“Ani Mifã Kɛya?”
1 Yɛ famɔ ni Yesu kɛha akɛ ‘aya ni ayafee jeŋmaji fɛɛ mli gbɔmɛi lɛ kaselɔi’ lɛ nɔheremɔ hewɔ lɛ, Yehowa tsuji babaoo ni ejɔɔ amɛhe nɔ lɛ efã koni amɛyasɔmɔ yɛ he ni hiamɔ lɛ da waa yɛ lɛ. (Mat. 28:19) Amɛmiikase Paulo ni here tsɛmɔ lɛ nɔ, ni ji: “Ba Makedonia ni obaye obua wɔ!” (Bɔf. 16:9) Mɛɛ gbɛ diɛŋtsɛ abaanyɛ atsɔ nɔ afee enɛ?
2 Yaa nɔ Otsu He Nii Fiofio: Ani nyɛ asafo lɛ yɛ shikpɔŋkuku ni afɔɔɔ mli nitsumɔ? Kɛ nakai ni lɛ, obaanyɛ otsu nii babaoo yɛ nakai hei lɛ. Dani obaakpɛ oyiŋ akɛ obaaya he kroko lɛ, yaana nyɛ onukpai lɛ ni ole kɛ́ amɛnuɔ he akɛ osaa ohe jogbaŋŋ akɛ obaafã kɛya. Agbɛnɛ hu, obaanyɛ obi nyɛ kpokpaa nɔkwɛlɔ lɛ kɛ́ ele asafo ko ni bɛŋkɛ ni obaanyɛ olɛɛ osɔɔmɔ nitsumɔ lɛ mli yɛ jɛmɛ. Yɛ gbɛ kroko nɔ lɛ, beni osusu sane lɛ he jogbaŋŋ ogbe naa lɛ, ekolɛ obaasumɔ ni osusu yelikɛbuamɔ ni okɛaaha yɛ maŋ nɛɛ mli he kroko loo yɛ maŋsɛɛ lɛ he. Kɛ enɛ ji nɔ ni oshweɔ akɛ ofee lɛ, no lɛ esa akɛ bo kɛ nyɛ onukpai akuu lɛ aŋma kɛyaha nitsumɔhe nine ni yɔɔ he ni osumɔɔ koni oyasɔmɔ yɛ jɛmɛ lɛ, ní otsɔɔ bɔ ni teokrase shihilɛ ni oyɔɔ mli lɛ ji ha. Eeefee nɔ ni nilee yɔɔ mli akɛ oooyakwɛ jɛmɛ dani okpɛ oyiŋ akɛ obaafã kɛyahi jɛmɛ kwraa loo ofeŋ nakai.
3 Kwɛmɔ Jogbaŋŋ yɛ Fã ni Ooofã Kɛyahi Maŋsɛɛ lɛ He: Wɔnyɛmimɛi lɛ ateŋ mɛi ni yi fáa babaoo lɛ miifã kɛmiiya shikpɔji krokomɛi anɔ ejaakɛ amɛmiitao he ko ni jɛmɛ shihilɛ lɛ hi fe he ni amɛyɔɔ lɛ loo ni amɛye amɛhe kɛjɛ niseniianiifeemɔ mli. Yɛ nakai feemɔ mli lɛ, mɛi komɛi eyabote naagba ni aŋkroaŋkroi ni bɛ jeŋba lɛ kɛbaa amɛnɔ lɛ mli ní tsɔɔ akɛ, amɛwoɔ amɛ shi akɛ amɛbaaye amɛbua amɛ koni amɛnyɛ maŋ ni amɛtee mli ehee lɛ mli amɛhi kwraa, shi yɛ no najiaŋ moŋ lɛ, amɛshika kɛkɛ amɛheɔ kɛjɛɔ amɛdɛŋ ni amɛfooo amɛ daaŋ dɔŋŋ yɛ sɛɛ mli lɛ. Yɛ shihilɛi komɛi amli lɛ, nɛkɛ aŋkroaŋkroi nɛɛ bɔɔ mɔdɛŋ po koni amɛnyɛ mɛi ni efã kɛyahi maŋsɛɛ lɛ anɔ amɛwo jeŋba shara mli ni jeee yɛ amɛsuɔmɔ naa. Kɛ amɛfeee nakai lɛ, ashĩɔ amɛ awoɔ maŋ ni amɛtee mli lɛ mli koni amɛ diɛŋtsɛ amɛbɔ amɛhewɔ mɔdɛŋ. Kɛkɛ lɛ, shihilɛ ni mɛi ni efã kɛyahi maŋsɛɛ lɛ eyaje mli lɛ ebafee nɔ ni ehiii kwraa fe bɔ ni eji beni amɛyɔɔ amɛmaji amli lɛ. Ekolɛ ehe baahia po ni amɛbi nyɛmimɛi lɛ koni amɛha amɛ he ko amɛhi ní agbɛnɛ amɛye amɛbua amɛ, ni amɛkɛ jatsu yafɔ̃ɔ Kristofoi awekui krokomɛi ni miigbo deŋme koni amɛtsu amɛ diɛŋtsɛ amɛnaagbai kɛ shihilɛi ni mli wa he nii lɛ anɔ. Shiai komɛi amli bii etse amɛhe kwraa kɛjɛ amɛteŋ mɔ fɛɛ mɔ he, ni wekui komɛi egbɔjɔ yɛ mumɔŋ yɛ ŋaawoo gbonyo ni tamɔ nɛkɛ ni amɛkɛtsu nii ni amɛfã kɛtee lɛ hewɔ.—1 Tim. 6:8-11.
4 Kɛ oosumɔ ni ofã kɛya yɛ sɛɛnamɔ ko ni otaoɔ hewɔ lɛ, ha ehi ojwɛŋmɔ mli akɛ naagbai yɛ ni okɛbaakpe ni he ni oyɔɔ lɛ kɔɔɔ he eko. Eyɛ mlɛo kwraa akɛ oooye naagbai ni tamɔ nakai lɛ anɔ yɛ he ni ole jɛmɛ wiemɔ momo lɛ kɛ kusum nifeemɔ lɛ moŋ fe nɔ ni oooje shishi ehee kwraa yɛ hei ni oleee jɛmɛ lɛ.