Na Teokrase Sɔɔmɔ Skul Kɛha 1996 lɛ He Sɛɛ—Fa 1
1 Ani okane gbɛtsɔɔmɔi ni akɛha ni fata “Theocratic Ministry School Schedule for 1996” lɛ he lɛ? Ani oyɔse tsakemɔi komɛi? Kɛjɛ January aahu kɛyashi April lɛ, Nifeemɔ ni Ji 3 lɛ baadamɔ Reasoning wolo lɛ nɔ, ni kɛjɛ May kɛyashi December lɛ, ebaadamɔ Nilee wolo ni ajie lɛ kpo ehee lɛ nɔ. Daa otsi lɛ, Nifeemɔ ni Ji 4 lɛ baafee wiemɔ ni kɔɔ Biblia mli gbɔmɔ ko he.
2 Nifeemɔi Kɛha Nikaselɔi: Akɛ Nifeemɔ ni Ji 3 lɛ haa nyɛmi yoo. Kɛ edamɔ Reasoning wolo lɛ nɔ lɛ, esa akɛ nifeemɔ lɛ akɔ shinaai anaa odaseyeli loo trukaa odaseyeli he. Shi, kɛ edamɔ Nilee wolo lɛ nɔ lɛ, esa akɛ atsu he nii akɛ sɛɛsaramɔ loo shia Biblia mli nikasemɔ. Esa akɛ enɛ afee nɔ ni yeɔ buaa jogbaŋŋ diɛŋtsɛ, ejaakɛ akɛ Nilee wolo lɛ baatsu nii waa kɛmɔ shi yɛ Biblia mli nikasemɔi afeemɔ mli.
3 Kɛ nifeemɔ lɛ ji shia Biblia mli nikasemɔ lɛ, no lɛ nyɛmimɛi yei enyɔ lɛ fɛɛ baanyɛ atara shi. Yaa nikasemɔ lɛ nɔ tɛ̃ɛ kɛtsɔ hiɛkpamɔ wiemɔi kukuji ni okɛaaha nɔ, koni no sɛɛ lɛ obi sane ni akala lɛ. Esa akɛ mɔ ni baafee shiatsɛ lɛ aha enifeemɔ lɛ akɔ shihilɛ mli nifeemɔ diɛŋtsɛ he. Kɛ be yɛ lɛ, abaanyɛ atao ni akane ŋmalɛi ni aŋmalako emli wiemɔi lɛ. Esa akɛ nyɛmi yoo lɛ kɛ nitsɔɔmɔ he ŋaa atsu nii kɛtsɔ saji ni eeebi kɛ ŋmalɛi ni akɛtsu nii lɛ hesusumɔ nɔ, koni ekɛgbala shiatsɛ lɛ ewo sanegbaa lɛ mli.
4 Mɛni esa akɛ afee kɛ ŋmalɛi ni aŋmalako emli wiemɔi lɛ fa yɛ nifeemɔ lɛ mli fe bɔ ni aaanyɛ akɛ minitii enumɔ asusu he? Halamɔ ŋmalɛi ni wieɔ sane lɛ he tɛ̃ɛ ni baama otii anɔ mi lɛ. Kɛ ŋmalɛi fioo pɛ yɔɔ lɛ, no lɛ abaanyɛ asusu saji otii ni yɔɔ nikasemɔ lɛ mli lɛ he jogbaŋŋ kɛmɔ shi. Yɛ bei komɛi amli lɛ, abaanyɛ akane kuku loo wiemɔ ko kɛjɛ wolo lɛ mli koni no sɛɛ lɛ akɛ shiatsɛ lɛ asusu he.
5 Kɛ be yɛ lɛ, shiɛlɔ ni enifeemɔ lɛ boteɔ yitso lɛ naagbee gbɛ lɛ mli lɛ baanyɛ atĩ akrabatsa ni yitso ji “Kaa Onilee Okwɛ,” ni yɔɔ Nilee wolo lɛ mli yitso fɛɛ yitso naagbee gbɛ lɛ mli kuku. Kɛ be yɛ lɛ, abaanyɛ asusu akrabatsai ni saji yɔɔ mli lɛ ni boteɔ kukuji ni akɛha lɛ mli lɛ hu he. Kɛ akrabatsai ni saji yɔɔ mli lɛ baa yɛ nifeemɔi enyɔ ateŋ lɛ, no lɛ nyɛmi yoo ni tsuɔ klɛŋklɛŋ nifeemɔ lɛ he nii lɛ baanyɛ agba he sane. Abaanyɛ awie wolo lɛ mli mfonirii ahe be fɛɛ be ni ekɔɔ sane ni asusuɔ he lɛ he lɛ.
6 Esa akɛ Nifeemɔ ni Ji 4 lɛ afee shiɛmɔ wiemɔ ni ŋɔɔ jogbaŋŋ ni kɔɔ shihilɛ mli saji ahe. Sane lɛ baakɔ shihilɛ mli sane diɛŋtsɛ he daa otsi—Biblia mli gbɔmɔ ko. Kasemɔ nɔ ni Insight, Kpo 1 lɛ yɔɔ kɛɛmɔ yɛ Biblia mli gbɔmɔ ni abaasusu ehe lɛ ni akɛbaatsu nii lɛ jogbaŋŋ. Ha wiemɔ lɛ akɔ saneyitso lɛ he, ni ohala Biblia mli ŋmalɛi otii ni baaye abua toibolɔi ni amɛkɛ amɛjwɛŋmɔ ama bɔ ni Biblia mli gbɔmɔ lɛ ji ha, ni esui, loo esusumɔi ni wɔmiisumɔ ni wɔkase loo wɔkpoo lɛ fata he lɛ nɔ. Abaanyɛ akɛ ŋmalɛi ni kɔɔɔ Biblia mli gbɔmɔ lɛ he tɛɛ lɛ afata he, kɛ amɛmaa bɔ ni Yehowa buɔ subaŋ kpakpai kɛ sui fɔji ehaa lɛ anɔ mi loo amɛkɔɔ wiemɔ lɛ saneyitso lɛ he.
7 Kɛ wɔkɛ wɔhe wo tsɔsemɔ ni akɛha yɛ skul lɛ mli jogbaŋŋ kɛmɔ shi lɛ, wɔbaanyɛ ‘wɔshiɛ wiemɔ lɛ’ bɔ ni no baatsɔɔ akɛ eji “nitsɔɔmɔ he ŋaa” kpakpa.—2 Tim. 4:2, NW.