Wɔbaanyɛ Wɔtsu Nitsumɔi Wuji
1 Nitsumɔi ni ekaaa kadi Yesu Kristo shiɛmɔ nitsumɔ lɛ. Elɛ mɛi akpei abɔ yɛ naakpɛɛ gbɛ nɔ, etsa mɛi babaoo, ni etée mɛi komɛi ashi kɛjɛ gbele mli. (Mat. 8:1-17; 14:14-21; Yoh. 11:38-44) Enitsumɔ lɛ gbala maŋ muu lɛ fɛɛ jwɛŋmɔ. Ni kɛlɛ, yɛ gbi gbɛkɛ dani ebaagbo lɛ, ekɛɛ enɔkwa sɛɛnyiɛlɔi lɛ akɛ: “Mɔ ni heɔ minɔ eyeɔ lɛ, nitsumɔi ni mitsuɔ lɛ, lɛ hu eeetsu, ni eeetsu nii ni fe nomɛi tete.” (Yoh. 14:12) Mɛɛ gbɛ nɔ wɔɔnyɛ wɔtsɔ wɔtsu nitsumɔi ‘wuji’ yɛ?
2 Kɛtsɔ Shikpɔŋkukuji Babaoo ni Wɔɔtsu Amɛmli Nii lɛ Nɔ: Yesu nitsumɔi hé shi yɛ Palestina pɛ, yɛ be mli ni akɛɛ emra beaŋ kaselɔi lɛ koni amɛye odase “kɛyashi shikpɔŋ lɛ naagbeehei lɛ,” ní jɛkɛ fe he ni Yesu diɛŋtsɛ shiɛ yɛ lɛ. (Bɔf. 1:8) Amrɔ nɛɛ, shiɛmɔ nitsumɔ ni eje shishi lɛ ekpele jeŋ fɛɛ, ni eyashɛ shikpɔji 232 nɔ. (Mat. 24:14) Ani ooná shikpɔŋkuku ni akɛha nyɛ asafo lɛ mli nitsumɔ lɛ mli gbɛfaŋnɔ kɛmiimɔ shi?
3 Kɛtsɔ Mɛi Babaoo ni Wɔnine Aaashɛ Amɛnɔ lɛ Nɔ: Yesu shi kaselɔi fioo pɛ yɛ esɛɛ koni amɛtsa shiɛmɔ nitsumɔ lɛ nɔ. Shi kɛlɛ, nɔ ni jɛ ekãa ni amɛkɛye odase yɛ Pentekoste afi 33 Ŋ.B. lɛ mli ba ji akɛ, mɛi ni here anɔkwale lɛ nɔ ni abaptisi amɛ yɛ nakai gbi lɛ nɔ lɛ ayibɔ shɛɔ susumai akpei etɛ. (Bɔf. 2:1-11, 37-41) Mɛi abɔ ni “ajie ato naanɔ wala” lɛ anaabuamɔ lɛ étee nɔ kɛbashi wɔbe nɛɛ, yɛ be mli ni abaptisiɔ mɛi ni kɛ aja mli lɛ amɛyifa fe mɛi 1,000 daa gbi lɛ. (Bɔf. 13:48) Ani oofee nɔ fɛɛ nɔ ni ooonyɛ koni onine anyɛ ashɛ mɛi ni hiɛ tsui kpakpa lɛ anɔ yɛ he fɛɛ he ni abaana amɛ yɛ, ni oyadi miishɛɛ ni ajie lɛ kpo lɛ sɛɛ oya nɔŋŋ bɔ ni ooonyɛ?
4 Kɛtsɔ Be ni Fa ni Wɔkɛaashiɛ lɛ Nɔ: Yesu kɛ afii etɛ kɛ fã tsu esɔɔmɔ nitsumɔ lɛ yɛ shikpɔŋ lɛ nɔ. Wɔteŋ mɛi babaoo kɛ be babaoo ni fe nakai miishiɛ. Ekɔɔɔ he eko be sɛɛkɛlɛ ni aaaŋmɛ wɔ gbɛ ni wɔkɛtsa nitsumɔ nɛɛ nɔ lɛ, wɔyɛ he miishɛɛ akɛ wɔɔye wɔbua kaselɔ hee fɛɛ kaselɔ hee koni eje shishi ni ebɔi wala gbɛ lɛ nɔ nyiɛmɔ. (Mat. 7:14) Ani ooná babaoo tsumɔ daa nyɔŋ nɔ yɛ Nuntsɔ lɛ nitsumɔ lɛ mli?—1 Kor. 15:58.
5 Wɔbaanyɛ wɔná hekɛnɔfɔɔ akɛ kɛtsɔ wɔsɛɛ ni Yesu fiɔ lɛ nɔ lɛ, wɔbaatsu nitsumɔi wuji lolo akɛ enɔkwa kaselɔi.—Mat. 28:19, 20.