔ he waa. Mɛni osusuɔ akɛ no ji gbɛ ni hi fe fɛɛ ni fɔlɔi baanyɛ atsɔ nɔ aye abua amɛbii koni amɛna wɔsɛɛ be ni yɔɔ shweshweeshwe? [Ŋmɛɛ gbɛ ni ewie.] Bó Biblia mli abɛ ni aŋma aaafee afii 3,000 ni eho nɛɛ toi. [Kanemɔ Abɛi 22:6.] Yɛ be mli ni wɔbii lɛ baanyɛ ana nitsɔɔmɔ ni amɛnine shɛɔ nɔ yɛ skul lɛ he sɛɛ babaoo diɛŋtsɛ lɛ, amɛ fɔlɔi ji mɛi ni kɛ tsɔsemɔ ni he baa sɛɛnamɔ fe fɛɛ lɛ haa amɛ. Ebiɔ be, hiɛ ni aaaha ehi amɛnɔ, kɛ suɔmɔ, shi emli sɛɛnamɔ lɛ fa babaoo diɛŋtsɛ.” Gbelemɔ baafa 245, ni ogba kukuji 20 kɛ 21 lɛ mli sane, koni otsɔɔ bɔ ni abaanyɛ akɛ wolo lɛ atsu nii ni akɛje weku Biblia mli nikasemɔ shishi.
4 Ekolɛ obaasumɔ ni okɛ “Obaanyɛ Ohi Shi” wolo lɛ aha kɛtsɔ bɔ ni baafee ni shikpɔŋ lɛ atsɔ paradeiso lɛ tsɔɔmɔ nɔ:
◼ “Miheɔ miyeɔ akɛ osusuɔ bɔ ni oshihilɛ baatamɔ aha yɛ wɔsɛɛ be mli lɛ he. Yɛ Nuntsɔ lɛ Sɔlemɔ lɛ mli lɛ, Yesu tsɔɔ wɔ akɛ wɔsɔle ni afee Nyɔŋmɔ suɔmɔnaa nii yɛ shikpɔŋ nɔ taakɛ afeɔ yɛ ŋwɛi lɛ. Te shikpɔŋ lɛ baatamɔ aha tɛŋŋ beni enɛ baa mli lɛ? [Ŋmɛɛ gbɛ ni ewie.] Naa paradeiso je lɛ he mfoniri ko ni nitɛŋlɔ ko efee. [Tsɔɔmɔ mfoniri ni yɔɔ baafai 12 kɛ 13 lɛ. No sɛɛ lɛ kanemɔ Yesaia 11:6-9 ni yɔɔ kuku 12 lɛ mli lɛ.] Ani ebɛ naakpɛɛ akɛ aaahi je ni tamɔ nɛkɛ mli? Wolo nɛɛ baatsɔɔ bɔ ni bo kɛ oweku lɛ baanyɛ ahi paradeiso ni tamɔ nɛkɛ mli.”
5 Oshiɛmɔ wiemɔ ni oooto he gbɛjianɔ kɛtsɔ hiɛ lɛ ji gbɛ titri ni oootsɔ nɔ otsɔɔ bɔ ni ooofee oye omanye oha yɛ shinaa naa. Dani oootswa shinaa lɛ, kwɛmɔ ni ona nɔmimaa akɛ oyɛ sane pɔtɛɛ ko ni ooowie yɛ Ŋmalɛ mli sane ko ni aaasusu he lɛ he. Agbɛnɛ hu, ha sane ni ooowie he kuku yɛ nɔ ko ni yɔɔ miishɛɛ lɛ he yɛ wolo tɛtrɛɛ lɛ loo dɛhiɛmɔ wolo ni oto gbɛjianɔ akɛ okɛbaaha, yɛ be mli ni aheee wolo lɛ ahi ojwɛŋmɔ mli. Okɛ hegbɛi sɔrɔtoi fɛɛ ni ona kɛha Maŋtsɛyeli lɛ he anɔkwale wui lɛ dumɔ yɛ September lɛ atsu nii kɛmɔ shi. (Jaj. 11:6) Obaaye obua mɛi krokomɛi ni amɛnine ashɛ sɛɛnamɔi ni baahi shi daa lɛ anɔ.