Nyɛtswaa Nyɛhe Nyɛmaa Shi Kɛtsɔ Saji Ahetoohamɔi Anɔ yɛ Kpeei Ashishi
1 Awoɔ wɔ hewalɛ yɛ Hebribii 10:24 koni ‘wɔkanyakanyaa wɔhe yɛ suɔmɔ kɛ nitsumɔi kpakpai ahe.’ Nɔ ni fata enɛ he ji wɔhe hewalɛ ni wɔwoɔ kɛtsɔ saji ahetoohamɔi ni shishinumɔ yɔɔ he ni wɔkɛhaa yɛ asafoŋ kpeei ashishi lɛ nɔ. Mɛni hewɔ esa akɛ wɔha sane hetoo lɛ? Mɛɛ gbɛ nɔ wɔɔnyɛ wɔfee enɛ yɛ? Namɔ baaná he sɛɛ?
2 Susumɔ shii abɔ ni onáa mɛi krokomɛi awiemɔi kukuji ni yɔɔ faŋŋ ni onuɔ lɛ he sɛɛ, ni haa oniiashishinumɔ yaa hiɛ, ni ewoɔ bo hewalɛ yɛ mumɔŋ lɛ he okwɛ. Oyɛ hegbɛ akɛ ofeɔ nakai nɔŋŋ ohaa amɛ. Kɛ okɛ ohe wo mli lɛ, otsɔɔ akɛ oosumɔ ni ‘okɛ mumɔŋ duromɔ keenii lɛ eko aha’ koni okɛwo mɛi fɛɛ ni eba kpee lɛ shishi lɛ hewalɛ.—Rom. 1:11, 12.
3 Bɔ ni Ooofee Oha Saji Ahetooi Jogbaŋŋ: Kaaha saji ahetooi kakadaji, ní oowie oti fɛɛ oti ni yɔɔ kuku lɛ mli lɛ he. Bei pii lɛ, saji ahetoohamɔi kakadaji lɛ emaaa hetoo lɛ diɛŋtsɛ nɔ mi, ni ebaanyɛ eje mɛi krokomɛi ni kɛ amɛ he baawo mli lɛ anijiaŋ wui. Esaaa akɛ klɛŋklɛŋ hetoo ni ahaa yɛ kuku lɛ he lɛ sɛɛ kɛɔ, ni esa akɛ aha sanebimɔ ni akala lɛ hetoo lɛ afee tɛ̃ɛ. No sɛɛ lɛ, mɛi ni kɛ saji krokomɛi fataa he lɛ baanyɛ atsɔɔ bɔ ni abaanyɛ akɛ sane lɛ atsu nii loo bɔ ni ŋmalɛi lɛ kɔɔ sane lɛ he.—Kwɛmɔ School Guidebook, baafai 90-92.
4 Kɛ saji ahetoo ni oooha lɛ he susumɔ haa ofeɔ yeyeeye lɛ, no lɛ, saamɔ sane hetoohamɔ ko ni yɔɔ kuku kɛtsɔ hiɛ, ni okɛɛ nɔkwɛlɔ lɛ ni etsɛ bo yɛ nakai kuku lɛ mli. Yɛ be mli ni ofee enɛ yɛ kpeei fioo komɛi ashishi sɛɛ lɛ, ohe ni okɛaawo mli lɛ baafee nɔ ni yɔɔ mlɛo. Kaimɔ akɛ, Mose kɛ Yeremia tsɔɔ akɛ amɛbɛ hekɛnɔfɔ̃ɔ yɛ nyɛmɔ ni amɛkɛaawie yɛ maŋ lɛ he. (2 Mose 4:10; Yer. 1:6, NW shishigbɛ niŋmaa.) Shi Yehowa ye ebua amɛ ni amɛwie yɛ egbɛfaŋ, ni ebaaye ebua bo hu.
5 Namɛi Baaná Osaji Ahetoohamɔi Ahe Sɛɛ? Bo diɛŋtsɛ onáa he sɛɛ ejaakɛ osaji ahetoohamɔi lɛ nyɛmɔɔ anɔkwale lɛ nɔ babaoo ewoɔ ojwɛŋmɔ kɛ otsui mli, ni ehaa efeɔ mlɛo kɛhaa bo akɛ oookai saji lɛ sɛɛ mli. Agbɛnɛ hu, mɛi krokomɛi náa owiemɔi ni tswaa mɔ emaa shi ni amɛnuɔ lɛ he sɛɛ. Awoɔ wɔ hewalɛ, kɛji mɛi fɛɛ, mɛi ni yɔɔ niiashikpamɔ jio, mɛi ni hiɛ gboiɔ jio, loo mɛi heei lɛ bɔ mɔdɛŋ akɛ amɛaawie amɛhemɔkɛyeli lɛ he yɛ asafoŋ kpeei ashishi.
6 Wɔyɛ nɔmimaa akɛ wɔɔna akɛ, ‘wiemɔi ni awieɔ yɛ be ni sa mli lɛ hi’ kɛ́ akɛtsu nii koni akɛtswa mɛi fɛɛ ama shi yɛ kpeei ashishi lɛ!—Abɛi 15:23.