Jeŋ ni Tsakeɔ Be Fɛɛ Be lɛ Mli Shiɛmɔ
1 Kwɛ bɔ ni nibii nyɛɔ etsakeɔ oyayaayai! Yɛ jenamɔ kɛ jetsɛremɔ kome pɛ mli lɛ, adebɔɔ naa oshara, shika helɛtemɔ he naagba, maŋkwramɔŋ basabasafeemɔ, loo oshara ko ni ale yɛ maŋ lɛ baanyɛ atsɔ sane ko ni mɔ fɛɛ mɔ wieɔ he. Ni kɛlɛ, ekolɛ mɛi baagbala amɛjwɛŋmɔ oya nɔŋŋ kɛya nibii krokomɛi anɔ. (Bɔf. 17:21; 1 Kor. 7:31) Yɛ jeŋ ni tsakeɔ be fɛɛ be nɛɛ mli lɛ, mɛɛ gbɛ nɔ wɔɔtsɔ wɔgbala mɛi ajwɛŋmɔ koni wɔgba amɛ Maŋtsɛyeli shɛɛ sane lɛ he sane?
2 Yɔsemɔ Mɛi Krokomɛi Ahaomɔi Lɛ: Gbɛ kome ni wɔɔtsɔ nɔ wɔgbala mɛi ajwɛŋmɔ ji kɛtsɔ nibii ni yaa nɔ amrɔ nɛɛ ahe wiemɔ nɔ. Beni Yesu woɔ etoibolɔi lɛ hewalɛ ni amɛkɛ hiɛdɔɔ asusu amɛshidaamɔ yɛ Nyɔŋmɔ hiɛ lɛ he lɛ, etsĩ osharai komɛi ni ba etsɛko tsɔ̃ ni yɔɔ amɛjwɛŋmɔ mli lɛ atã yɛ be ko ni tamɔ nakai mli. (Luka 13:1-5) Nakai nɔŋŋ beni wɔkɛ sanekpakpa lɛ haa lɛ, esa akɛ wɔkɛ adafitswaa ko ni yɔɔ bianɛ loo maŋ sane ni saa mɛi ni yɔɔ wɔshikpɔŋkuku lɛ mli lɛ ashihilɛ he lɛ afata he. Shi kɛlɛ, kɛ́ wɔmiisusu saji ni tamɔ enɛɛmɛi ahe lɛ, esa akɛ wɔkwɛ jogbaŋŋ bɔni afee ni wɔkafi maŋkwramɔŋ saji loo maŋ saji asɛɛ.—Yoh. 17:16.
3 Te wɔɔfee tɛŋŋ wɔle nibii ni mɛi susuɔ he amrɔ nɛɛ lɛ? Ekolɛ gbɛ ni hi fe fɛɛ ni wɔɔtsɔ nɔ ji ni wɔbi sane ko ni wɔbo sane toi kɛkɛ. (Mat. 12:34) Miishɛɛ ni wɔɔná yɛ mɛi ahe lɛ baatsirɛ wɔ ni wɔyɔse bɔ ni mɛi krokomɛi susuɔ nii ahe amɛhaa koni wɔtsɔ ŋaa gbɛ nɔ wɔbi saji amli lolo. Wiemɔ ko ni shiatsɛ ko aaawie trukaa lɛ baanyɛ ajie nibii ni gbáa mɛi babaoo anaa yɛ akutso lɛ mli lɛ kpo ni ebaanyɛ egbele gbɛ kɛha odaseyeli.
4 Shiɛmɔ Wiemɔ ko He Gbɛjianɔ ni Aaato: Beni wɔsaa wɔhe kɛha shiɛmɔ nitsumɔ lɛ yɛ jeŋ ni tsakeɔ be fɛɛ be nɛɛ mli lɛ, wɔbaanyɛ wɔkɛ Reasoning wolo lɛ atsu nii. Aŋmala ŋaawoi ni yeɔ ebuaa yɛ bɔ ni wɔɔfee wɔkɛ saji ni yaa nɔ bianɛ lɛ afata wɔshiɛmɔ wiemɔ lɛ he lɛ yɛ baafa 10-11 lɛ mli, yɛ saneyitsei ni ji “Crime/Safety” (Awuiyeli/Shweshweeshwefeemɔ) kɛ “Current Events” (Saji ni Yaa Nɔ Bianɛ) lɛ ashishi. Abaanyɛ ana saji ni tamɔ nakai nɔŋŋ yɛ September 2000 Wɔ Maŋtsɛyeli Sɔɔmɔ lɛ baafa 4 lɛ mli. Beni otoɔ oshiɛmɔ wiemɔ lɛ he gbɛjianɔ lɛ, kwɛmɔ ni okɛ ŋmalɛ ko ni sa afata he.
5 Beni osusuɔ mɛi ni yɔɔ wɔshikpɔŋkuku lɛ mli lɛ ahaomɔi ni tsakeɔ be fɛɛ be lɛ he lɛ, ehe miihia ni wɔtsake sanekpakpa lɛ mli yɛ nakai gbɛ nɔŋŋ nɔ. Kɛtsɔ nakai gbɛ nɔ lɛ, wɔkɛ mɛi wieɔ nibii ni saa amɛshihilɛi ahe waa lɛ he. Kɛtsɔ nakai feemɔ nɔ lɛ, wɔyeɔ wɔbuaa mɛi babaoo lolo koni amɛbale Mɔ ni tsakeee yɛ esui kɛ eshishitoo mlai amli lɛ.—Yak. 1:17.