Yehowa Kɛ Hewalɛ ni Fa Kɛteke Nɔ Haa
1 Akɛ sɔɔmɔ hegbɛ krɔŋkrɔŋ ko ni jara wa—Kristofoi asɔɔmɔ nitsumɔ lɛ —ewo Yesu kaselɔi fɛɛ adɛŋ. (Mat. 24:14; 28:19, 20) Shi ekolɛ, emuu ni adesai yeee kɛ nibii agbɛjianɔtoo nɛɛ mli nɔnyɛɛi lɛ baaha wɔna wɔhe yɛ bei komɛi amli akɛ wɔshɛɛɛ.
2 Kɛ eba lɛ nɛkɛ lɛ, wɔbaanyɛ wɔná miishɛjemɔ kɛjɛ bɔfo Paulo wolo ni eŋma kɛyaha Kristofoi ni afɔ amɛ mu ni yɔɔ Korinto lɛ mli. Eŋma akɛ: “Wɔhiɛ nɛkɛ jwetri nɛɛ yɛ sũ nii amli.” (2 Kor. 4:7) Paulo yɛ nɔmimaa akɛ: ‘Akɛni wɔhiɛ nɛkɛ sɔɔmɔ nɛɛ hewɔ lɛ, . . . wɔfɔ̃ɔɔ.’ (2 Kor. 4:1) Lɛɛlɛŋ, eji kaa kɛha wɔteŋ mɔ fɛɛ mɔ, kɛji afɔ wɔ mu loo wɔji “tooi krokomɛi” lɛ akɛ wɔɔya nɔ wɔjaje sanekpakpa lɛ ni ‘wɔfɔ̃ɔɔ.’ Hewalɛ ni jɛ Nyɔŋmɔ, mɔ ni haa “hewalɛ ni fa kɛteke nɔ” lɛ ŋɔɔ lɛ he miihia wɔ.—Yoh. 10:16; 2 Kor. 4:7b.
3 Eji hewalɛwoo nɔ̃ akɛ, Odasefoi babaoo ji shiɛlɔi ni yɔɔ ekãa yɛ shitee-kɛ-woo ni naa wa waa, gbɔmɔtsoŋ naagbai, loo shika fioo ni amɛyɔɔ lɛ fɛɛ sɛɛ. Esa akɛ wɔteŋ mɔ fɛɛ mɔ ayɔse akɛ wɔ nitsumɔ akɛ wɔshiɛ lɛ yɛ Yehowa sɛɛfimɔ. Yɛ nɔ najiaŋ ni wɔɔha nijiaŋwujee loo gbeyeishemɔ agbɔjɔ wɔfaishitswaa akɛ wɔɔshiɛ lɛ mli lɛ, nyɛhaa ‘wɔhe awaa yɛ Nuntsɔ lɛ kɛ ehewalɛ nyɛmɔ lɛ mli.’—Efe. 6:10; Abɛi 24:10.
4 Bɔ ni Ooofee Oná Nyɔŋmɔ Hewalɛ: Kã sɔlemɔ he, ni obi Nyɔŋmɔ yelikɛbuamɔ kɛ hewalɛ. (Rom. 12:12; Fil. 4:6, 7) No sɛɛ lɛ, okɛ otsui muu fɛɛ afɔ̃ Yehowa nɔ akɛ ekɛ hewalɛ ni fa kɛteke nɔ baaha. (Abɛi 3:5) Kanemɔ ŋmɛnɛŋmɛnɛ beaŋ wala shihilɛ he saji ni yɔɔ wɔ woji tɛtrɛbii lɛ amli lɛ, ejaakɛ amɛkɛ odaseyeli ni tsɔɔ akɛ Yehowa miiye miibua etsuji koni amɛmia amɛhiɛ yɛ kaai ashishi lɛ haa. Okɛ ohe akpɛtɛ nyɛmimɛi ni yɔɔ asafo lɛ mli lɛ ahe, ni okakwa asafoŋ kpeeiyaa.—Rom. 1:11, 12; Heb. 10:24, 25.
5 Eba akɛ wɔ fɛɛ wɔɔfee nɔ fɛɛ nɔ ni wɔɔnyɛ koni wɔnine ashɛ Yehowa hewalɛ lɛ nɔ—ni ji hewalɛ ni fa kɛteke nɔ lɛ, ni no baaye abua wɔ koni wɔkafɔ̃ɔ Maŋtsɛyeli shiɛmɔ nitsumɔ ni he hiaa fe fɛɛ lɛ.