Ye Obua Mɛi Krokomɛi ní Amɛya Kpeei
1 “Wɔkɛ miishɛɛ miifɔ̃ nanemɛi fɛɛ ni yɔɔ akutso lɛ mli . . . ní miisumɔ ni amɛba kpeei lɛ anine ní amɛfee nakai.” Kɛjɛ be mli ni adafitswaa nɛɛ je kpo yɛ November 1880 Zion’s Watch Tower lɛ mli kɛbaa nɛɛ, Yehowa Odasefoi kɛ miishɛɛ efɔ̃ gbɔmɛi anine koni amɛbabua amɛhe naa kutuu kɛha Biblia mli tsɔsemɔ. (Kpoj. 22:17) Enɛ ji anɔkwa jamɔ fã ko ni he hiaa.
2 Ehe Miihia ni Oya: Kɛ́ wɔkɛ asafo lɛ bɔ lɛ, jɔɔmɔi jɛɔ mli kɛbaa. Wɔbaleɔ wɔ-Nyɔŋmɔ, Yehowa ni he yɔɔ naakpɛɛ lɛ jogbaŋŋ. Wɔkpeɔ kutuu yɛ asafo lɛ mli koni ‘Yehowa atsɔɔ wɔ nii.’ (Yes. 54:13) Esafo lɛ toɔ Biblia mli tsɔsemɔ he gbɛjianɔtoo ní yaa nɔ daa, ní gbalaa wɔ kɛbɛŋkɛɔ lɛ kpaakpa lɛ he gbɛjianɔ, ni ehaa wɔ yelikɛbuamɔ ni anyɛɔ atsuɔ he nii koni wɔkɛtsu “Nyɔŋmɔ yiŋtoo muu lɛ fɛɛ” he nii. (Bɔf. 20:27; Luka 12:42) Kpeei tsɔseɔ wɔ aŋkroaŋkro yɛ Nyɔŋmɔ Wiemɔ lɛ tsɔɔmɔ he ŋaa mli. Kaimɔi ni jɛɔ Ŋmalɛi lɛ amli lɛ yeɔ ebuaa wɔ koni wɔná wɔkɛ mɛi krokomɛi kɛ Yehowa diɛŋtsɛ teŋ wekukpaa ni yeɔ omanye mli ŋɔɔmɔ. Mɛi ni sumɔɔ Nyɔŋmɔ ní wɔkɛbɔɔ lɛ wajeɔ wɔhemɔkɛyeli lɛ.—Rom. 1:11, 12.
3 Jee Gbɛ Ofɔ̃ Nine: Yɛ klɛŋklɛŋ nikasemɔ lɛ mli lɛ, fɔ̃ɔ Biblia mli nikaselɔ fɛɛ nikaselɔ nine kɛba kpeei. Gbaa lɛ oti ko ni kanya bo yɛ nyɛsɛɛ kpee ni otee lɛ shishi, kɛ nɔ ko ni abaasusu he yɛ kpee ni baanyiɛ sɛɛ lɛ mli lɛ he sane ní okɛtee emiishɛɛ shi. Tsɔɔmɔ lɛ bɔ ni Maŋtsɛyeli Asa lɛ yɔɔ ha, ni oná nɔmimaa akɛ ele bɔ ni eeefee ni ena nikasemɔhe lɛ.
4 Kɛ́ nikaselɔ lɛ baaa amrɔ nɔŋŋ lɛ, yaa nɔ ofɔ̃ lɛ nine. Daa otsi lɛ, ŋɔɔ minitii fioo ko ni okɛtsɔɔ lɛ bɔ ni wɔgbɛjianɔtoo lɛ tsuɔ nii ehaa. Okɛ Odasefoi Miifee Nyɔŋmɔ Suɔmɔnaa Nii wolo bibioo lɛ kɛ Jehovah’s Witnesses—The Organization Behind the Name vidio lɛ atsu nii ní okɛha ele wɔ kɛ wɔkpeei ahe saji. Okɛ shiɛlɔi krokomɛi afata ohe kɛya jɛmɛ koni nikaselɔ lɛ ale amɛ. Daa Yehowa shi yɛ sɔlemɔ mli yɛ gbɛjianɔtoo lɛ hewɔ ni otsĩ bɔ ni ehe hiaa ní nikaselɔ lɛ kɛ asafo lɛ abɔ lɛ tã.
5 Kaashashao shi akɛ oooye obua mɛi heei ni yɔɔ wiemɔ lɛ he miishɛɛ lɛ koni amɛkɛ wɔ akpe. Yɛ be mli ni hiɛsɔɔ ni amɛyɔɔ kɛha Yehowa lɛ daa lɛ, ebaatsirɛ amɛ ni amɛkɛ nɔ ni amɛkaseɔ lɛ baatsu nii ni amɛbatsɔmɔ Nyɔŋmɔ gbɛjianɔtoo ni efee ekome lɛ fã.—1 Kor. 14:25.