Kwɛmɔ Koni Oku Osɛɛ Oya Jɛmɛ Ekoŋŋ!
1 “Kwɛ bɔ ni sanegbaa lɛ ŋɔɔ ha! Ehe baahia ni makai koni mayafee sɛɛsaramɔ yɛ jɛmɛ.” Ani owie wiemɔi ni tamɔ nɛkɛ pɛŋ, ní sɛɛ mli lɛ onyɛɛɛ okai he ni mɔ lɛ yɔɔ? Kɛ nakai ni lɛ, ole akɛ gbɛ kome pɛ ni obaanyɛ otsɔ nɔ oná nɔmimaa akɛ obaaya jɛmɛ ekoŋŋ ji ni oŋma ofɔ̃ shi.
2 Ŋmaa Fɛɛ Oshwie Shi: Be mli ni sane ni okɛ mɔ ko ni yɔɔ wiemɔ lɛ he miishɛɛ gba lɛ yɔɔ ojwɛŋmɔ mli lolo lɛ, ŋɔɔ be koni oŋma saji fɛɛ ni kɔɔ saramɔ lɛ he lɛ ofɔ̃ shi. Ŋmaa mɔ lɛ gbɛi kɛ bɔ ni obaafee oyoo lɛ lɛ he sane ofɔ̃ shi. Ŋmaa edrɛs ofɔ̃ shi, ni kaaka oyiŋ otsɔɔ—kwɛmɔ ni ole akɛ nɔ ni oŋma lɛ ja. Ŋmaa saneyitso ni nyɛsusu he lɛ, ŋmalɛi fɛɛ ni okane, kɛ wolo pɔtɛɛ ni okɛha lɛ he sane ofɔ̃ shi.
3 Kɛ oshi sanebimɔ ko oha mɔ lɛ ni abaaha hetoo be kroko ni obaaya oyasara lɛ lɛ, ŋmaa ofɔ̃ shi. Ani okase nɔ ko yɛ mɔ lɛ, eweku, loo ejamɔ he? Kɛ nakai ni lɛ, feemɔ enɛ he kadimɔ nɔ ko. Kɛkɛ lɛ, kɛ otee jɛmɛ be kroko lɛ, enɛ ni oootsĩ tã lɛ baatsɔɔ miishɛɛ ni bo diɛŋtsɛ oyɔɔ yɛ nakai mɔ lɛ he. Yɛ naagbee lɛ, okɛ gbi kɛ be ni otee eŋɔɔ klɛŋklɛŋ kwraa kɛ beni okɛɛ obaaku osɛɛ oba lɛ afata he. Kɛ oŋmala saji ni he hiaa nɛɛ oshwie shi jogbaŋŋ lɛ, obaaná saji ni yɔɔ faŋŋ ni baaha okai, ni ebaawa akɛ ohiɛ aaakpá shi ni owo akɛ obaaku osɛɛ oba lɛ nɔ.—1 Tim. 1:12.
4 Kɛ saji ni oŋma lɛ ja nɔŋŋ pɛ lɛ, okɛfata oshiɛmɔyaa nibii—woji abaagi, Biblia, Reasoning wolo, kɛ woji krokomɛi—ahe, bɔni afee ni onine ashɛ nɔ be fɛɛ be ni oootao. Nɔ ni hi fe fɛɛ ji ni oooŋma mɛi ni anaaa amɛ yɛ shia lɛ he saji yɛ shia-kɛ-shia kadimɔ woji ni soro no yɛ nɔ ni oŋmalaa sɛɛsaramɔi ni ofeɔ lɛ he saji fioo yɛ mli lɛ he. Shi kɛlɛ, yɛ sɛɛsaramɔi lɛ ahe saji ni ja ni oŋmalaa lɛ fɛɛ sɛɛ lɛ, nɔ ni he hiaa ji ni oookwɛ koni oya jɛmɛ ekoŋŋ!
5 Susumɔ Mɔ lɛ He: Kɛ oosaa ohe kɛmiiha shiɛmɔ nitsumɔ lɛ, tĩi saji fioo ni oŋma kɛha sɛɛsaramɔi lɛ amli. Susumɔ aŋkro fɛɛ aŋkro kɛ nifeemɔ gbɛ ni baahi fe fɛɛ ni okɛaatsu nii lɛ he beni oyaa eŋɔɔ be kroko lɛ. Susumɔ bɔ ni ooofee otee mɔ lɛ miishɛɛ shi kɛha shia Biblia mli nikasemɔ lɛ he. Gbɛjianɔ ni tamɔ nɛkɛ ni otoɔ lɛ baanyɛ eha owo yibii babaoo akɛ sanekpakpa lɛ he sɔɔlɔ, kɛ agbɛnɛ ebaaha omli afili bo babaoo.—Abɛi 21:5a.
6 No hewɔ lɛ be kroko kɛ́ oná mɔ ko bo bo toi lɛ, kaasusu akɛ obaanyɛ okai saramɔ lɛ yɛ gbɛ ni waaa kwraa nɔ. Yɛ no najiaŋ lɛ, ŋmaa ofɔ̃ shi, tĩi saji fioo ni oŋmala lɛ amli, yaa nɔ osusu mɔ lɛ he, koni agbɛnɛ okwɛ koni oya jɛmɛ ekoŋŋ!