Sanebimɔ He
◼ Te abaafee tɛŋŋ aye abua mɔ ko ni ekpa shiɛmɔyaa etsɛ lɛ koni ehe asa ekoŋŋ akɛ sanekpakpa lɛ shiɛlɔ?
Kɛ mɔ ni ekpa shiɛmɔyaa lɛ jie kpo etsɔɔ faŋŋ akɛ eyɛ suɔmɔ ni jɛ tsuiŋ akɛ ebaasɔmɔ Yehowa lɛ, enɛ bafeɔ miishɛɛ sane waa. (Luka 15:4-6) Eeenyɛ efee akɛ, mɔ lɛ ha shitee-kɛ-woo loo shihilɛ mli nɔnyɛɛi tsĩ eteemɔŋ nikasemɔ, kpeeiyaa, kɛ shiɛmɔ nitsumɔ ni ekɛ ehe baawo mli lɛ naa. Te abaafee tɛŋŋ akɛ yelikɛbuamɔ ni hi fe fɛɛ aha bɔni afee ni eya ehiɛ yɛ mumɔŋ?
Esa akɛ wɔ fɛɛ wɔŋɔ hegbɛ lɛ ni wɔma nɔ mi wɔha nɛkɛ mɔ nɛɛ akɛ wɔyɛ Kristofoi asuɔmɔ kpakpa kɛha lɛ. Onukpai lɛ ahe baafee oyá koni amɛkwɛ nɔ̃ diɛŋtsɛ ni ji emumɔŋ hiamɔ nii. (Yak. 5:14, 15) Kɛ ekɛ nyɔji ni faaa tsɔ̃ kpa shiɛmɔyaa lɛ, yelikɛbuamɔ ni shiɛlɔ ni he esa kɛbaaha lɛ lɛ, baafee nɔ pɛ ni he hiaa koni eha mɔ lɛ kɛ ehe awo shiɛmɔ nitsumɔ lɛ mli ekoŋŋ. Shi kɛlɛ, kɛ́ mɔ ni ekpa shiɛmɔyaa lɛ kɛ asafo lɛ ebɔɔɔ yɛ be kpalaŋŋ mli lɛ, no lɛ ekolɛ ehe baahia ni akɛ yelikɛbuamɔ babaoo aha lɛ. Bɔni afee ni atswa ehemɔkɛyeli kɛ ehiɛsɔɔ ama shi lɛ, ebaafee nɔ ni nilee yɔɔ mli akɛ akɛ wolo ko ni sa atsu nii ni akɛ lɛ afee teemɔŋ Biblia mli nikasemɔ. Kɛ́ eba lɛ nakai lɛ, sɔɔmɔ nitsumɔ nɔkwɛlɔ lɛ baato gbɛjianɔ koni shiɛlɔ ko ni he esa kɛ lɛ akase nii. (Heb. 5:12-14; kwɛmɔ November 1998 Wɔ Maŋtsɛyeli Sɔɔmɔ lɛ Sanebimɔ He.) Kɛ ole mɔ ko ni yelikɛbuamɔ ni tamɔ nɛkɛ he miihia lɛ lɛ, kɛɛmɔ sɔɔmɔ nitsumɔ nɔkwɛlɔ ni yɔɔ nyɛ asafo lɛ mli lɛ.
Dani ooofɔ̃ nine otsɛ́ mɔ ko ni kɛ nyɔji pii ekpa shiɛmɔyaa lɛ koni ekɛ ehe awo shiɛmɔ nitsumɔ lɛ mli ekoŋŋ lɛ, nilee yɛ mli akɛ onukpai enyɔ kɛ lɛ aaakpe koni amɛkwɛ kɛji akɛ ehe saa akɛ Maŋtsɛyeli shiɛlɔ. Amɛkɛ gbɛtsɔɔmɔ ko ni tamɔ nɔ ni akɛtsuɔ nii lɛ nɔŋŋ baatsu nii tamɔ bɔ ni afeɔ beni akɛ mɛi heei ni taoɔ akɛ amɛhe aaasa akɛ sanekpakpa lɛ shiɛlɔi lɛ kpeɔ lɛ. (Kwɛmɔ November 15, 1988 Watchtower lɛ baafa 17.) Esa akɛ mɔ ni ekpa shiɛmɔyaa lɛ aná suɔmɔ ni mli wa akɛ eeegba mɛi krokomɛi sanekpakpa lɛ. Ehe miihia ni eshɛ taomɔ nibii bibii ni atsɔɔ yɛ Our Ministry wolo lɛ baafai 98-99 lɛ ahe ni eya asafoŋ kpeei daa.
Mumɔŋ gbɛjianɔtoo kpakpa ni mɔ ni kuɔ esɛɛ ebaa ekoŋŋ lɛ aaaná lɛ baatsu babaoo koni eye ebua lɛ ni eha ekɛ Yehowa teŋ wekukpaa ni jara wa lɛ mli awa ni ehiɛ mli ni enyiɛ naanɔ wala gbɛ lɛ nɔ daa. (Mat. 7:14; Heb. 10:23-25) “Mɔdɛŋbɔɔ fɛɛ” ni ekɛaatsu nii ni ená Kristofoi asui ni fĩɔ shi lɛ haŋ efee ‘hejɔ̃lɔ loo mɔ ni wooo yibii’ dɔŋŋ gbi ko gbi ko ákɛ Kristofonyo kaselɔ.—2 Pet. 1:5-8.