Akɛ Sanekpakpa lɛ Miiya Gbɔmɛi Babaoo Ŋɔɔ Lolo

BENI misusuɔ gbɔmɛi ni yɔɔ maŋ heni miyɔɔ lɛ ahe lɛ, miyɔse akɛ amɛteŋ mɛi babaoo le Yehowa Odasefoi kɛtsɔ adafitswaa woji pɛ anɔ. Misusu akɛ, ehe miihia ni aya gbɔmɛi nɛɛ aŋɔɔ, bɔni afee ni amɛle mɛi ni Yehowa Odasefoi ji, kɛ nɔ diɛŋtsɛ ni amɛheɔ amɛyeɔ. Shi te mafee tɛŋŋ maye mabua? Miwu ji Kristofonyo nukpa, ni ekɛ gbɛtsɔɔmɔ kɛ ŋaawoo ni nilee yɔɔ mli ha mi.

Wɔná ŋaawoo ko ni sa kɛjɛ saneyitso ni ji “Woji Tɛtrɛbii ni Kɛ Miishɛjemɔ ni Anyɛɔ Atsuɔ He Nii Haa,” ni aŋma awo January 8, 1995 Awake! wolo tɛtrɛɛ lɛ mli lɛ mli. Wolo lɛ kɛɔ yɛ Odasefonyo ko nitsumɔ he akɛ: “Ehaa efeɔ oti ni ma ehiɛ akɛ eeebua Awake! woji tɛtrɛbii memeji ni Odasefoi krokomɛi ebua naa yɛ amɛshiai amli lɛ anaa. Kɛkɛ lɛ, eyaa nitsumɔhei ni enuɔ he akɛ ekolɛ amɛbaajie miishɛɛ krɛdɛɛ kpo yɛ yitsei lɛ ekomɛi ahe lɛ aŋɔɔ.”

Kɛtsɔ miwu yelikɛbuamɔ nɔ lɛ, etsɛɛɛ ni mibua woji tɛtrɛbii lɛ ohai abɔ naa. Mijɛ enɛɛmɛi amli minyɛ mihala saji sɔrɔtoi ni baasa gbɔmɛi ni mabɔ mɔdɛŋ akɛ maya amɛŋɔɔ lɛ.

Kɛtsɔ tɛlifoŋ gbɛtsɔɔmɔi ahe wolo kɛ maŋ lɛ he saji kɛ nitsumɔ nɔ lɛ, miŋmala hei ni kɔɔ helatsamɔhei, wɔɔhei kɛha gbekɛbii yɛ be mli ni amɛmiifã gbɛ, kɛ hei ni akwɛɔ gbekɛbii yɛ lɛ ahe lɛ mifɔ shi. Miŋmala yarafeemɔi ahe gbɛjianɔtolɔi, skul nɔkwɛlɔi kɛ mlalelɔi, datrɛfoi kɛ gbɔmɛi ni tsuɔ nii yɛ tsũŋwoohei kɛ kojomɔhei lɛ hu agbɛi mifɔ shi. Gbɔmɛi ni kɛ dãa kɛ tsofai fɔji tsuɔ nii yɛ gbɛ ni esaaa nɔ ahe nikasemɔhei, shihilɛ mli saji anitsumɔ kui, kui kɛha kpajelɔi kɛ ta mli nɔnalɔi anɔkwɛlɔi, kɛ niyenii he nikasemɔhei hu fata nibii ni miŋmala mishwie shi lɛ he. Asaŋ mikuuu mihiɛ mifɔɔɔ onukpai ni kwɛɔ nitsumɔhe kɛha shihilɛ hilɛ-kɛhamɔ, kɛ weku saji anɔ lɛ nɔ.

Mɛni Makɛɛ?

Nɔ ni mifeɔ klɛŋklɛŋ kɛ mitee mɔ ko saramɔ lɛ ji akɛ, mijieɔ mihe shi mitsɔɔ yɛ faŋŋ mli. Kɛkɛ lɛ mikɛɔ akɛ, misaramɔ lɛ baanyɛ ahe minitii fioo ko pɛ.

Kɛ mina onukpa lɛ hiɛ kɛ hiɛ lɛ, mikɛɔ akɛ: “Yehowa Odasefoi lɛ ateŋ mɔ kome ji mi. Shi kɛlɛ mibaaa biɛ koni mikɛ bo aná jamɔ he sanegbaa ko, ni ji nɔ ko ni ekolɛ esaaa akɛ afeɔ yɛ be mli ni aatsu nii.” Bei pii lɛ shihilɛ lɛ bafeɔ nɔ ni sa jogbaŋŋ. No sɛɛ lɛ, yɛ be mli ni mikɛ miwiemɔ lɛ toɔ shihilɛ lɛ he lɛ, mitsaa nɔ akɛ: “Yiŋtoi enyɔ yɔɔ misaramɔ lɛ sɛɛ. Klɛŋklɛŋ lɛ, miisumɔ ni maha nyɛ ayekoo yɛ nii ni nyɛ nitsumɔhe lɛ tsuɔ lɛ hewɔ. Kɛ hoo kwraa lɛ, esaaa akɛ akuɔ hiɛ afɔɔ be kɛ hewalɛ ni mɔ ko fiteɔ yɛ maŋ lɛ hewɔ lɛ nɔ. Lɛɛlɛŋ, enɛ sa yijiemɔ.” Yɛ bei pii amli lɛ, efeɔ gbɔmɔ ni miyaa eŋɔɔ yɛ nɛkɛ gbɛ nɔ lɛ naakpɛɛ.

Kɛbashi amrɔ nɛɛ, etamɔ nɔ ni mɔ lɛ miisusu nɔ ni yiŋtoo ni ji enyɔ ni yɔɔ misaramɔ lɛ sɛɛ lɛ he lɛ ji. Mitsaa nɔ akɛ: “Yiŋtoo ni ji enyɔ ni yɔɔ misaramɔ lɛ sɛɛ lɛ ji enɛ: Mihala saji komɛi ni wieɔ nitsumɔ ni tamɔ onɔ lɛ pɛpɛɛpɛ, kɛ naagbai ni yɔɔ mli lɛ he kɛjɛ wɔ Awake! wolo tɛtrɛɛ lɛ ni afee kɛha maji maji lɛ mli kɛha bo. Miheɔ miyeɔ akɛ obaasumɔ koni ole bɔ ni wolo kɛha maji maji lɛ susuɔ naagbai nɛɛ ahe ehaa. Masumɔ koni mashi woji nɛɛ maha bo.” Bei pii lɛ amɛkɛɔ mi akɛ amɛhiɛ sɔɔ mimɔdɛŋbɔi lɛ.

Nɔ ni Jɛɔ Mli Baa lɛ He yɛ Sɛɛnamɔ kɛ Naakpɛɛ

Bei pii lɛ kɛ́ mitsu he nii yɛ nɛkɛ gbɛ nɔ lɛ, aboɔ mi toi kɛ miishɛɛ; yɛ gbɔmɛi 17 ni mikɛ amɛwie lɛ mli lɛ, mɔ kome pɛ kpoo mi. Miná niiashikpamɔi babaoo ni yɔɔ naakpɛɛ, ni amɛhe yɔɔ sɛɛnamɔ.

Akɛ nɔkwɛmɔnɔ lɛ, beni mika shii ejwɛ, ni mikɛ tsuishitoo emɛ sɛɛ lɛ, minyɛ mikɛ kpokpaa wulu skul nɔkwɛlɔ ko kpe yɛ omanyeyeli mli. Eji nuu ko ni bɛ deka kwraa. Kɛlɛ, ekɛ mi gba sane be fioo ko kɛ miishɛɛ. Beni mishiɔ lɛ, ekɛɛ akɛ: “Mihiɛ esɔ omɔdɛŋbɔɔ lɛ, ni bɔ fɛɛ bɔ ni fee lɛ makane owolo lɛ jogbaŋŋ.”

Be kroko lɛ mitee kpokpaa wulu kojomɔhe ko, ni miyana kojolɔ onukpa lɛ, eji nuu onukpa ko ni eda saŋŋ. Beni mibote e-ɔfis lɛ, ewo ehiɛ nɔ kɛjɛ ewoji ni ekaneɔ lɛ nɔ ni ekwɛ mihiɛ kɛ mlifu.

Ekɛ mlifu kɛɛ akɛ: “Jufɔ leebi pɛ mikɛtsuɔ nii, nakai be mli mana be kɛha sane fɛɛ sane.”

Miha hetoo oya akɛ: “Miikpa fai akɛ miba yɛ be ni esaaa mli,” ni mikɛfata he akɛ, “Shi masumɔ ni maku misɛɛ be kroko. Shi yɛ anɔkwale mli lɛ, mi biɛ baa lɛ ji teemɔŋ sane ko.”

Agbɛnɛ kojolɔ lɛ miitao ele. Ekɛ gbee ni mlifu bɛ mli tsɔ bi mi nɔ ni mitaoɔ. Ni misaa miha hetoo ekoŋŋ akɛ maku misɛɛ ekoŋŋ Jufɔ.

Ema nɔ mi yɛ gbɛ ni fee mi naakpɛɛ nɔ akɛ, “Ofainɛ, ni ota shi.” “Mɛni otaoɔ?”

Sanegbaa kɛ miishɛɛ tsa nɔ, ni ekpa mi fai, yɛ naanyobɔɔ su ni eyajieee lɛ kpo kɛjɛ shishijee, ejaakɛ ebɛ deka kwraa lɛ hewɔ.

Yɛ sɛɛ mli lɛ, kojolɔ lɛ bi akɛ: “Ole nɔ ni misumɔɔ yɛ Yehowa Odasefoi lɛ ahe? Amɛyɛ shishitoo mlai ni nɔ bɛ ni amɛtsiii amɛhe kɛjɛɛɛ he. Hitler bɔ mɔdɛŋ fɛɛ ni eeenyɛ, shi Odasefoi lɛ eyaaa ta.”

Beni wɔteŋ mɛi enyɔ bote ɔfis kome ko mli lɛ, woloŋmalɔi ni yɔɔ jɛmɛ lɛ yɔse wɔ. Ni nitsumɔhe lɛ he gbɛjianɔtoo woloŋmalɔ lɛ kɛ wɔ wie blɛoo, “Onukpa fe fɛɛ lɛ hereee kui ni kɛ amɛhe woɔ nifeemɔ ko mli lɛ kwraa.”

Miha hetoo blɛoo akɛ, “shi ebaahere wɔ, ejaakɛ wɔji Yehowa Odasefoi. Jeee nibalɔi ji wɔ, ni wɔsaramɔ lɛ yeŋ nɔ ni fe minitii etɛ.” Misɔle waa yɛ mitsui mli akɛ, “Oo Yehowa, ofainɛ ha enɛ aye omanye!”

Woloŋmalɔ lɛ kɛ shikpilikpiifeemɔ ha hetoo kɛ, “Ojogbaŋŋ, belɛ maka makwɛ.” Kɛkɛ ni etee. Yɛ minitii aaashɛ enyɔ ni fee tamɔ be kakadaŋŋ diɛŋtsɛ kɛha mi lɛ sɛɛ lɛ, eku esɛɛ eba, ní onukpa fe fɛɛ lɛ diɛŋtsɛ nyiɛ esɛɛ. Ekɛɛɛ nɔ ko, ní eho tsũi krokomɛi enyɔ he, ni eyi gbɛ kɛtee e-ɔfis.

Yɛ be mli ni wɔje sanegbaa lɛ shishi lɛ, ebana miishɛɛ waa diɛŋtsɛ. Ejɛ esuɔmɔ mli ehe Awake! wolo tɛtrɛbii sɔrɔtoi lɛ ni wɔkɛha lɛ lɛ. Wɔda Yehowa shi yɛ hegbɛ ni wɔná ni wɔkɛye yiŋtoo ni yɔɔ wɔnitsumɔ lɛ mli lɛ he odase nɛɛ lɛ hewɔ.

Kɛ miiku sɛɛ miikwɛ niiashikpamɔi babaoo ni yɔɔ naakpɛɛ lɛ, mihiɛ basɔɔ nɔ ni bɔfo Petro wie lɛ waa diɛŋtsɛ: “Lɛɛlɛŋ, miyoo akɛ, Nyɔŋmɔ jeee mɛi ahiɛaŋkwɛlɔ; shi moŋ maŋ fɛɛ maŋ lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.” (Bɔfoi lɛ Asaji 10:34, 35) Nɔ ni Nyɔŋmɔ sumɔɔ ji ni gbɔmɛi ni jɛ shihilɛi, wiemɔi, loo hegbɛi yɛ shihilɛi fɛɛ mli lɛ aná hegbɛ amɛle eyiŋtoo kɛha adesai kɛ shikpɔŋ lɛ.—Aŋma aha.