Ani August Baafee Nyɔŋ ni Yɔɔ Srɔto?
1 Afi 1963 lɛ ji afi ni yɔɔ srɔto kɛha Yehowa webii. Ani ole nɔ hewɔ? Nakai be lɛ mli shiɛlɔi ayibɔ ni yɔɔ jeŋ fɛɛ lɛ shɛ akpeiakpe kome. Eji oyɛ anɔkwale lɛ mli yɛ nakai beaŋ kulɛ, ekolɛ, obaakai bɔ ni wɔná miishɛɛ akɛ wɔyɛ mɛi babaoo ni miishiɛ Maŋtsɛyeli shɛɛ sane lɛ! Amrɔ nɛɛ, shiɛlɔi ni yɔɔ jeŋ fɛɛ lɛ miihe ashɛ akpekpei ekpaa, ni mɛi ni fe 57,000 yɛ maŋ nɛɛ pɛ mli. Shi kɛlɛ, kɛ́ aja mli lɛ, daa nyɔŋ nɔ lɛ, shiɛlɔi 3,000 ni yɔɔ Ghana lɛ ebuuu amɛshiɛmɔ nitsumɔ lɛ he akɔntaa.
2 Kpɛlɛmɔ Kaa lɛ Nɔ: Wɔmiitao ni yɛ August mli lɛ, wɔshɛ shiɛlɔi ayifalɛ ni fe fɛɛ ni ji 60,000 he yɛ Ghana. Kɛ wɔmɔdɛŋbɔi lɛ ye omanye lɛ, August baafee nyɔŋ ni yɔɔ srɔto lɛɛlɛŋ! Wɔbaanyɛ wɔfee enɛ kɛ́ wɔ fɛɛ wɔtsu wɔgbɛfaŋnɔ.
3 Mɛi ni miito gbɛhamɔ he gbɛjianɔ lɛ baanyɛ amɛkɛ amɛhe awo shiɛmɔ nitsumɔ lɛ mli be ko dani amɛya. Hiɛmɔ dɛhiɛmɔ woji, woji bibii, loo woji tɛtrɛbii kɛya bɔni afee ni onyɛ oye mɛi ni okɛkpeɔ yɛ gbɛ lɛ nɔ lɛ odase. Agbɛnɛ hu, kɛ́ oyashɛ he ni oyaa lɛ, obaanyɛ ona shiɛmɔ nitsumɔ lɛ ni okɛ ohe aaawo mli lɛ mli gbɛfaŋnɔ.
4 Kɛ onyɛɛɛ nɔ ko ofee lɛ, obaanyɛ oná shiɛmɔ nitsumɔ lɛ mli gbɛfaŋnɔ kɛmɔ shi lolo. Obaanyɛ oye datrɛfoi, helatsɛmɛi akwɛlɔi, loo saralɔi odase. Ekolɛ, obaanyɛ oye odase kɛtsɔ woloŋmaa nɔ loo kɛtsɔ tɛlifoŋ nɔ.
5 Ŋwanejee ko bɛ he akɛ, mɛi komɛi baasumɔ koni aye abua amɛ bɔni afee ni amɛkɛ amɛhe awo shiɛmɔ nitsumɔ lɛ mli yɛ August. Esa akɛ onukpai, asafoŋ sɔɔlɔi, kɛ nikasemɔ nɔkwɛlɔi ato gbɛjianɔ koni anyɛ akɛ yelikɛbuamɔ nɛɛ aha. Kaaha ohiɛ miikpa nɔ yɛ gbɛ fɛɛ gbɛ nɔ akɛ okɛ oshiɛmɔ nitsumɔ lɛ he akɔntaabuu lɛ baaha oya nɔŋŋ yɛ nyɔŋ lɛ naagbee mli bɔni afee ni anyɛ akane bo akɛ shiɛlɔ yɛ August.
6 Okɛ Bulɛ Aha Hegbɛ Lɛ: Shiɛmɔ nitsumɔ lɛ ji ‘nɔ̃ kpakpa ni atuu awo wɔdɛŋ.’ (2 Tim. 1:14) Wɔhiɛ sɔɔ hegbɛ ni akɛha wɔ akɛ wɔshiɛ sanekpakpa lɛ. (1 Tes. 2:4) Kɛ wɔsusu nɔ fɛɛ nɔ ni Yehowa efee eha wɔ lɛ he lɛ, esa akɛ etsirɛ wɔ koni wɔya nɔ wɔná nɛkɛ nitsumɔ ni he hiaa fe fɛɛ nɛɛ mli gbɛfaŋnɔ kɛtsara nɔ afi muu lɛ fɛɛ. Esaaa akɛ wɔŋmɛɔ gbɛ ni nɔ ko batsĩɔ wɔnaa yɛ shiɛmɔ ni wɔɔshiɛ daa lɛ mli. Nyɛhaa wɔhaa August afea nyɔŋ ni yɔɔ srɔto yɛ Yehowa sɔɔmɔ mli ni wɔtswa wɔfai shi akɛ wɔbaaye ehe odase daa nyɔŋ nɔ kɛjɛ no sɛɛ kɛyaa!—Lala 34:2.Ga Bible