Mɛni Hewɔ Wɔkuɔ Wɔ Sɛɛ Wɔyaa Daa?
1 Ani obi ohe nɛkɛ sane nɛɛ dã, ekolɛ, yɛ be mli ni osaa ohe gbi ko kɛhaa sɔɔmɔ nitsumɔ lɛ? Yɛ hei komɛi ni wɔtsu wɔ shikpɔŋkuku lɛ mli nii shii abɔ lɛ, ekolɛ, shiatsɛmɛi komɛi baayɔse mɛi ni wɔji, ni amɛbaakpoo wɔ. Gbɔmɛi fioo ko pɛ kɛ miishɛɛ hereɔ nɔ. Shi kɛlɛ, yiŋtoi ni mli wa babaoo yɛ, ni tsɔɔ nɔ hewɔ ni wɔkuɔ wɔ sɛɛ wɔyaa daa lɛ mli.
2 Klɛŋklɛŋ kwraa lɛ, afã wɔ ni wɔya nɔ wɔshiɛ Maŋtsɛyeli lɛ he shɛɛ sane lɛ kɛyashi naagbee lɛ aaaba. (Mat. 24:14; 28:19, 20) Gbalɔ Yesaia tao ni ele be sɛɛkɛlɛ ni ekɛbaatsu nii yɛ eshiɛmɔ nitsumɔ lɛ mli. Aŋma hetoo ni enine shɛ nɔ lɛ afɔ shi yɛ Yesaia 6:11. Sanebimɔ ko kwraa bɛ he—akɛɛ lɛ koni ekã he ekɛ Nyɔŋmɔ shɛɛ sane lɛ aku sɛɛ ayaha gbɔmɛi lɛ. Nakai nɔŋŋ ŋmɛnɛ, eyɛ mli akɛ amɛbaashwie wɔ moŋ, shi Yehowa miikpa gbɛ akɛ wɔɔkã he wɔya gbɔmɛi ni yɔɔ wɔ shikpɔŋkuku lɛ mli lɛ aŋɔɔ. (Ezek. 3:10, 11) Enɛ ji gbɛnaa nii ko ni yɔɔ krɔŋkrɔŋ ni atu awo wɔdɛŋ.—1 Kor. 9:17.
3 Yiŋtoo kroko hewɔ ni wɔkuɔ wɔ sɛɛ kɛyaa daa ji akɛ, enɛ haa wɔnaa hegbɛ koni wɔtsɔɔ bɔ ni wɔhe ni wɔtu wɔha Yehowa lɛ mli kwɔ ha. (1 Yoh. 5:3) Kɛfata he lɛ, kɛ wɔsusu nɔ ni wɔsɛɛ ni ebɛŋkɛ lɛ yɔɔ kɛha adesai lɛ ahe lɛ, te wɔɔfee tɛŋŋ wɔtsĩ wɔhe naa kɛjɛ suɔmɔ mli ni wɔɔjɛ wɔbɔ mɔdɛŋ wɔbɔ wɔnanemɛi kɔkɔ lɛ he? (2 Tim. 4:2; Yak. 2:8) Anɔkwayeli mli ni wɔɔjɛ wɔtsu wɔ nitsumɔ lɛ he nii lɛ kɛ hegbɛi haa amɛ shii abɔ, koni amɛhere Nyɔŋmɔ shɛɛ sane ni hereɔ mɔ yiwala lɛ nɔ, koni amɛkanyɛ amɛkɛɛ akɛ abɔko amɛ kɔkɔ.—Ezek. 5:13.
4 Kɛfata he lɛ, wɔleee be mli ni gbɔmɛi komɛi baatsake amɛtsui. Ebaanyɛ eba oya kɛtsɔ tsakemɔ ko yɛ amɛ diɛŋtsɛ amɛ shihilɛi amli, oshara sane ko yɛ amɛ weku lɛ mli, loo je lɛŋ shihilɛi ni haa amɛjwɛŋɔ wɔsɛɛ shihilɛ he waa lɛ anɔ. Agbɛnɛ, nɔ ko ni wɔɔkɛɛ yɛ amɛ shinaa naa lɛ baaha amɛkɛ miishɛɛ ahere nɔ. (Jaj. 9:11; 1 Kor. 7:31) Agbɛnɛ hu, gbɔmɛi fãa kɛyahiɔ he kroko. Ekolɛ wɔbaaná mɛi heei ni amɛbahi shi yɛ wɔ shikpɔŋkuku lɛ mli ni baabo sanekpakpa lɛ toi—ekolɛ, obalahii kɛ obalayei bibii ni kwɛɔ amɛ diɛŋtsɛ amɛhe, ni amɛmiijwɛŋ yiŋtoo ni yɔɔ amɛ shihilɛ mli lɛ he waa lɛ.
5 Ani wɔbaaku wɔ sɛɛ wɔya daa? Hɛɛ! Ŋmalɛi lɛ kɛ hewalɛwoo ni fa haa wɔ koni wɔku wɔ sɛɛ kɛya gbɔmɛi lɛ aŋɔɔ shii abɔ. Yɛ naagbee lɛ, kɛ agbe shiɛmɔ nitsumɔ lɛ naa lɛ, Yehowa baajɔɔ wɔ yɛ mɔdɛŋbɔɔ ni wɔkɛtee nɔ yɛ sɔɔmɔ nitsumɔ lɛ mli lɛ hewɔ, ni ebaajɔɔ mɛi ni kɛ hiɛsɔɔ here Maŋtsɛyeli lɛ sanekpakpa lɛ nɔ lɛ.—1 Tim. 4:16.