Fɔ̃ɔ Nine Otsɛ Mɔ Fɛɛ Mɔ ni Kumai Yeɔ Lɛ Lɛ
1 Taakɛ gbalɔ Amos gba efɔ̃ shi lɛ, adesai aweku lɛ miina amanehulu ni “jeee . . . nu kumai ni, shi Yehowa wiemɔi lɛ, atoiboo nɔ ni!” (Amos 8:11) Bɔni afee ni wɔye wɔbua gbɔmɛi ni yɔɔ nɛkɛ mumɔŋ nu hɔmɔ shihilɛ nɛɛ mli lɛ, wɔgbaa amɛ gbɛjianɔ ni Nyɔŋmɔ eto kɛha adesai toibolɔi atsamɔ kɛmiijɛ esha kɛ gbele mli ni afee he mfoniri yɛ Kpojiemɔ naagbee yitso lɛ mli akɛ “wala nu faa” lɛ he sane. Wɔná hegbɛ akɛ wɔɔfɔ̃ mɔ fɛɛ mɔ ni jalɛ he kumai yeɔ lɛ lɛ nine koni “ebayɛ wala nu lɛ yaka.” (Kpoj. 22:1, 17) Mɛɛ gbɛ nɔ wɔɔtsɔ wɔfee enɛ yɛ February mli? Kɛtsɔ wolo ni ji Kpojiemɔ—Enaagbee Kwraa lɛ Ebɛŋkɛ! ni wɔkɛaaha lɛ nɔ. Ekolɛ obaasumɔ ni oka shiɛmɔ wiemɔi nɛɛ okwɛ:
2 Akɛni mɛi babaoo miisusu gbɔmɔtsoŋ hewalɛnamɔ kpakpa he hewɔ lɛ, ekolɛ obaana nɛkɛ gbɛ nɛɛ akɛ emɔɔ shi:
◼ “Mɛi babaoo miisusu gbɔmɔtsoŋ hewalɛnamɔ kpakpa he nyɔmɔbɔɔ ni yaa ŋwɛi lɛ he. Ekolɛ osusu nɛkɛ sane nɛɛ he. [Ŋmɛɛ gbɛ ni ewie.] Ani naanɔ tsabaa ko yɛ kɛha naagba nɛɛ? [Ŋmɛɛ gbɛ ni ewie.] Naa gbɛkpamɔ ko ni yɔɔ naakpɛɛ.” Kanemɔ Kpojiemɔ 22:1, 2. Agbɛnɛ gbelemɔ Kpojiemɔ Naagbee wolo lɛ kɛya mfoniri ni yɔɔ baafai 308-9 lɛ, ni okɛ kuku 22 ni yɔɔ baafa 311 lɛ atsu nii ni okɛtsɔɔ mli. Muu sane naa akɛ: “Nɛkɛ wolo nɛɛ wieɔ Kpojiemɔ lɛ kuku fɛɛ kuku he.” Okɛ wolo lɛ aha ni oto gbɛjianɔ ni oku osɛɛ oya.
3 Kɛ oofee sɛɛsaramɔ lɛ, obaanyɛ oje osanegbaa lɛ shishi ni okɛɛ akɛ:
◼ “Beni miba biɛ be ko lɛ, wɔwie naanɔ tsabaa kɛha gbɔmɔtsoŋ hewalɛnamɔ kpakpa he naagbai ahe. Ani osusuɔ akɛ be ko baaba ni hela mɔŋ mɔ ko dɔŋŋ? [Ŋmɛɛ gbɛ ni ewie.] Kadimɔ nɛkɛ wiemɔi ni ekaaa nɛɛ.” Kanemɔ Yesaia 33:24. Agbɛnɛ gbelemɔ kɛya Taoɔ wolo bibioo lɛ nikasemɔ 5 lɛ mli, ni nyɛsusu kukuji 5-6 lɛ he, ni obi sanebimɔi ni yɔɔ nikasemɔ lɛ shishijee lɛ mli nɔ ni sa, ni nyɛkane ŋmalɛi ni atsĩ tã lɛ amli fioo ko. Tsĩi tã akɛ helai kɛ gbele ni aaajie kɛaaya lɛ ji Nyɔŋmɔ shishijee yiŋtoo kɛha shikpɔŋ lɛ mlibaa fã. Yɛ be mli ni okɛ wolo bibioo lɛ eha sɛɛ lɛ, too gbɛjianɔ ni oku osɛɛ oya ni okɛ lɛ ayasusu kukuji 1-4 kɛ 7 lɛ he yɛ nakai nikasemɔ lɛ nɔŋŋ mli.
4 Kɛ́ adafitswaa mli sane ni kɔɔ trukaa gbele he lɛ yɛ gbɔmɛi ajwɛŋmɔi amli lɛ, obaanyɛ oka gbɛ nɛɛ okwɛ:
◼ “Ekolɛ onu [tsĩi adafitswaa mli sane lɛ tã] sane lɛ he. Kɛ afo wala nɔ kuku yɛ dɔlɛ gbɛ nɔ lɛ, mɛi babaoo biɔ nɔ miishɛjemɔ ni abaanyɛ akɛha wekui ni nɔ enyɔ amɛhiŋmɛi amli lɛ he sane. Te osusuɔ tɛŋŋ?” Ŋmɛɛ gbɛ ni ewie. Agbɛnɛ gbelemɔ Kpojiemɔ Naagbee wolo lɛ baafa 299, ni okɛ gbohiiashitee he mfoniri ni atɛŋ lɛ atsɔɔ lɛ. Tsa nɔ akɛ: “Efeɔ mɛi babaoo naakpɛɛ akɛ amɛaale akɛ akɛ jalɔi kɛ mɛi ni ejaaa fɛɛ baaku sɛɛ aba shihilɛ mli ekoŋŋ yɛ Paradeiso yɛ shikpɔŋ nɔ. [Taakɛ atsɛ yɛ kuku 9 yɛ baafa 297 lɛ, kanemɔ Bɔfoi lɛ Asaji 24:15 lɛ, ni okɛ naatsɔɔmɔ ni anaa yɛ kuku 10 lɛ aha.] Nɛkɛ wolo nɛɛ wieɔ Nyɔŋmɔ yiŋtoo krokomɛi kɛha wɔsɛɛ be he saji ni yɔɔ miishɛɛ lɛ ahe fitsofitso. Kɛ obaasumɔ ni ole babaoo yɛ enɛ he lɛ, obaanyɛ ohe ekome nɛɛ.” Too gbɛjianɔ koni oku osɛɛ oya, ni okadi nibii pɔtɛɛ ni mɔ lɛ náa he miishɛɛ ni esusuɔ he.
5 Kɛ́ otee ekoŋŋ lɛ, feemɔ oshiɛmɔ wiemɔ lɛ ni esa shiatsɛ lɛ he. Obaanyɛ okɛɛ akɛ:
◼ “Beni wɔwie nyɛsɛɛ ko lɛ, mihiɛ sɔ sane ko ni owie yɛ Nyɔŋmɔ yiŋtoo kɛha shikpɔŋ lɛ he. [Tĩi wiemɔ lɛ mli.] Mina sane ko ni misusuɔ akɛ obaaná he miishɛɛ.” Gbelemɔ Taoɔ wolo lɛ kɛya nikasemɔ 5. Kanemɔ ni nyɛsusu kukuji ni yɔɔ nikasemɔ lɛ mli lɛ saŋŋ he bɔ ni shiatsɛ lɛ aaanya he. Okɛ wolo bibioo lɛ aha. Yɛ be mli ni nyɛto be ni okɛaaku osɛɛ koni nyɛyatsa nikasemɔ lɛ nɔ lɛ sɛɛ lɛ, tsĩi asafoŋ kpeei bei lɛ atã otsɔɔ shiatsɛ lɛ. Gbalamɔ Maŋshiɛmɔ lɛ mli otsɔɔ lɛ, ni ofɔ̃ lɛ nine koni ebabo toi.
6 Kɛ́ oosumɔ ni okɛ shiɛmɔ wiemɔ kuku ni wieɔ dɛhiɛmɔ wolo lɛ he atsu nii lɛ, obaanyɛ okɛɛ enɛ:
◼ “Masumɔ ni onine ashɛ nɛkɛ dɛhiɛmɔ wolo ni yitso ji Mɛɛ Hiɛnɔkamɔ yɔɔ Kɛha Suɔlɔi ni Egboi Lɛ? nɔ.” Okɛha shiatsɛ lɛ ni okɛɛ lɛ ni enyiɛ osɛɛ yɛ be mli ni okaneɔ klɛŋklɛŋ kuku lɛ mli. Ŋmɛɛ gbɛ ni eha sanebimɔ ni atee lɛ shi yɛ naagbee sane lɛ mli lɛ hetoo. Kanemɔ kuku enyɔ lɛ, ni agbɛnɛ ogbele mfoniri ni yɔɔ Kpojiemɔ Naagbee wolo lɛ baafa 299 lɛ. Tsa nɔ akɛ: “Nɛkɛ wolo nɛɛ kɛ gbohiiashitee he hiɛnɔkamɔ lɛ kɛ Biblia lɛ mli naakpɛɛ shiwoi kɛha wɔsɛɛ be lɛ he saji fitsofitso haa. Obaanyɛ ohe ekome nɛɛ.” Too gbɛjianɔ kɛha sɛɛsaramɔ.
7 Ekolɛ mɛi krokomɛi ni wɔɔfɔ̃ nine wɔtsɛ amɛ kɛ miishɛɛ lɛ baaha amɛba wala nu, ni Yehowa kɛhaa amrɔ nɛɛ he. No hewɔ lɛ, nyɛhaa wɔkɛa mɔ fɛɛ mɔ ni kumai yeɔ lɛ lɛ akɛ, “Ba!”—Kpoj. 22:17.