Nitsumɔ ní Nyɔŋmɔ Fiɔ Sɛɛ
1 Ŋmɛnɛ, yɛ Yehowa tsuji ateŋ lɛ, mɛi fioo pɛ awoloŋlee etee hiɛ waa, amɛyɔɔ nii, loo amɛhe gbɛi yɛ ŋmɛnɛŋmɛnɛ nibii agbɛjianɔtoo lɛ mli. No hewɔ lɛ, mɛi komɛi kpoɔ wɔsɔɔmɔ nitsumɔ lɛ akɛ nɔ ko ni he bɛ sɛɛnamɔ. (Yes. 53:3) Shi kɛlɛ, Biblia mli tsɔsemɔ nitsumɔ ni wɔtsuɔ lɛ kɛ miishɛjemɔ kɛ hiɛnɔkamɔ eha gbɔmɛi akpekpei abɔ yɛ jeŋ fɛɛ. Te fee tɛɛ ni gbɔmɛi foji enyɛ amɛtsu nibii ni sa kadimɔ waa nɛɛ. Kɛtsɔ Nyɔŋmɔ sɛɛfimɔ pɛ nɔ. (Mat. 28:19, 20; Bɔf. 1:8) Bɔfo Paulo tsɔɔ mli akɛ: “Je nɛŋ gbɔjɔmɔ nii lɛ hu Nyɔŋmɔ hala, koni ekɛwo nii ni he wa lɛ ahiɛgbele.”—1 Kor. 1:26-29.
2 Bɔfoi lɛ kɛ klɛŋklɛŋ afii 100 lɛ mli Kristofoi krokomɛi lɛ ateŋ mɛi fã kpotoo “jeee woloŋlelɔi kɛ nilelɔi.” (Bɔf. 4:13) Shi kɛlɛ, amɛkɛ ekãa tiu sanekpakpa lɛ shiɛmɔ ni akɛwo amɛdɛŋ lɛ sɛɛ, ni Yehowa jɔɔ amɛmɔdɛŋbɔi lɛ anɔ. ‘Yehowa wiemɔ lɛ tee nɔ eshwere ni eda ni eye kunim,’ yɛ gbɛtsiinii kɛ shitee-kɛ-woo fɛɛ sɛɛ. Nɔ ko nyɛɛɛ atsi nitsumɔ lɛ naa ejaakɛ Nyɔŋmɔ fi sɛɛ. (Bɔf. 5:38, 39; 19:20) Nakai nɔŋŋ eji yɛ wɔŋmɛnɛŋmɛnɛ beaŋ. Nɔyelɔi ni yɔɔ hewalɛ ashitee-kɛ-woo ni faishitswaa yɔɔ mli lɛ po nyɛko atsi sanekpakpa lɛ kunimyeli kɛ eshweremɔ naa.—Yes. 54:17.
3 Nyɔŋmɔ Sa Yijiemɔi Fɛɛ: Ani hegbɛ ni fe fɛɛ ni wɔná akɛ Nyɔŋmɔ sɔɔlɔi lɛ haa wɔ yiŋtoo ni wɔɔdamɔ nɔ wɔshwã wɔfɔ̃ wɔhe nɔ? Dabi kwraa. Beni Paulo wieɔ Kristofoi asɔɔmɔ lɛ he lɛ, eŋma akɛ: “Wɔhiɛ nɛkɛ jwetri nɛɛ yɛ sũ nii amli koni hewalɛ ní fá kɛteke nɔ afee Nyɔŋmɔ nɔ̃ ni jeee wɔnɔ̃.” (2 Kor. 4:7) Paulo yɔse akɛ enyɛɔ etsuɔ esɔɔmɔ lɛ he nii yɛ hewalɛ ni Nyɔŋmɔ kɛha lɛ lɛ pɛ naa.—Efe. 6:19, 20; Fil. 4:13.
4 Wɔyɔseɔ nakai nɔŋŋ akɛ “Nyɔŋmɔ yelikɛbuamɔ naa” pɛ anyɛɔ atsuɔ shiɛmɔ nitsumɔ lɛ he nii. (Bɔf. 26:22) Kɛtsɔ nakai jeŋ muu fɛɛ sanejajemɔ lɛ nɔ lɛ, Yehowa kɛ wɔ miitsu nii yɛ gbɛ ni da nɔ kɛmiihoso jeŋmaji lɛ—kojomɔ ni akɛbaakpata nii ahiɛ ni etsɛŋ ni baaba lɛ he okadi. (Hag. 2:7) Kwɛ hegbɛ ni wɔná akɛ wɔɔfee “Nyɔŋmɔ hefatalɔi nitsulɔi” yɛ mumɔŋ nikpamɔ nitsumɔ kpeteŋkpele lɛ mli!—1 Kor. 3:6-9.