“Tswaa Oshiabii lɛ Oma Shi”
1 Ŋwanejee ko bɛ he akɛ weku shihilɛ miifite yɛ shihilɛ ni ebɔle je lɛŋ kɛkpe lɛ fɛɛ mli. Satan je lɛ miiwú shi yɛ shishiumɔ kɛ jeŋbai gbohii amli. (1 Yoh. 5:19) Enɛ tsɔɔ nɔ hewɔ ni ehe hiaa ni ‘wɔtswa wɔshiabii lɛ wɔma shi,’ ni wɔtsɔɔ mɛi krokomɛi bɔ ni amɛbaanyɛ amɛfee nakai nɔŋŋ kɛha amɛ diɛŋtsɛ amɛ nɔ̃.—Abɛi 24:3, 27, NW.
2 Biblia Shishitoo Mlai Buɔ Mɔ He: Anaa nɔ diɛŋtsɛ ni kɛ anɔkwa weku miishɛɛ baa lɛ yɛ Biblia shishitoo mlai ni akɛtsuɔ nii lɛ mli. Anɔkwalei ni hewalɛ yɔɔ mli nɛɛ he baa sɛɛnamɔ kɛhaa shiabii lɛ ateŋ mɔ fɛɛ mɔ yɛ shihilɛ fɛɛ shihilɛ mli. Weku ni kɛ enɛɛmɛi tsuɔ nii lɛ baana miishɛɛ ni amɛbaana toiŋjɔlɛ ni Nyɔŋmɔ gbeyeishemɔ yɔɔ mli lɛ mli ŋɔɔmɔ.—Okɛto Yesaia 32:17, 18 he.
3 Áto shishitoo mlai ni baanyɛ aye abua wɔ koni wɔtswa wɔ shiabii lɛ wɔma shi lɛ naa kɛ wiemɔi ni yɔɔ tɛ̃ɛ yɛ wolo hee ni ji, Nɔ Diɛŋtsɛ ni Kɛ Weku Miishɛɛ Baa lɛ mli. Yitso fɛɛ yitso baa naagbee kɛ nitsɔɔmɔ akrabatsa ni yeɔ ebuaa ni akɛmaa shishitoo mlai ni amɛhe hiaa ni esa akɛ weku lɛ mli bii akai lɛ nɔ mi. Akrabatsai nɛɛ babaoo jeɔ shishi kɛ sanebimɔ akɛ, “Biblia shishitoo mlai nɛɛ baanyɛ aye abua . . . yɛ mɛɛ gbɛ nɔ?” Enɛ gbalaa jwɛŋmɔ kɛyaa Nyɔŋmɔ susumɔi anɔ, koni wɔna ejwɛŋmɔi yɛ sane ni asusuɔ he lɛ he.—Yes. 48:17.
4 Kasemɔ wolo lɛ jogbaŋŋ. Kasemɔ ni ole hei ni shishitoo mlai ni baanyɛ aye abua bo kɛ́ naagbai te shi lɛ yɔɔ yɛ wolo lɛ mli. Wolo lɛ gbaa saji ni tamɔ nɛkɛ: nibii ni esa akɛ mɔ ko atao kɛ eetao gbalashihilɛ mli hefatalɔ (yitso 2), nibii titrii ni kɛ gbalashihilɛ ni miishɛɛ yɔɔ mli ni sɛɛ tsɛɔ baa (yitso 3), bɔ ni fɔlɔi baafee amɛtsɔse amɛbii bibii ni amɛbatsɔmɔ onukpai ni sheɔ Nyɔŋmɔ gbeyei (yitso 6), bɔ ni abaafee abu weku lɛ he kɛjɛ hewalɛi ni fiteɔ amɛ lɛ ahe (yitso 8), shishitoo mlai ni baanyɛ aye abua fɔlɔ-kome wekui ni amɛye omanye (yitso 9), mumɔŋ yelikɛbuamɔ kɛha wekui ni dãatɔɔ kɛ awuiyeli haoɔ amɛ lɛ (yitso 12), nɔ ni abaafee kɛ gbalashihilɛ lɛ miifite kwraa (yitso 13), nɔ ni abaanyɛ afee koni akɛ bulɛ aha fɔlɔi ni edara lɛ (yitso 15), kɛ agbɛnɛ, bɔ ni abaafee koni atao wɔsɛɛ be ni baahi shi daa kɛha mɔ lɛ weku (yitso 16).
5 Okɛ Wolo Hee lɛ Atsu Nii Kɛmɔ Shi: Kɛji akɛ ofeko nakai momo lɛ, mɛni hewɔ nyɛfeee ekome akɛ weku koni nyɛkɛkase Weku Miishɛɛ wolo lɛ? Agbɛnɛ hu, be fɛɛ be ni oweku lɛ kɛ naagbai heei loo kaai baakpe lɛ, nyɛtĩa saneyitsei ni yɔɔ wolo lɛ mli ni tsuɔ enɛɛmɛi ahe nii lɛ amli, ní nyɛkɛ sɔlemɔ asusu bɔ ni nyɛaafee ni nyɛkɛ ŋaawoo lɛ atsu nii lɛ he. Kɛfata he lɛ, too be ni fa he gbɛjianɔ yɛ March mli kɛha shiɛmɔ nitsumɔ lɛ, koni onyɛ obɔ mɔdɛŋ ni okɛ Nɔ Diɛŋtsɛ ni Kɛ Weku Miishɛɛ Baa lɛ aha gbɔmɛi pii bɔ ni obaanyɛ.
6 Abaawo wekui ni tsuɔ Nyɔŋmɔ jamɔ hetuu-kɛhamɔ he nii lɛ hewalɛ yɛ mumɔŋ, ni amɛbaafee ekome ni asaa amɛ jogbaŋŋ koni amɛnyɛ amɛdamɔ Satan tutuamɔi lɛ anaa. (1 Tim. 4:7, 8; 1 Pet. 5:8, 9) Kwɛ bɔ ni wɔdaa shi wɔhaa akɛ wɔyɛ ŋwɛi gbɛtsɔɔmɔi ni jɛ weku lɛ Shishitolɔ lɛ dɛŋ!