Halamɔ Saji ni Baatee Gbɔmɛi lɛ Amiishɛɛ Shi Babaoo
1 Taakɛ gãitsɛ̃lɔi ni taa amɛgãii lɛ jogbaŋŋ lɛ ji lɛ, asafoŋ shiɛlɔi kɛ gbɛgbalɔi babaoo miiná omanye ni amɛyeɔ waa yɛ Buu-Mɔɔ kɛ Awake! lɛ ateŋ saji ni amɛhalaa ni mɛi ni yɔɔ amɛshikpɔŋkuku lɛ mli lɛ sumɔɔ waa diɛŋtsɛ lɛ ni amɛkɛtsuɔ nii lɛ mli ŋɔɔmɔ. Amɛkwɛɔ koni amɛná amɛle mɛi titri ni baasumɔ ni amɛkane woji tɛtrɛbii lɛ mli saji pɔtɛɛ komɛi. Mɛɛ gbɛ nɔ amɛfeɔ enɛ yɛ?
2 Klɛŋklɛŋ lɛ, amɛkaneɔ woji tɛtrɛbii lɛ eko fɛɛ eko kɛgbeɔ naa. Kɛkɛ lɛ, amɛbi amɛhe akɛ, Namɔ pɔtɛɛ baasumɔ saji lɛ ateŋ eko pɔtɛɛ? Ni abɔɔ mɔdɛŋ koni ayasara aŋkroaŋkroi ni ekolɛ amɛbaaná nakai saji lɛ akanemɔ he miishɛɛ lɛ. Yɛ be mli ni amɛkpaa gbɛ akɛ abaaná wolo pɔtɛɛ ko he miishɛɛ babaoo yɛ amɛshikpɔŋkuku lɛ mli lɛ, amɛshɛɔ babaoo kɛfataa he.
3 Abuɔ Wɔ Woji Tɛtrɛbii lɛ Jogbaŋŋ: Mɛi ni shɛɔ wɔ woji tɛtrɛbii lɛ ateŋ mɔ kome ni tsuɔ nii ehaa Nigeria woji tɛtrɛbii ni akaneɔ babaoo yɛ jeŋmaji sɔrɔtoi amli lɛ afeemɔhe lɛ kɛɛ yɛ Awake! lɛ he akɛ: “Aanyɛkoo yɛ wolo tɛtrɛɛ ni hi fe fɛɛ yɛ je lɛŋ kɛha gbɔmɛi fɛɛ lɛ hewɔ.” Mɔ ko ni sumɔɔ wɔ woji tɛtrɛbii lɛ kanemɔ waa lɛ kɛɛ: “Mɛɛ nilee ni jara wa waa mli ojarawatɛi ni yɔɔ naakpɛɛ nɛ! Minyɛɔ minaa saji fɛɛ ni misumɔɔ ni asusu he yɛ nɛkɛ [woji tɛtrɛbii] nɛɛ mli he ko yɛ ebaafai lɛ amli.” Nitsɔɔmɔ he nilelɔ ko ni yɔɔ Ghana ŋma akɛ: “Mikane saji ni kɔɔ ‘Adafitswaa Mli Yeyeeyefeemɔ’ kɛ bɔ ni enáa adesai anɔ hewalɛ lɛ yɛ January 8, 1998 Awake! lɛ mli, ni miisumɔ ni maha nyɛ ayekoo yɛ saji ni mli kwɔlɔ ni tamɔ nɛkɛ ni nyɛŋmalaa lɛ hewɔ.”
4 Woji tɛtrɛbii lɛ wieɔ saji sɔrɔtoi babaoo he, ni nɔ ni fata he ji, Biblia lɛ, jeŋ saji, weku mli naagbai, adesai ahe naagbai, yinɔsane, jeŋ nilee, kooloi kɛ tsei ashihilɛ, kɛ́ wɔɔtsĩ fioo pɛ tã lɛ. Eka shi faŋŋ akɛ mɔ ko sumɔɔ ni ekane nɔ ko ni kɔɔ ehiamɔ nii, eshihilɛi, loo enitsumɔ he. Akɛni wɔkɛ aŋkroaŋkroi babaoo wieɔ, ni mɔ fɛɛ mɔ yɛ nɔ titri ko ni esumɔɔ kɛ enaagbai hewɔ lɛ, ní wɔɔhala saji pɔtɛɛ komɛi ni mɛi ni wɔkɛkpeɔ lɛ baaná he miishɛɛ lɛ baafee nɔ ni mɔɔ shi waa.
5 Kadimɔ nɔ ni ba beni Odasefoi enyɔ kɛ September 8, 1996 Awake! lɛ ha adafitswaa wolo mli niŋmalɔ ko lɛ. Eŋma akɛ: “Dani maná hegbɛ ni makɛɛ akɛ mibɛ he miishɛɛ lɛ, mɔ kome kɛfata he akɛ: ‘Sane ko yɛ mli ni wieɔ Amerika Indiabii ahe. Wɔle akɛ oŋmaa nibii babaoo yɛ sane lɛ he.’ ” Ehe wolo lɛ, ni beni eyeɔ leebi niyenii lɛ, ekane sane ni kɔɔ Indiabii lɛ ahe, ni sɛɛ mli lɛ ekpɛlɛ nɔ akɛ “enɔ bɛ” ni “eyeɔ anɔkwa kɛmɔɔ shi kwraa.”
6 Mɛni Ji Nɔ ni Mɛi ni Yɔɔ Oshikpɔŋkuku lɛ Mli lɛ Nyaa He? Mɛni ji nɔ ni ona yɛ woji tɛtrɛbii lɛ amli nyɛsɛɛ nyɔji nɛɛ ni ekolɛ shwapotsɛmɛi kɛ woloŋlelɔi ni yɔɔ oshikpɔŋkuku lɛ mli loo onanemɛi, nanemɛi nitsulɔi, kɛ klasbii baana he miishɛɛ? Mɛni ji nɔ titri ni mlalelɔi, tsɔɔlɔi, weku kɛ skul he ŋaawolɔi, oblahii kɛ oblayei ahe aŋaawolɔi, adesai ashihilɛ he sɔɔlɔi, okwaafoi, wolɛi, kɛ datrɛfoi lɛ baaná he miishɛɛ? Mɛi ni yɔɔ shihilɛi sɔrɔtoi amli ni oshiɛɔ otsɔɔ amɛ lɛ ní oooha amɛhi ojwɛŋmɔ mli yɛ be mli ni opɛiɔ wolo lɛ eko fɛɛ eko mli lɛ baaha oná gbɛ̀i ni hi jogbaŋŋ koni okɛgbɛ anɔkwa wiemɔ lɛ oshwã.
7 Kɛ oná mɔ ko ni jieɔ miishɛɛ krɛdɛɛ ko kpo yɛ Watchtower loo Awake! lɛ mli saji lɛ ekomɛi ahe ni eheɔ woji tɛtrɛbii lɛ, obaanyɛ okɛɛ akɛ: “Kɛ mina sane ko yɛ nɔ ni baaba wɔsɛɛ lɛ mli, ni minu he akɛ obaana he miishɛɛ lɛ, manya he akɛ mikɛ eko abaha bo.” Obaanyɛ okɛ mɔ lɛ afata mɛi ni okɛ woji tɛtrɛbii haa daa lɛ ahe, ni ofɔ lɛ saramɔ kpitiokpitio kɛ woji tɛtrɛbii heei ni eba lɛ. No tamɔ bɔ ni feɔ ni akuɔ sɛɛ ayasaraa aŋkroaŋkroi ni ekolɛ amɛjie miishɛɛ kpo yɛ saji komɛi ni je kpo yɛ wɔ woji tɛtrɛbii lɛ amli lɛ nɔŋŋ.
8 Okɛ Mumɔŋ Otii Amamɔ Ohiɛ: Afii fioo komɛi ni eho nɛ lɛ, nuu ko ni sumɔɔ nitsumɔ waa lɛ he Awake! wolo tɛtrɛɛ ni wieɔ sane ko ni eyɔɔ he miishɛɛ lɛ he. Shi kɛlɛ, nɛkɛ nuu ni sumɔɔ jamɔ nɛɛ hu kane nɔ ni fata he ni ji Buu-Mɔɔ lɛ ni sane ni yɔɔ mli lɛ ha epɛi Triniti ni ekɛ ewala be fɛɛ ehe eye lɛ mli. Nyɔji ekpaa sɛɛ lɛ abaptisi lɛ! No hewɔ lɛ, kaashashao shi akɛ okɛ wɔ woji tɛtrɛbii lɛ kanelɔi lɛ baaje mumɔŋ sanegbai ashishi. Obaanyɛ ojie wolo bibioo ni ji Mɛni Nyɔŋmɔ Taoɔ yɛ Wɔdɛŋ? lɛ kpo otsɔɔ, ni okɛɛ akɛ okɛ minitii fioo baasusu nikasemɔ kome he be fɛɛ be ni obaaku osɛɛ okɛ woji tɛtrɛbii heei lɛ ekomɛi baaba lɛ.
9 Ha mɛi ni obaafee sɛɛsaramɔ yɛ amɛŋɔɔ kɛ mɛi ni okɛ amɛ shãraa yɛ onitsumɔ mli lɛ ateŋ mɛi ni ekolɛ amɛbaasumɔ ni amɛná Buu-Mɔɔ kɛ Awake! woji tɛtrɛbii heei lɛ ahi ojwɛŋmɔŋ. No sɛɛ lɛ bɔɔ mɔdɛŋ waa ni onine ashɛ amɛnɔ. Okɛ woji tɛtrɛbii ni jara wa nɛɛ aya mɛi babaoo aŋɔɔ bɔ ni ooonyɛ. Wo amɛ hewalɛ ni amɛshɛ. Ni ohiɛ akakpa nɔ kɔkɔɔkɔ akɛ yɛ be mli ni obɔɔ mɔdɛŋ koni oye obua mɛi babaoo ni amɛkane wɔ woji tɛtrɛbii lɛ, belɛ, ‘ooshɛ́ oboloo oofɔ̃ nu hiɛ.’ Yɛ be ni sa mli lɛ, ekolɛ obaaye omanye yɛ wɔsɛɛ be nanemɛi kaselɔi ataomɔ mli.—Jaj. 11:1, 6.