Ye Obua Amɛ Koni Amɛsɔmɔ Ekoŋŋ
1 Beni bɔfo Paulo na nɔ ko ni baanyɛ ekɛ mumɔŋ oshara aba enanemɛi Kristofoi anɔ lɛ, eŋma akɛ: “Agbɛnɛ ŋmɛlɛtswaa ni wɔkɛaate shi kɛaajɛ wɔ mli lɛ eshɛ; ejaakɛ agbɛnɛ wɔyiwalaheremɔ lɛ ebɛŋkɛ fe tsutsu beni wɔhe wɔye lɛ.” (Rom. 13:11) Paulo nyɛmimɛi ni wɔɔ wɔdɔi yɛ mumɔŋ lɛ ahe sane miigba enaa; eeshwe ni esaa ewo amɛ hewalɛ koni amɛje nitsumɔ shishi ekoŋŋ.
2 Abaanyɛ awie yɛ anɔkwayeli mli akɛ jeŋ momo nɛɛ nyɔɔŋ lɛ eshɛ shɔŋŋ, ni jeŋ hee lɛ jetsɛremɔ lɛ kã wɔhiɛ kpaakpa. (Rom. 13:12) Wɔyɛ yiŋtoo kpakpa ni wɔɔdamɔ nɔ wɔha wɔ nyɛmimɛi ni amɛkɛ wɔ ebɔɔɔ dɔŋŋ akɛ sanekpakpa shiɛlɔi lɛ asane agba wɔnaa. Yɛ nyɛsɛɛ sɔɔmɔ afi lɛ mli lɛ, awo shiɛlɔi ni fa fe 400 hewalɛ ekoŋŋ yɛ Ghana pɛ. Te wɔɔfee tɛŋŋ wɔye wɔbua mɛi krokomɛi ni ekpa shiɛmɔyaa lɛ koni amɛsɔmɔ Yehowa shikome ekoŋŋ?
3 Nɔ ni Onukpai Baanyɛ Afee: Mɛi babaoo ni ekpa shiɛmɔyaa lɛ kwako anɔkwale lɛ; shiɛmɔ kɛkɛ amɛkpa yaa yɛ nijiaŋwujee, amɛ naagbai, heloonaa nitaomɔ, loo shihilɛ mli yeyeeye feemɔi krokomɛi ahewɔ. (Luka 21:34-36) Kɛ eeehi lɛ, ehi kwraa akɛ oooye obua ni amɛkakpa shiɛmɔyaa. Kɛ shiɛlɔ ko batsɔ mɔ ni ebuuu eshiɛmɔyaa he akɔntaa yɛ nyɔŋ ko mli lɛ, esa akɛ asafo lɛ woloŋmalɔ lɛ aha Asafo Woloŋ Nikasemɔ nɔkwɛlɔ lɛ ale. Abaanyɛ ato gbɛjianɔ koni onukpai ayasara lɛ. Esa akɛ amɛbɔ mɔdɛŋ ni amɛle nɔ̃ diɛŋtsɛ ni kɛ naagba lɛ ba, kɛ bɔ ni abaanyɛ akɛ yelikɛbuamɔ aha.—Kwɛmɔ September 15, 1993 Buu-Mɔɔ lɛ baafai 20-3.
4 Bɔ ni Mɛi Krokomɛi Baanyɛ Aye Abua: Wɔteŋ mɛi babaoo le mɔ ko ni ekpa shiɛmɔyaa. Ebaanyɛ efee mɔ ko ni tsutsu ko lɛ, efɔɔ wɔ bɛŋkɛmɔ. Mɛni wɔbaanyɛ wɔfee ni wɔkɛye wɔbua? Mɛni hewɔ oyaaa koni oyasara lɛ yɛ be kuku mli. Kɛɛmɔ lɛ akɛ ohiɛ miitsé lɛ. Feemɔ ohiɛ ŋmɔlɔŋmɔlɔ ni ohiɛ jwɛŋmɔ ni ja. Tsɔɔmɔ bɔ ni ohao oha, shi okafee onii tamɔ nɔ ni ehe miiye yɛ mumɔŋ. Gbaa lɛ niiashikpamɔi ni woɔ mɔ hewalɛ, loo nibii kpakpai komɛi ni asafo lɛ etsu he nii lɛ ahe saji. Okɛ miishɛɛ agba lɛ kpee krɛdɛɛ gbi ni baa lɛ kɛ “Nyɔŋmɔ Toiŋjɔlɛ He Bɔfoi” Kpokpaa Wulu nɔ Kpee ni baa lɛ he sane, ni owo lɛ hewalɛ ni eya eko. Ekolɛ asafo lɛ ni ekɛaabɔ ekoŋŋ lɛ baaye ebua lɛ waa fe nɔ fɛɛ nɔ. Kɛɛmɔ lɛ akɛ obaafata ehe koni nyɛ fɛɛ nyɛya kpeei lɛ. Ha onukpai lɛ ale bɔ ni ehere onɔ eha lɛ.
5 Kɛ mɔ ko ni ekpa shiɛmɔyaa lɛ saa eba kpeei ekoŋŋ lɛ, ekolɛ ebaafee lɛ hiɛgbele yɛ be mli ni ekɛ mɛi krokomɛi ni ena amɛ etsɛ lɛ miikpe lɛ. Kaabi akɛ, “Nɛgbɛ otee?” Yɛ no najiaŋ lɛ, ha enu he akɛ ayɛ ehe miishɛɛ. Okɛ lɛ agba sane. Okɛ lɛ atsɔɔ mɛi ni eleee amɛ lɛ. Okɛ lɛ ata shi yɛ kpee shishi, ni okwɛ ni ehiɛ lala wolo kɛ wolo ni akaseɔ lɛ. Wo lɛ hewalɛ ni esaa eba ekoŋŋ, ni oye obua lɛ kɛ́ ehe miihia.
6 Kɛ wɔjie suɔmɔ ni miishɛɛ yɔɔ mli kpo wɔtsɔɔ mɛi ni edu gbɛ lɛ, Yehowa kɛ Yesu mli filiɔ amɛ, kɛ mɛi ni tamɔ nɛkɛ na hewalɛ ekoŋŋ yɛ mumɔŋ lɛ. (Mal. 3:7; Mat. 18:12-14) Wɔbaanyɛ wɔna miishɛɛ ni tamɔ nakai nɔŋŋ eko, kɛ́ wɔye omanye yɛ mɛi krokomɛi ayelikɛbuamɔ mli koni amɛsɔmɔ Yehowa ekoŋŋ lɛ.