Kasemɔ Yehowa ni Kwɛɛɛ Hiɛaŋ Lɛ
1 Yehowa susuɔ mɛi ahe. Ekpɛlɛɔ mɔ fɛɛ mɔ ni feɔ esuɔmɔnaa nii lɛ nɔ, ni ekwɛɛɛ mɛi ahiɛaŋ. (Bɔf. 10:34, 35) Yesu hu kwɛɛɛ hiɛaŋ, beni eshiɛɔ etsɔɔ mɛi lɛ. (Luka 20:21) Esa akɛ wɔkase amɛ nɔkwɛmɔnɔ lɛ, taakɛ Paulo fee lɛ, mɔ ni ŋma akɛ: “Nuntsɔ kome amɛ fɛɛ amɛyɔɔ, ni niiatsɛ hu ji lɛ ha mɛi fɛɛ ni boɔ tsɛ́ɔ lɛ lɛ.”—Rom. 10:12.
2 Nyɔŋmɔ Maŋtsɛyeli lɛ he sanekpakpa ni wɔjajeɔ wɔtsɔɔ mɛi fɛɛ ni wɔkɛkpeɔ lɛ kɛ anunyam haa Nyɔŋmɔ. Esa akɛ wɔgba mɛi krokomɛi sanekpakpa ni yɔɔ miishɛɛ nɛɛ daa ní amɛ hewolonɔ su, gbɛhe ni amɛyɔɔ, woloŋlee loo shika ni amɛyɔɔ lɛ kɔɔɔ he eko. (Rom. 10:11-13) Enɛ tsɔɔ akɛ esa akɛ wɔshiɛ wɔtsɔɔ mɛi ni baabo toi—hii, yei, gbekɛbii, kɛ mɛi ni egbɔlɔ. Esa akɛ wɔya shinaai fɛɛ anaa koni wɔkɛ hegbɛ lɛ aha shiatsɛ fɛɛ shiatsɛ koni ebo anɔkwale lɛ toi.
3 Ná Mɔ Fɛɛ Mɔ He Miishɛɛ: Oti ni ma wɔhiɛ ji akɛ ni wɔya mɔ fɛɛ mɔ ŋɔɔ bɔ ni wɔɔnyɛ. Akɛni enɛ yɛ shiɛlɔi komɛi ajwɛŋmɔ mli hewɔ lɛ, amɛye omanye yɛ be mli ni amɛyeɔ mɛi odase yɛ datrɛfoi a-ɔfis mli, helatsamɔhei, maŋ yelikɛbuamɔ nitsumɔhei, kɛ hei ni atsɔseɔ mɛi yɛ koni amɛhe aba sɛɛnamɔ. Kɛfata he lɛ, shiɛlɔi eye skul nɔkwɛlɔi kɛ ŋaawolɔi, kɛ kojolɔi odase. Be mli ni oyaa maŋ nitsulɔi aŋɔɔ lɛ, esa akɛ otsɔɔ akɛ ohiɛ sɔɔ nii ni amɛtsuɔ kɛyeɔ buaa yɛ akutso lɛ mli lɛ. Jiemɔ bulɛ kpo otsɔɔ, ní ohala saji ni yɔɔ amɛbe naa ni wieɔ nitsumɔ pɔtɛɛ ni amɛtsuɔ lɛ he kɛ naagbai ni fata nitsumɔ lɛ he.
4 Be ko lɛ, nyɛmi yoo ko bɔ mɔdɛŋ ekɛ kojolɔ ko wie yɛ e-ɔfis. Beni agba sane kɛ miishɛɛ agbe naa lɛ, ejɛ etsuiŋ ewie wiemɔ nɛɛ: “Ani ole nɔ ni misumɔɔ yɛ Yehowa Odasefoi ahe? Amɛyɛ shishitoo mlai ni ma shi shiŋŋ ni amɛtsiii amɛhe kɛjɛɛɛ he kwraa.” Aye mɔ ni náa mɔ shihilɛ nɔ hewalɛ waa nɛɛ odase jogbaŋŋ.
5 Wɔnyɛŋ wɔle nɔ ni yɔɔ gbɔmɛi atsuii amli. Shi kɛlɛ, kɛ́ wɔkɛ mɔ fɛɛ mɔ ni wɔkɛkpeɔ lɛ wie lɛ, wɔtsɔɔ akɛ wɔyɛ hemɔkɛyeli yɛ Nyɔŋmɔ mli akɛ ebaanyɛ ekudɔ wɔnitsumɔ lɛ. Kɛfata he lɛ, enɛ haa mɛi lɛ náa hegbɛ akɛ amɛaabo hiɛnɔkamɔ he shɛɛ sane lɛ toi ni amɛtsu he nii. (1 Tim. 2:3, 4) Nyɛhaa wɔkɛ wɔbe atsua nii yɛ nilee mli ni wɔbɔ mɔdɛŋ wɔkase Yehowa ni kwɛɛɛ hiɛaŋ lɛ kɛtsɔ sanekpakpa lɛ ni wɔkɛaaya mɛi fɛɛ ŋɔɔ lɛ nɔ bɔ ni wɔɔnyɛ.—Rom. 2:11; Efe. 5:1, 2.