Ani Oji Mɔ ni Jajeɔ Maŋtsɛyeli lɛ He Sane lɛ Daa?
1 Wɔ fɛɛ wɔmli fili wɔ babaoo beni wɔná wɔle akɛ Ghana ná shiɛlɔi ayifalɛ ni fe bei fɛɛ nɔ̃ ni ji 60,112 yɛ August 1998 lɛ. Lɛɛlɛŋ, kwɛ bɔ ni eji nitsumɔ ni akɛ faishitswaa tsu he nii yɛ ekomefeemɔ mli! Yɛ anɔkwale mli lɛ, ebafee nɔ ni wa kɛha shiɛlɔi nɛɛ ateŋ mɛi komɛi akɛ amɛaafee mɛi ni jajeɔ Maŋtsɛyeli lɛ he sane lɛ daa yɛ nyɔji ni nyiɛ sɛɛ ba lɛ amli ejaakɛ kɛ́ aja mli kɛjɛ September 1998 kɛyashi July 1999 lɛ, aná shiɛlɔi 58,650 daa nyɔŋ. Enɛ tsɔɔ akɛ, aaafee shiɛlɔi 1,500 kɛ shiɛmɔ nitsumɔ lɛ mli gbɛfaŋnɔ ni amɛná daa nyɔŋ nɔ lɛ he akɔntaabuu haaa. Wɔheɔ wɔyeɔ akɛ, hewalɛwoo wiemɔi ni nyiɛ sɛɛ nɛɛ baanyɛ aye abua bo koni otsu shihilɛ lɛ he nii.
2 Ohiɛ Asɔ Hegbɛ ni Oná Lɛ: Esa akɛ wɔjie hiɛsɔɔ ni mli kwɔ kpo akɛ wɔná hegbɛ ni wɔkɛaagba mɛi krokomɛi Maŋtsɛyeli sanekpakpa lɛ he sane. Nɛkɛ nitsumɔ nɛɛ haa Yehowa tsui nyɔɔ emli ni eyeɔ ebuaa mɛi ni hiɛ tsui kpakpa lɛ koni amɛkase wala gbɛ lɛ he nii. (Abɛi 27:11; 1 Tim. 4:16) Odase ni wɔyeɔ daa lɛ haa niiashikpamɔ ni wɔnáa yɛ shiɛmɔ nitsumɔ lɛ mli lɛ yaa hiɛ ni ehaa wɔmli filiɔ wɔ ni wɔtsui nyɔɔ wɔmli akɛ wɔnyɛ wɔtsu nɔ ko.
3 Okɛ Nitsumɔ lɛ He Akɔntaabuu Aha: Mɛi ni kɛ amɛhe woɔ shiɛmɔ nitsumɔ lɛ mli lɛ ateŋ mɛi komɛi kuɔ amɛhiɛ amɛshwieɔ amɛnitsumɔ lɛ he akɔntaabuu ni amɛkɛaaha mra lɛ nɔ. Nyɛkahaa wɔsusua kɔkɔɔkɔ akɛ wɔnitsumɔ lɛ esaaa nɔ ni abuɔ he akɔntaa ahaa. (Okɛto Marko 12:41-44 he.) Bɔ fɛɛ bɔ ni eji lɛ, esa akɛ wɔkɛ nɔ ni wɔtsu lɛ he akɔntaabuu aha! Gbɛjianɔtoo ni akɛaatsu nii yɛ shia, tamɔ kalenda ni akɛaatsu nii koni akɛtsɔɔ be ni akɛtsu nii yɛ shiɛmɔ nitsumɔ lɛ mli lɛ baafee kaimɔ nɔ̃ daa ni baaha akɛ nitsumɔ lɛ he akɔntaa ni abu jogbaŋŋ aha mra yɛ nyɔŋ fɛɛ nyɔŋ naagbee.
4 Okɛ Yelikɛbuamɔ ni He Hiaa lɛ Aha: Abaanyɛ aha bɔ ni nyɛ asafo lɛ feɔ etoɔ gbɛjianɔ koni akɛ yelikɛbuamɔ aha mɛi ni ehe hiaa amɛ lɛ aya hiɛ koni amɛkɛ amɛhe awo shiɛmɔ nitsumɔ lɛ mli daa. Asafoŋ woloŋmalɔ lɛ kɛ woloŋ nikasemɔ nɔkwɛlɔi lɛ ato gbɛjianɔ koni shiɛlɔi ni he esa aye abua. Kɛ oyɛ bii loo Biblia mli nikaselɔi krokomɛi ni amɛji shiɛlɔi ni abaptisiko amɛ lɛ, tsɔsemɔ amɛ koni amɛkɛ amɛnitsumɔ lɛ he akɔntaabuu aha yɛ daa nyɔŋ nɔ.
5 Kaimɔ shihilɛ mli sane ni ji, “Mihiɛ Esɔ Be Kakadaŋŋ ni Miye yɛ Yehowa Sɔɔmɔ lɛ Mli,” ní yɔɔ October 1, 1997 Buu-Mɔɔ lɛ mli lɛ. Nyɛmiyoo Ottilie Mydland ni jɛ Norway lɛ batsɔ sanekpakpa lɛ he daa shiɛlɔ dani abaptisi lɛ yɛ afi 1921. Afii 76 sɛɛ beni eye afii 99 lɛ, ekɛɛ: “Miyɛ miishɛɛ akɛ minyɛɔ mishiɛɔ daa.” Mɛɛ su ni nɔ bɛ ni esa akɛ Yehowa tsuji fɛɛ akase po nɛ!