Sanebimɔ He

◼ Mɛni hewɔ esa akɛ wɔbu wɔshiɛmɔ nitsumɔ lɛ he akɔntaa mra yɛ nyɔŋ fɛɛ nyɔŋ nɔ lɛ?

Wɔ fɛɛ wɔnuɔ mlifilimɔ ko he kɛ wɔnu nibii kpakpai ni atsuɔ yɛ Maŋtsɛyeli shɛɛ sane lɛ shiɛmɔ mli lɛ. (Kwɛmɔ Abɛi 25:25.) Bɔfoi lɛ Asaji 2:41 lɛ bɔɔ amaniɛ akɛ, beni Petro ha maŋshiɛmɔ ni kanyaa mɔ egbe naa yɛ Pentekoste gbi lɛ nɔ lɛ, “aŋɔ susumai aaafee akpei-etɛ afata amɛhe.” No sɛɛ lɛ, etsɛɛɛ ni nakai yibɔ lɛ tee hiɛ “aaafee akpei-enumɔ.” (Bɔf. 4:4) Kwɛ bɔ ni nakai amaniɛbɔi lɛ ha klɛŋklɛŋ afii oha lɛ mli Kristofoi lɛ amli fili amɛ eha! Nakai nɔŋŋ wɔfeɔ wɔnii ŋmɛnɛ yɛ amaniɛbɔi ni woɔ mɔ hewalɛ lɛ ahe. Wɔmli filiɔ wɔ akɛ wɔɔnu omanyeyeli ni wɔnyɛmimɛi lɛ naa mli ŋɔɔmɔ yɛ sanekpakpa lɛ shiɛmɔ yɛ jeŋ fɛɛ lɛ he lɛ.

Akɛni akɛ be kɛ mɔdɛŋbɔɔ babaoo tsuɔ nii yɛ akɔntaabui ni tamɔ nɛkɛ lɛ anaabuamɔ mli hewɔ lɛ, ekome ni Maŋtsɛyeli shiɛlɔ fɛɛ shiɛlɔ kɛ wɔ baafee lɛ he miihia. Ani okɛ henilee tsuɔ nii koni okɛ okɔntaabuu lɛ aha mra yɛ nyɔŋ fɛɛ nyɔŋ nɔ?

Amaniɛbɔi ni tsɔɔ yifalɛi lɛ haa wɔmli filiɔ wɔ babaoo. Kɛfata he lɛ, akɔntaabui yeɔ ebuaa Asafo lɛ koni ekɛ gbɛtsɔɔmɔ aha kɛha jeŋ fɛɛ nitsumɔ lɛ nɔyaa. Esa akɛ akpɛ yiŋ yɛ he ni ekolɛ yelikɛbuamɔ babaoo he baahia yɛ loo wolo pɔtɛɛ ni esa akɛ afee kɛ amɛyibɔ. Onukpai ni yɔɔ asafo fɛɛ asafo mli lɛ kɛ shiɛmɔyaa he akɔntaabui tsuɔ nii ni amɛkɛnaa he ni esa akɛ aya hiɛ yɛ. Amaniɛbɔi kpakpai tswaa mɔ emaa shi, ni etsirɛɔ wɔ fɛɛ koni wɔpɛi wɔ diɛŋtsɛ wɔ sɔɔmɔ nitsumɔ lɛ mli ni wɔkwɛ he ni wɔbaanyɛ wɔya wɔhiɛ yɛ.

Ehe miihia ni shiɛlɔi fɛɛ ale gbɛnaa nii ni kã amɛnɔ aŋkroaŋkro akɛ amɛkɛ shiɛmɔyaa he akɔntaabuu awo nɔ ni akɛma Maŋtsɛyeli Asa lɛ nɔ lɛ mli mra yɛ nyɔŋ fɛɛ nyɔŋ nɔ lɛ. (Gal. 6:5) Asafo Woloŋ Nikasemɔ nɔkwɛlɔi yɛ hegbɛ ni hi jogbaŋŋ akɛ amɛaakai shiɛlɔi lɛ yɛ gbɛnaa nii nɛɛ he, akɛni amɛ hu amɛhiɛ yɔɔ amɛhe nɔ akɛ amɛkɛ yelikɛbuamɔ aaaha mɛi ni ekolɛ amɛyɔɔ naagba ko yɛ shiɛmɔ nitsumɔ ni amɛkɛ amɛhe woɔ mli daa yɛ nyɔŋ fɛɛ nyɔŋ nɔ lɛ hewɔ. Abaanyɛ akɛ kaimɔ nɛɛ aha yɛ naagbee woloŋ nikasemɔ lɛ mli daa nyɔŋ nɔ, loo yɛ be kroko ni sa mli. Kɛ anaaa hegbɛ akɛ akɛ shiɛmɔyaa he akɔntaabui lɛ aaaha yɛ Maŋtsɛyeli Asa lɛ nɔ lɛ, no lɛ Asafo Woloŋ Nikasemɔ nɔkwɛlɔ lɛ baanyɛ ahe, ni ekwɛ koni ekɛha woloŋmalɔ lɛ mra, koni akɛfata nyɛ asafo lɛ daa nyɔŋ nɔ akɔntaabuu lɛ he koni akɛmaje Asafo lɛ.

Ekãa ni wɔyɔɔ akɛ wɔkɛ anɔkwayeli aaabu wɔshiɛmɔ nitsumɔ lɛ he akɔntaa mra lɛ haaa jatsu lɛ atsii aha mɛi ni tsuɔ wɔ mumɔŋ hilɛ-kɛhamɔ he nii lɛ.