Biblia Lɛ—Nyɔŋmɔ Gbɛtsɔɔmɔ Kɛha Gbɔmɛi Fɛɛ
1 Akala Bibliai aaashɛ akpekpei toi akpei ejwɛ yɛ wiemɔi kɛ wiemɔi bibii ni fa fe 2,100 mli, koni eha shikpɔŋ lɛ nɔ gbɔmɛi fe oha mlijaa 90 lɛ nine ashɛ Nyɔŋmɔ Wiemɔ lɛ nɔ. Shi kɛlɛ, “Yehowa wiemɔi lɛ atoiboo” he hɔmɔ yɛ je lɛ mli. (Amos 8:11) Gbɔmɛi babaoo ni yɔɔ Biblia lɛ eko lɛ kaneee loo amɛnuuu nɔ ni yɔɔ mli lɛ shishi. Te wɔɔfee tɛŋŋ wɔkanya amɛ koni amɛkɛ Biblia lɛ atsu nii akɛ gbɛtsɔɔmɔ ni anyɛɔ atsuɔ he nii yɛ amɛshihilɛ mli lɛ?
2 Yɛ December mli lɛ wɔkɛ wolo ni ji The Bible—God’s Word or Man’s? lɛ baaha kɛ Biblia shishitsɔɔmɔ ni he eba sɛɛnamɔ kɛha wɔ yɛ afii 47 ni eho nɛ lɛ mli—New World Translation (Jeŋ Hee Shishitsɔɔmɔ) lɛ. Abaanyɛ afee enɛ kɛtsɔ eŋmɛnɛŋmɛnɛ beaŋ wiemɔ ni mli kã shi faŋŋ lɛ he nɔkwɛmɔnɔ ni aaafee lɛ nɔ. (Kwɛmɔ “All Scripture” wolo lɛ baafa 328, kuku 6 lɛ mli.) Wɔbaafee wɔhiɛsɔɔ ni mli kwɔ ni wɔjieɔ lɛ kpo kɛha nɛkɛ nikeenii ni jɛ Yehowa ŋɔɔ nɛɛ he nɔkwɛmɔnɔ kɛtsɔ ekãa ni wɔkɛaaye wɔbua mɛi krokomɛi koni amɛkpɛlɛ Biblia lɛ nɔ akɛ Nyɔŋmɔ gbɛtsɔɔmɔ kɛha gbɔmɛi fɛɛ lɛ nɔ.
3 Obaanyɛ okɛ shiɛmɔ wiemɔ ko aje shishi kɛtsɔ dɛhiɛmɔ wolo ni ji “Nɔ Hewɔ ni Obaanyɛ Okɛ Ohe Afɔ̃ Biblia lɛ Nɔ” lɛ nɔ. Obaanyɛ okɛɛ akɛ:
◼ “Eyɛ mli akɛ shikpɔŋ lɛ nɔ gbɔmɛi fe oha mlijaa 90 anine eshɛ Biblia lɛ nɔ moŋ, shi mɛi fioo ko pɛ kaneɔ daa. Mɛni ji nɔ ni osusuɔ akɛ no haa ebaa lɛ nakai?” Kanemɔ dɛhiɛmɔ wolo lɛ klɛŋklɛŋ kukuji enyɔ lɛ, kɛ 2 Timoteo 3:16 lɛ hu. Okɛ New World Translation lɛ kɛ God’s Word wolo lɛ aha. Kɛ aheee lɛ, bi koni shiatsɛ lɛ akane dɛhiɛmɔ wolo lɛ mli saji ni eshwɛ lɛ, yɛ sɛɛ mli. Tĩi naagbee saneyitso bibioo ni ji “Wɔsɛɛ Be ni Egbaa Efɔ̃ɔ Shi” lɛ mli.
4 Kɛ oku osɛɛ otee gbɔmɛi ni oshi dɛhiɛmɔ wolo ni ji “Nɔ Hewɔ ni Obaanyɛ Okɛ Ohe Afɔ̃ Biblia lɛ Nɔ” lɛ aŋɔɔ lɛ, obaanyɛ oka enɛ okwɛ:
◼ Beni ojie ohe shi ekoŋŋ lɛ, kanemɔ dɛhiɛmɔ wolo lɛ naagbee kukuji enyɔ lɛ mli. Bi shiatsɛ lɛ kɛji akɛ esusu bɔ ni eeenyɛ eba lɛ akɛ eeehi shi kɛya naanɔ yɛ shikpɔŋ nɔ lɛ he pɛŋ. Kɛ ewie egbe naa lɛ, kɛɛmɔ akɛ: “Yehowa Odasefoi yɛ nɔmimaa akɛ gbalɛi fɛɛ ni anaa yɛ Biblia lɛ mli lɛ baaba mli, ni nɔ ni gbaa wɔsɛɛ be ko ni yɔɔ naakpɛɛ kɛha gbɔmɛi fɛɛ ni shɛɔ Nyɔŋmɔ taomɔ nii lɛ ahe lɛ fata he.” Okɛ mfoniri ni yɔɔ baafa 13 yɛ Taoɔ wolo bibioo lɛ mli lɛ atsɔɔ lɛ, ni ogbele kɛya nikasemɔ 5 lɛ, ni okɛɛ lɛ akɛ okɛ lɛ baasusu sanebimɔi ni ato naa lɛ ahetooi lɛ ahe, ni kɛtsɔ no nɔ lɛ ooje nikasemɔ shishi.
5 Yɛ shikpɔŋkukuji ni gbɔmɛi lɛ nyaa jamɔ he lɛ mli lɛ, obaanyɛ oka shishijee gbɛ nɛɛ okwɛ:
◼ “Wɔmiiwo hewalɛ koni aná bulɛ babaoo aha Biblia lɛ. Wekui babaoo yɛ Biblia lɛ eko, shi amɛfɔɔɔ kanemɔ kɛ́ amɛkɛ naagbai ni hiɛdɔɔ yɔɔ he miikpe. Ani oyɔse enɛ? [Ŋmɛɛ gbɛ ni ewie.] Ekolɛ amɛheɔ amɛyeɔ akɛ Biblia lɛ be eho. Wolo nɛɛ, The Bible—God’s Word or Man’s? lɛ kɛ odaseyeli ni kɔneɔ mɔ yiŋ akɛ Biblia lɛ ja yɛ jeŋ nilee naa, ni akɛ ekɛ tsabaai ni anyɛɔ atsuɔ he nii kɛha ŋmɛnɛŋmɛnɛ beaŋ naagbai ni nyɛɔ mɔ nɔ lɛ haa.” Tĩi saji otii fioo komɛi ni yɔɔ yitso 8 loo yitso 12 yɛ wolo lɛ mli lɛ mli, koni okɛha.
6 Kɛ oku osɛɛ otee ni oyadi “God’s Word” wolo lɛ kɛhamɔ sɛɛ lɛ, obaanyɛ okɛɛ akɛ:
◼ “Beni miba oŋɔɔ nyɛsɛɛ ko lɛ, wɔgba bɔ ni Biblia lɛ yeɔ ebuaa ni akɛtsuɔ ŋmɛnɛŋmɛnɛ naagbai ni yɔɔ hwanyaŋŋ lɛ he nii lɛ he sane. Anyɛ aye abua mɛi ni ekpɛlɛ nɔ akɛ eji Nyɔŋmɔ Wiemɔ lɛ hu koni amɛhi shi yɛ shihilɛ ni miishɛɛ kɛ tsui ni nyɔɔ mɔ mli babaoo yɔɔ mli lɛ mli. Masumɔ koni matsɔɔ bo Biblia mli shishitoo mlai ni anyɛɔ atsuɔ he nii ni atsɔɔ mli yɛ wolo lɛ ni mishi miha bo lɛ mli.” Nyɛgbaa Ŋmalɛ mli shishitoo mlai ni anaa yɛ yitso 12, kukuji 3-6 lɛ he sane, ni okane kuku 7 lɛ kɛmu naa. Kɛ ejie miishɛɛ kpo lɛ, kɛɛmɔ lɛ akɛ okɛ lɛ baakase Nilee wolo lɛ loo Taoɔ wolo bibioo lɛ.
7 Ekolɛ mɛi ni edara lɛ baanya shiɛmɔ wiemɔ ni nyiɛ sɛɛ lɛ he:
◼ “Be ko ni eho lɛ, akaneɔ Biblia lɛ yɛ shiai babaoo amli ni wekui lɛ hiɔ shi yɛ eshishitoo mlai lɛ anaa. Ani nakai eji yɛ oweku lɛ mli? [Ŋmɛɛ gbɛ ni ewie.] Ŋmɛnɛ, etamɔ nɔ ni nibii babaoo gbalaa mɛi ajwɛŋmɔ koni amɛkatuu amɛhe amɛha Biblia kanemɔ loo amɛnuɔ he akɛ emli jeŋba he shishitoo mlai lɛ be eho. The Bible—God’s Word or Man’s? wolo nɛɛ mli yitso 13 lɛ kɛ aŋkroaŋkroi etɛ komɛi awala shihilɛ mli niiashikpamɔi diɛŋtsɛ, ní tsɔɔ bɔ ni amɛshihilɛi baafee nɔ ni hi jogbaŋŋ yɛ be mli ni amɛkase Biblia lɛ amɛgbe naa sɛɛ lɛ haa. Kɛ obaasumɔ koni okane bɔ ni Nyɔŋmɔ Wiemɔ lɛ mli hewalɛ lɛ eye ebua amɛ lɛ he sane lɛ, maná he miishɛɛ akɛ mashi wolo nɛɛ kɛ nɛkɛ Biblia ni yɔɔ ŋmɛnɛŋmɛnɛ beaŋ wiemɔ mli nɛɛ mahao.”
8 Obaanyɛ okɛɛ enɛ yɛ sɛɛsaramɔ lɛ mli akɛ:
◼ “Beni wɔwie nyɛsɛɛ ko lɛ, wɔba gbeekpamɔ akɛ akɛ Biblia mli jeŋba he shishitoo mlai tsuuu nii yɛ adesai ateŋ ŋmɛnɛ. Ani esa akɛ hiɛ ni akuɔ ashwieɔ nii anɔ nɛɛ akɔ wɔhe eko? [Ŋmɛɛ gbɛ ni ewie.] Yesu Kristo ná bulɛ ni mli kwɔ waa eha Biblia mli nilee ni aaaná lɛ.” Kanemɔ Yohane 17:3. No sɛɛ lɛ okɛ lɛ asusu Nilee wolo lɛ yitso 1 lɛ mli kuku 5 lɛ he. Tsɔɔmɔ wɔ Biblia mli nikasemɔ he gbɛjianɔtoo ni aheee nɔ ko lɛ mli oha lɛ, ni okɛɛ lɛ akɛ obaafee he nɔkwɛmɔnɔ.
9 Nyɛsɔlea koni Yehowa ajɔɔ mɔdɛŋ fɛɛ ni nyɛbɔɔ koni nyɛgbala jwɛŋmɔ kɛya Biblia lɛ—Nyɔŋmɔ gbɛtsɔɔmɔ kɛha gbɔmɛi fɛɛ nɔ lɛ nɔ.