Miishɛɛ Shi ni Aaatee Kɛtsɔ Kanyamɔ ni Maŋtsɛyeli Sanekpakpa No. 36 lɛ Kɛhaa lɛ Nɔ
1 Ani ogbe Maŋtsɛyeli Sanekpakpa No. 36 ni akɛha bo lɛ jaa naa? Ekɛ sanebimɔ ni yɔɔ ebe naa ni mɛi fɛɛ baasusu he lɛ haa, nɔ ni ji: “Afii Akpe Hee Lɛ—Mɛni Yɔɔ Wɔsɛɛ Be Kɛha Bo?” Beni afi 2000 lɛ bɛŋkɛ lɛ, gbɛkpamɔi kɛha nɔ ni afii akpe hee lɛ kɛbaaba lɛ bafee srɔtoi srɔtoi kwraa. Maŋtsɛyeli Sanekpakpa No. 36 lɛ wieɔ nakai gbɛkpamɔi lɛ ekomɛi ahe ni ekaiɔ wɔ akɛ je lɛŋ shihilɛi haaa wɔ nɔ ko ni wɔɔdamɔ nɔ wɔkpa nɔ̃ kpakpa ko gbɛ. Afii akpe pɛ ni kɛ toiŋjɔlɛ kɛ shweshweeshwe shihilɛ ni mɛi babaoo taoɔ lɛ baaba ji Kristo Yesu Afii Akpe Nɔyeli lɛ. Hekɛnɔfɔɔ ni wɔyɔɔ yɛ e-Maŋtsɛyeli ni baaba diɛŋtsɛ lɛ mli lɛ etsirɛ wɔ koni wɔja Maŋtsɛyeli Sanekpakpa No. 36 lɛ wɔha mɔ fɛɛ mɔ bɔ ni wɔɔnyɛ.
2 Bɔ ni Ahere Maŋtsɛyeli Sanekpakpa lɛ Nɔ Aha: Maŋtsɛyeli Sanekpakpa ni wɔjara wɔha nyɛsɛɛ ko lɛ efee kanyamɔ kpakpa kɛha wɔ yɛ wɔnitsumɔ lɛ mli. Yɛ Maŋtsɛyeli Sanekpakpa No. 35 lɛ gbɛfaŋ lɛ, Canada nitsumɔhe nine lɛ ŋma akɛ: “Shiɛlɔi kɛ gbɛgbalɔi lɛ kɛ ekãa fĩ tafaa krɛdɛɛ nɛɛ sɛɛ yɛ shiɛmɔ nitsumɔ lɛ mli, ni aná niiashikpamɔi babaoo ni woɔ mɔ hewalɛ mli ŋɔɔmɔ.” Ŋwanejee ko bɛ he akɛ ojie ekãafeemɔ ni tamɔ nakai nɔŋŋ kpo kɛha Maŋtsɛyeli Sanekpakpa No. 36 lɛ jaa.
3 Ato gbɛjianɔ koni Maŋtsɛyeli Sanekpakpa ni yɔɔ amrɔ nɛɛ lɛ he tafaa lɛ aba naagbee yɛ November 17, 2000. Ani atsu shikpɔŋkuku ni akɛha nyɛ asafo lɛ fɛɛ mli nii agbe naa? Kɛ jeee nakai lɛ, ekolɛ onukpai lɛ baabi nyɛ koni nyɛtsá tafaa lɛ nɔ kɛyashi November naagbee.
4 Kɛbashi amrɔ nɛɛ, mɛni ji nɔ ni ejɛ Maŋtsɛyeli Sanekpakpa No. 36 jaa lɛ mli kɛba yɛ nyɛ akutso lɛ mli? Mɛi fioo ko pɛ baaŋma wolo lɛ nɔ nii ni amɛbi koni aha amɛ Taoɔ wolo bibioo lɛ eko kɛ ekolɛ ni akɛ amɛ afee shia Biblia mli nikasemɔ. Shi kɛlɛ, eeenyɛ efee akɛ mɛi ni klɛŋklɛŋ lɛ amɛjie miishɛɛ kpo amɛtsɔɔ yɛ afii akpe sane lɛ he lɛ ateŋ mɛi babaoo tsuŋ nɔ ko yɛ he kɛyashi beni Yehowa Odasefoi ateŋ mɔ ko baaya amɛŋɔɔ. Esa akɛ ayasara mɛi fɛɛ ni ejie miishɛɛ kpo amɛtsɔɔ lɛ ekoŋŋ. Mɛɛ be baafee be ni sa kɛha enɛ feemɔ? Esa akɛ anyiɛ sɛɛ amrɔ nɔŋŋ bɔ ni aaanyɛ.
5 Kadimɔ niiashikpamɔi nɛɛ ni jɛ Maŋtsɛyeli Sanekpakpa No. 35 lɛ ni aja aha ni aku sɛɛ atee jɛmɛ ekoŋŋ lɛ mli ba lɛ. Gbɛgbalɔ ko ni yɔɔ Ireland shĩ Maŋtsɛyeli Sanekpakpa lɛ eko eha niyelihe nɔtsɛ ko. Yoo lɛ ná shɛɛ sane lɛ he miishɛɛ waa ni efɔ̃ nine etsɛ́ nyɛmi yoo lɛ kɛba ekoŋŋ. Nyɛmi yoo lɛ ku esɛɛ etee yɛ gbii enyɔ mli, ni aje Biblia mli nikasemɔ shishi. Ashĩ Maŋtsɛyeli Sanekpakpa lɛ eko yɛ shia ko ni mɔ ko mɔ ko bɛ mli yɛ Denmark. Nakai gbi lɛ nɔ nɔŋŋ lɛ, yoo lɛ ni hi jɛmɛ lɛ kɛ wolo ni aŋmala nɔ nii lɛ maje nitsumɔhe nine lɛ, ni akɛmaje asafo ni yɔɔ he ni eyɔɔ lɛ. Dani otsi lɛ baaba naagbee lɛ, nyɛmimɛi yei enyɔ tee eŋɔɔ, ato nikasemɔ he gbɛjianɔ, ni yoo lɛ tee eklɛŋklɛŋ kpee yɛ Maŋtsɛyeli Asa lɛ nɔ!
6 Nɔ ni Obaakɛɛ Kɛ́ Oku Osɛɛ Otee: Sɛɛsaramɔi afeemɔ yɛ Maŋtsɛyeli Sanekpakpa ni akɛhaa hewɔ lɛ hu yɛ mlɛo ni eji wɔ shiɛmɔ nitsumɔ lɛ mli fã ko ni ŋɔɔ. Be mli ni ofeɔ nakai lɛ, ebaafee nɔ ni nilee yɔɔ mli akɛ ooohiɛ Maŋtsɛyeli Sanekpakpa No. 36 lɛ eko akɛni ekolɛ shiatsɛ lɛ ehiɛŋ enɔ̃ lɛ hewɔ. Obaanyɛ oka gbɛtsɔɔmɔi nɛɛ okwɛ.
7 Be mli ni okai shiatsɛ lɛ mɔ ni oji lɛ, obaanyɛ okɛɛ akɛ:
◼ “Mishĩ wolo ko ni adɔrɔ mli ni yitso ji ‘Afii Akpe Hee Lɛ—Mɛni Yɔɔ Wɔsɛɛ Be Kɛha Bo?’ lɛ eko miha bo. Ani ejeee hewalɛwoo akɛ oookane akɛ etsɛŋ ni Kristo Yesu Afii Akpe Nɔyeli lɛ baaje shishi, ní ekɛ Paradeiso shihilɛi aba shikpɔŋ nɔ? [Tsɔɔmɔ Paradeiso he mfonirii ni atɛŋ yɛ Maŋtsɛyeli Sanekpakpa No. 36 lɛ mli lɛ.] Aafɔ̃ nine aatsɛ bo yɛ baafa ni yɔɔ sɛɛgbɛ lɛ koni obi ni aha bo wolo bibioo ni ji Mɛni Nyɔŋmɔ Taoɔ yɛ Wɔdɛŋ? lɛ eko.” Okɛ wolo bibioo lɛ atsɔɔ, gbelemɔ nikasemɔ 5 lɛ, kanemɔ klɛŋklɛŋ sanebimɔ lɛ kɛ kuku 1 kɛ 2 lɛ, ní obi shiatsɛ lɛ koni ewie. Kanemɔ ŋmalɛ kome loo enyɔ ni nyɛsusu he. Kɛ eeehi lɛ, susumɔ sanebimɔ kroko kɛ kuku kroko he, koni no sɛɛ lɛ oto gbɛjianɔ koni oku osɛɛ oya ni nyɛyatsá sanegbaa lɛ nɔ.
8 Akɛni nɔ ni akɛbaanyiɛ sɛɛ koni akɛha yɛ November mli lɛ ji “Taoɔ” wolo bibioo loo “Nilee” wolo lɛ hewɔ lɛ, obaanyɛ okɛɛ akɛ:
◼ “Nyɛsɛɛ nɛɛ beni mibasara bo lɛ, mishĩ ‘Afii Akpe Hee Lɛ—Mɛni Yɔɔ Wɔsɛɛ Be Kɛha Bo?’ lɛ eko. Ekɛ ninefɔɔ haa kɛha shia Biblia mli nikasemɔ ni aheee nɔ ko. Míku misɛɛ miba koni mikɛ nikasemɔ wolo ni wɔkɛtsuɔ nii lɛ abatsɔɔ bo. [Okɛ Taoɔ wolo bibioo lɛ atsɔɔ, ní okɛ esɛɛgbɛ lɛ atsɔɔ; aloo okɛ Nilee wolo lɛ atsɔɔ, ní ogbele baafai 188-189.] Afii Akpe ni awie he yɛ Biblia lɛ mli lɛ kɛ shihilɛi ni tamɔ nɔ ni onaa yɛ mfoniri ni atɛŋ nɛɛ mli lɛ baaba. Bɔni afee ni wɔfee mɛi ni sa akɛ wɔná wala yɛ Paradeiso lɛ, ehe miihia ni wɔná Nyɔŋmɔ he anɔkwa nilee. Ofainɛ ha mafee bɔ ni wɔkaseɔ Biblia lɛ wɔhaa lɛ he nɔkwɛmɔnɔ kuku ko matsɔɔ bo.”
9 Maŋtsɛyeli Sanekpakpa No. 36 lɛ jaa etsirɛ wɔ koni wɔha shiɛmɔ nitsumɔ ni wɔkɛ wɔhe woɔ mli lɛ afee nɔ ni mɔɔ shi, ní wɔye odase jogbaŋŋ. Ekolɛ enɛ ekanya aŋkroaŋkroi babaoo amiishɛɛ yɛ shikpɔŋkuku lɛ mli. Mɔdɛŋ ni wɔbɔɔ yɛ ekomefeemɔ mli koni wɔkɛtee miishɛɛ nɛɛ shi kɛ Yehowa yelikɛbuamɔ lɛ haa wɔkɛ mlifilimɔ naa mɛi babaoo ni hiɛ gwantɛŋ su.—Mat. 10:11; Bɔf. 13:48, 49, 52.