Gbi Kome Kpee Krɛdɛɛ He Gbɛjianɔtoo Hee

Gbi kome kpee krɛdɛɛ he gbɛjianɔtoo ni jeɔ shishi kɛjɛ July 2000 lɛ yitso ji: “Nyɔŋmɔ Nibii ni Mli Kwɔlɔ lɛ ni Aaatao Mli.” (1 Kor. 2:10) Mɛɛ nibii ni sɛɛnamɔ yɔɔ he wɔbaakase?

Yɛ be mli ni mɛi babaoo taoɔ nilee lɛ, nɔ ni amɛnine shɛɔ nɔ lɛ haaa amɛhe ajɔ amɛ. Biblia lɛ woɔ wɔ hewalɛ, taakɛ kpokpaa nɔkwɛlɔ lɛ baatsɔɔ yɛ ewiemɔ ni ji “Nyɔŋmɔ Wiemɔ lɛ Mlitaomɔ Haa Mɔ Hejɔɔmɔ” lɛ mli lɛ. Saralɔ ni baaha wiemɔ lɛ, baaha ana tsakpãa ni kãa Nyɔŋmɔ nibii ni mli kwɔlɔ lɛ amlitaomɔ kɛ sanekpakpa lɛ shiɛmɔ lɛ teŋ, yɛ be mli ni ehaa sanebimɔ ni ji “Te Onaa Maŋtsɛyeli Shiɛmɔ lɛ Ohaa Tɛŋŋ?” lɛ hetoo lɛ.

Te fɔlɔi aaafee tɛŋŋ amɛye amɛbua amɛbii lɛ koni amɛbote Nyɔŋmɔ Wiemɔ lɛ mli vii? Akɛ gbɛtsɔɔmɔi ni anyɛɔ akɛtsuɔ nii baaha yɛ wiemɔ ni ji “Dũ Nyɔŋmɔ Wiemɔ lɛ Owo Obii Amli” lɛ mli. Anáa Kristofoi oblahii kɛ oblayei lɛ anɔ hewalɛ kpakpa yɛ mɛi ni edara yɛ mumɔŋ yɛ asafo lɛ mli lɛ ni amɛkɛ amɛ bɔɔ lɛ hewɔ. Abaama nɔkwɛmɔnii ni tsɔɔ bɔ ni anáa amɛnɔ hewalɛ kpakpa lɛ nɔ mi yɛ wiemɔ ni ji “Oblahii kɛ Oblayei ni Kaseɔ Nii Kɛjɛɔ Mɛi ni Edara lɛ Aŋɔɔ” lɛ mli.

Mɛni hewɔ esa akɛ wɔkɛ ekãa atao mumɔŋ jwetri ni aŋɔtee lɛ yɛ nɛkɛ be nɛɛ mli? Yehowa ji teemɔŋ saji Akpojielɔ. Saralɔ ni baaha wiemɔ lɛ baatsɔɔ nɔ ni Yehowa ejie kpo etsɔɔ yɛ blema kɛ ŋmɛnɛŋmɛnɛ beaŋ yɛ wiemɔ ni ji “Yehowa Jieɔ Nibii ni Mli Kwɔlɔ lɛ Akpo Fiofio” lɛ mli. Enɛ baawaje wɔyiŋ ni wɔkpɛ akɛ wɔɔya nɔ ‘wɔtao Nyɔŋmɔ nibii ni mli kwɔlɔ lɛ amli’ lɛ.

Too gbɛjianɔ amrɔ nɛɛ ní oya eko. Mɛi ni sumɔɔ ni amɛfee amɛhenɔjɔɔmɔ kɛha Yehowa lɛ he okadi kɛtsɔ baptisimɔ nɔ lɛ akɛɛ onukpai asɛinɔtalɔ lɛ mra bɔ ni amɛaanyɛ. Saji ni wɔbaanu lɛ baaha bɔ ni wɔshweɔ diɛŋtsɛ akɛ wɔɔtao Nyɔŋmɔ Wiemɔ lɛ mli vii lɛ mli awa. No hewɔ lɛ, kaaha mumɔŋ tsɔsemɔ gbi krɛdɛɛ nɛɛ miiŋmɛɛ bo!