Sanebimɔ He
◼ Ani eja gbɛ lolo akɛ akɛ nyɛminuu loo nyɛmiyoo ni ekpa shiɛmɔyaa lɛ aaafee Biblia mli nikasemɔ yɛ Asafoŋ Sɔɔmɔ Ajinafoi Akuu lɛ mlinyo ko gbɛtsɔɔmɔ naa?
Sɔ̃ kã onukpai lɛ anɔ akɛ amɛkwɛ asafo lɛ nɔ, ní emli bii lɛ ateŋ mɔ fɛɛ mɔ ni ekpa shiɛmɔyaa hu fata he. Amɛyasaraa nɛkɛ gbɔmɛi nɛɛ, ni amɛkpɛɔ amɛyiŋ yɛ yelikɛbuamɔ ni he baahia amɛ akɛ aŋkroaŋkro lɛ he. Kɛ ehe baahia lɛ, nɔ ni baafata he ji ni mɔ ni ekpa shiɛmɔyaa lɛ aná Biblia mli nikasemɔ he sɛɛ. Organized to Accomplish Our Ministry wolo lɛ baafa 103 lɛ tsɔɔ mli akɛ, Asafoŋ Sɔɔmɔ Ajinafoi Akuu lɛ baakpɛ amɛyiŋ koni amɛtsɔɔ mɔ ni gbɛjianɔtoo ni tamɔ nɛkɛ he baaba sɛɛnamɔ kɛha lɛ.
Sɔɔmɔ nitsumɔ nɔkwɛlɔ lɛ ji mɔ ni baatsɔɔ mɔ ni baanyɛ ekɛ yelikɛbuamɔ ni hi fe fɛɛ aha, saji ni esa akɛ akase, kɛ wolo ni baaye ebua lɛ fe fɛɛ. Ekolɛ, mɔ ni kɛ lɛ kase nii tsutsu lɛ aloo mɔ ko ni ele ni ebuɔ lɛ lɛ baafee mɔ ni yɛ hegbɛ ni hi ni baaye ebua. Ekolɛ, ebaabi koni nyɛmiyoo ni he esa, ni eda yɛ mumɔ mli ayaye ebua nyɛmiyoo ko ni ekpa shiɛmɔyaa. Yɛ bei pii amli lɛ, ehe ehiaaa akɛ shiɛlɔ kroko aaafata mɔ ni akɛ nitsumɔ ewo edɛŋ koni ekwɛ nɔ lɛ he. Kɛ akɛ nitsumɔ lɛ wo edɛŋ lɛ, shiɛlɔ ni kwɛɔ nikasemɔ lɛ nɔ lɛ baabu be lɛ, sɛɛsaramɔi lɛ, kɛ nikasemɔ lɛ he akɔntaa.—Kwɛmɔ December 1987 Wɔ Maŋtsɛyeli Sɔɔmɔ lɛ baafai 1, 3 lɛ mli.
Akɛni nikaselɔ lɛ ji mɔ ni abaptisi lɛ hewɔ lɛ, ehe ehiaaa ni atsa nikasemɔ lɛ nɔ kɛ be kakadaŋŋ. Oti lɛ ji akɛ, koni aye abua mɔ ni ekpa shiɛmɔyaa lɛ ni ebɔi asafoŋ kpeei lɛ fɛɛ yaa ekoŋŋ, koni ebatsɔ mɔ ni shiɛɔ sanekpakpa lɛ daa. Sɔɔmɔ nitsumɔ nɔkwɛlɔ lɛ baakwɛ nikasemɔi ni tamɔ enɛɛmɛi anɔyaa. Esa akɛ nɔ ni baajɛ yelikɛbuamɔ ni suɔmɔ yɔɔ mli nɛɛ mli aba lɛ ji akɛ, nɛkɛ nyɛmimɛi hii kɛ yei nɛɛ diɛŋtsɛ anyɛ atsu amɛsɔ̃ he nii yɛ Yehowa hiɛ, ni ‘amɛshishifai amɔmɔ shi ni amɛmamɔ shi shiŋŋ’ diɛŋtsɛ yɛ anɔkwale lɛ mli.—Efe. 3:17; Gal. 6:5.