Nikaselɔi ni Abaatsɔɔ Amɛ Gbɛ Kɛya Gbɛjianɔtoo ni Yɔɔ Wɔ Gbɛi lɛ Sɛɛ lɛ Mli
1 “Eji shɛɛ sane ni awieɔ yɛ wiemɔi ni fa fe 200 mli. Eji shɛɛ sane ni anuɔ yɛ shikpɔji ni fa fe 210 nɔ. Eji shɛɛ sane ni mɔ lɛ diɛŋtsɛ kɛhaa yɛ he fɛɛ he ni abaanyɛ ana mɛi yɛ. Eji shiɛmɔ he tafaa ni fe fɛɛ ni je lɛ ele pɛŋ lɛ fã, shɛɛ sane ni feɔ gbɔmɛi akpekpei abɔ ekome yɛ jeŋ muu lɛ fɛɛ. Nɔ ni fe afii oha nɛ ni ato Yehowa Odasefoi ahe gbɛjianɔ koni amɛtsu nitsumɔ nɛɛ!”
2 Nɛkɛ ji bɔ ni Jehovah’s Witnesses—The Organization Behind the Name (Yehowa Odasefoi—Gbɛjianɔtoo ni Yɔɔ Gbɛi lɛ Sɛɛ) video lɛ nɔ wiemɔ lɛ jeɔ shishi. Eyaa nɔ ehaa sanebimɔi nɛɛ ahetoo: Namɛi diɛŋtsɛ ji Yehowa Odasefoi? Te atoɔ amɛ nitsumɔ lɛ he gbɛjianɔ ahaa tɛŋŋ? Te akudɔɔ amɛnitsumɔ lɛ ahaa tɛŋŋ? Te akɛ shika yeɔ abuaa amɛnitsumɔ lɛ ahaa tɛŋŋ? Ehaa anɔkwa sane ni ji akɛ “átsɔse Yehowa Odasefoi yɛ jeŋ fɛɛ akɛ gbɛjianɔtoo ko ni baaye abua amɛkutsoŋbii koni amɛtswa hemɔkɛyeli amɛma shi yɛ Biblia lɛ mli” lɛ, hiɔ mɛi ni kwɛɔ lɛ ajwɛŋmɔ mli, ni ewoɔ amɛ hewalɛ koni amɛ diɛŋtsɛ amɛkwɛ gbɛjianɔtoo ni yɔɔ wɔ gbɛi lɛ sɛɛ. Beni yoo ko ni kaseɔ nii lɛ kwɛ video lɛ egbe naa lɛ, miishɛɛ kɛ hiɛsɔɔ yaafonui yimɔ ehiŋmɛii amli obɔ ni ekɛɛ: “Te ebaa lɛ tɛŋŋ ni mɔ fɛɛ mɔ nyɛɛɛ ana akɛ enɛ ji anɔkwa Nyɔŋmɔ lɛ, Yehowa gbɛjianɔtoo lɛ?”—Okɛto 1 Korintobii 14:24, 25 he.
3 Yoo kroko hu ekase Biblia lɛ kɛfolɔ mli aahu, shi enyɛɛɛ ekpɛlɛ anɔkwa sane ni ji akɛ Triniti lɛ ji amale tsɔɔmɔ lɛ nɔ. Kɛkɛ ni ajie wɔ video lɛ atsɔɔ lɛ kɛ ewu. Amɛnya nɔ ni ajie atsɔɔ amɛ lɛ he waa, ni amɛkwɛ lɛ shii enyɔ nakai gbɛkɛ lɛ nɔŋŋ. Beni shɛ amɛnikasemɔ be kroko lɛ, ŋa lɛ tsɔɔ bɔ ni eshweɔ akɛ eeetsɔ Odasefonyo. Ekɛɛ ekɛ ejwɛŋmɔ ema hemɔkɛyeli ni eyɔɔ yɛ Triniti lɛ mli lɛ nɔ aahu ni ekwɛɛɛ wɔ gbɛjianɔtoo lɛ kɛ mɛi ni yɔɔ mli lɛ. Kɛtsɔ video lɛ kwɛmɔ nɔ lɛ eyɔse akɛ ena Nyɔŋmɔ anɔkwa gbɛjianɔtoo lɛ. Eesumɔ ni ebɔi shiɛmɔ yɛ shia kɛ shia amrɔ nɔŋŋ. Beni atsɔɔ lɛ nibii ni he hiaa ni esa akɛ atsu he nii dani atsɔ shiɛlɔ ni abaptisiko lɛ lɛ, ekɛɛ: “Matsu nakai nibii ni he hiaa lɛ ahe nii amrɔ nɔŋŋ.” Eshĩ esɔlemɔ lɛ, ni ebɔi shiɛmɔ, ni ehe basa waa akɛ mɔ ni kpaa Triniti lɛ he mama.
4 Átsɔɔ mli faŋŋ akɛ Biblia kaselɔi yaa amɛhiɛ waa yɛ mumɔŋ ni amɛdaraa oyayaayai yɛ mumɔŋ kɛ amɛyɔse Yehowa gbɛjianɔtoo lɛ ni amɛkɛbɔ. Nɔ ni sa kadimɔ ji akɛ, beni abaptisi mɛi 3,000 lɛ yɛ Pentekoste sɛɛ lɛ, “amɛtee nɔ amɛtu amɛhe amɛha bɔfoi lɛ atsɔɔmɔ ni amɛkɛ amɛ bɔ yɛ ekomefeemɔ mli.” (Bɔf. 2:42, NW shishigbɛ niŋmaa) Ehe miihia ni wɔye wɔbua nikaselɔi ni amɛfee nakai nɔŋŋ ŋmɛnɛ. Mɛɛ gbɛ nɔ wɔbaanyɛ wɔtsɔ wɔfee nakai?
5 Tsu Gbɛnaa Nii lɛ He Nii: Esa akɛ kaselɔ feelɔ fɛɛ kaselɔ feelɔ ayɔse akɛ eji sɔ̃ ni kã enɔ akɛ etsɔɔ Biblia kaselɔ lɛ gbɛ kɛya Nyɔŋmɔ gbɛjianɔtoo lɛ mli. (1 Tim. 4:16) Esa akɛ abu nikasemɔ fɛɛ nikasemɔ be lɛ akɛ, nifeemɔ gbɛ ni mɔ lɛ baatsɔ nɔ kɛyabote miishɛɛ gbi ni mɔ hee lɛ kɛbaafee ehenɔjɔɔmɔ kɛha Yehowa lɛ he okadi, kɛtsɔ nu mli baptisimɔ nɔ lɛ mli. Sanebimɔi ni abaabi lɛ yɛ baptisimɔ nifeemɔ lɛ mli lɛ eko ji: “Ani onuɔ shishi akɛ ohenɔjɔɔmɔ kɛ baptisimɔ lɛ kadiɔ bo akɛ Yehowa Odasefoi ni kɛ Nyɔŋmɔ gbɛjianɔtoo ni mumɔ kudɔɔ lɛ lɛ bɔɔ lɛ ateŋ mɔ kome?” No hewɔ lɛ, ehe miihia ni eyɔse akɛ enyɛŋ esɔmɔ Nyɔŋmɔ yɛ be mli ni ekɛ anɔkwa Kristofoi asafo lɛ ebɔɔɔ kɛmɔɔɔ shi.—Mat. 24:45-47; Yoh. 6:68; 2 Kor. 5:20.
6 Yaa nɔ otsɔɔ nikaselɔ lɛ nyɛ asafo lɛ he nii, kɛ majimaji ateŋ gbɛjianɔtoo ni yɔɔ Yehowa Odasefoi asɛɛ lɛ he nii. Feemɔ enɛ yɛ Biblia mli nikasemɔ fɛɛ nikasemɔ be mli, kɛjɛ klɛŋklɛŋ nɔ̃ lɛ nɔ. Kɛjɛ shishijee tɔ̃ɔ lɛ, fɔɔ nikaselɔ lɛ nine kɛya kpeei, ni oya nɔ ofɔ nine otsɛ lɛ.—Kpoj. 22:17.
7 Okɛ Dɛŋdadei ni Akɛha lɛ Atsu Nii: Wɔ woji ni hi fe fɛɛ kɛha shia Biblia mli nikasemɔi afeemɔ ji Mɛni Nyɔŋmɔ Taoɔ yɛ Wɔdɛŋ? wolo bibioo lɛ kɛ Nilee Ni Kɛ Mɔ Yaa Naanɔ Wala Mli wolo lɛ. Enyɔ lɛ fɛɛ maa bɔ ni ehe hiaa ni akɛ asafo lɛ abɔ lɛ nɔ mi. Taoɔ wolo bibioo lɛ mli nikasemɔ 5 lɛ naagbee gbɛ lɛ kɛɛ: “Ehe miihia ni oya nɔ okase Yehowa he nii ni ofee toiboo oha etaomɔ nii. Kpeei ni oooya yɛ Yehowa Odasefoi a-Maŋtsɛyeli Asa lɛ nɔ lɛ baaye abua bo koni ofee nakai.” Nilee wolo lɛ yaa nɔ ewoɔ nikaselɔ lɛ hewalɛ koni eya kpeei. Yitso 5 lɛ kuku 22 lɛ kpãa ninefɔɔ nɛɛ mli ehaa akɛ: “Yehowa Odasefoi . . . kɛ miishɛɛ miiwo bo hewalɛ koni okɛ amɛ ana gbɛfaŋnɔ yɛ Nyɔŋmɔ ni ajáa lɛ ‘yɛ mumɔ kɛ anɔkwale mli’ lɛ mli. (Yohane 4:24)” Yitso 12 lɛ kuku 16 lɛ kɛɛ: “Beni oyaa nɔ yɛ nikasemɔ nɛɛ mli ni okɛfeɔ osu akɛ oooya Yehowa Odasefoi akpeei lɛ, enɛ baawaje ohemɔkɛyeli lɛ babaoo.” Yitso 16 lɛ kuku 20 lɛ kɛɛ: “Ha efee osubaŋ akɛ oooya Yehowa Odasefoi akpeei ashishi.” Ekɛfataa he akɛ: “Enɛ baaye abua bo ni onu Nyɔŋmɔ nilee lɛ shishi koni okɛtsu nii yɛ oshihilɛ mli ni ekɛ miishɛɛ baaba abaha bo. Jeŋ muu fɛɛ Kristofoi anyɛmifeemɔ lɛ fã ni oji lɛ baaye abua bo ni ofee mɔ ni hiɔ shi kɛbɛŋkɛɔ Yehowa he.” Yitso 17 lɛ gbaa bɔ ni afeɔ ni anáa anɔkwa shweshweeshwe shihilɛ yɛ Nyɔŋmɔ webii ateŋ lɛ he sane fitsofitso. Be mli ni wɔkɛ mɛi krokomɛi kaseɔ nii lɛ, eji sɔ̃ ni kã wɔnɔ akɛ wɔma nikasemɔ lɛ fãi nɛɛ anɔ mi.
8 Yehowa Odasefoi—Miifee Nyɔŋmɔ Suɔmɔnaa Nii yɛ Ekomefeemɔ Mli yɛ Jeŋ Fɛɛ wolo bibioo lɛ ji dɛŋdade kpakpa ni afee koni akɛha aŋkroaŋkroi ale gbɛjianɔtoo kome pɛ ni anaa ni Yehowa kɛtsuɔ nii ŋmɛnɛ koni ekɛtsu esuɔmɔnaa nii ahe nii. Wɔ sɔɔmɔ nitsumɔ lɛ, kpeei, kɛ gbɛjianɔtoo lɛ ahe saji ni atsɔɔ mli fitsofitso yɛ mli lɛ baawo nikanelɔ lɛ hewalɛ ni ekɛ wɔ abɔ yɛ Nyɔŋmɔ jamɔ mli. Kɛ aje Biblia mli nikasemɔ shishi nɔŋŋ pɛ lɛ, aajie yi akɛ wɔha nikaselɔ lɛ wolo bibioo nɛɛ eko ni lɛ diɛŋtsɛ ekane. Ehe ehiaaa ni akɛ lɛ akase taakɛ afeɔ tsutsu ko lɛ.
9 Video sɔrɔtoi ni Asafo lɛ efee lɛ ekomɛi ji dɛŋdadei ni nɔ bɛ ni akɛbaatsɔɔ nikaselɔi agbɛ kɛya gbɛjianɔtoo ni yɔɔ wɔ gbɛi lɛ sɛɛ lɛ mli. Eeefee nɔ ni hi akɛ amɛaakwɛ (1) The New World Society in Action lɛ ji 1954 sini ni asaa afee lɛ ehee ni maa bɔ ni mumɔ ni suɔmɔ yɔɔ mli ni tsuɔ nii oyayaayai, ni etsuɔ nii jogbaŋŋ, ni Yehowa gbɛjianɔtoo lɛ kɛtsuɔ nii lɛ tsuɔ nii ehaa lɛ nɔ mi; (2) United by Divine Teaching ni kɛ ekomefeemɔ ni toiŋjɔlɛ yɔɔ mli ni ajie lɛ kpo yɛ wɔ majimaji ateŋ kpeei ni afee yɛ Europa Bokagbɛ, Amerika Wuoyigbɛ, Afrika, kɛ Asia lɛ mlipɛimɔ haa; (3) To the Ends of the Earth ni kadi Watchtower Bible School of Gilead lɛ afii 50 gbijurɔyeli lɛ ni etsɔɔ hewalɛ ni maŋsɛɛ sanekpakpa shiɛlɔi lɛ ena yɛ jeŋ muu fɛɛ shiɛmɔ nitsumɔ lɛ nɔ; (4) Jehovah’s Witnesses Stand Firm Against Nazi Assault ni gbaa sane ni haa mɔ mli filiɔ lɛ ni tsɔɔ ekãa kɛ kunimyeli ni Odasefoi lɛ jie lɛ kpo amɛtsɔɔ yɛ be mli ni Hitler kɛ yiwaa ni naa wa waa baa amɛnɔ lɛ; kɛ agbɛnɛ, (5) Jehovah’s Witnesses—The Organization Behind the Name.
10 Okɛ Otii ni Yaa Hiɛ Kɛha Kpeeyaa Amamɔ Ehiɛ: Esa akɛ atsɔɔ mli aha nikaselɔi akɛ nii ni atsɔɔ yɛ teemɔŋ yɛ shia Biblia mli nikasemɔ mli, kɛ sane ni ayagbaa yɛ he kroko ni akɛhaa yɛ asafoŋ kpeei ashishi lɛ fɛɛ he miihia wɔ. (Yoh. 6:45) Ehe miihia ni shishinumɔ ni mɔ hee lɛ náa yɛ Ŋmalɛi lɛ ahe kɛ gbɛjianɔtoo lɛ shishi ni enuɔ lɛ anyiɛ pɛpɛɛpɛ. Kɛha nakai feemɔ lɛ, nɔ ko kwraa bɛ ni akɛtoɔ kpeei ni aaaya lɛ najiaŋ. (Heb. 10:23-25) Jee shishi ofɔ mɔ lɛ nine kɛya asafoŋ kpeei ashishi amrɔ nɔŋŋ. Mɛi heei komɛi ni yɔɔ wiemɔ lɛ he miishɛɛ lɛ jeɔ kpeeyaa shishi dani akɛ amɛ feɔ daa shia Biblia mli nikasemɔ po. Shi kɛlɛ, wɔmiisumɔ ni wɔ diɛŋtsɛ wɔfee nɔkwɛmɔ nɔ kpakpa wɔfɔ shi kɛtsɔ kpee ni wɔɔya daa lɛ nɔ.—Luka 6:40; Fil. 3:17.
11 Gbaa kpeei lɛ kɛ bɔ ni afeɔ lɛ ahaa lɛ he saji saŋŋ otsɔɔ nikaselɔ lɛ, koni emii ashɛ ehe ni ekana naagba ko kɛ́ eeya kpee klɛŋklɛŋ kwraa lɛ. Akɛni mɛi komɛi ahiɛ emɛɛɛ kwraa kɛ́ kpaako kwraa amɛyaa hei komɛi ni amɛyako jɛmɛ dã lɛ hewɔ lɛ, eeefee nɔ ni sɛɛnamɔ yɔɔ he akɛ ooofata nikaselɔ lɛ he kɛya Maŋtsɛyeli Asa lɛ nɔ beni eyaa kpee klɛŋklɛŋ kwraa lɛ. Ehiɛ baamɛ babaoo kɛ ofata ehe yɛ be mli ni ekɛ asafo lɛŋ bii kpeɔ lɛ. Bɔ fɛɛ bɔ ni ji lɛ, feemɔ gbɔfeelɔ kpakpa oha ogbɔ lɛ, ni oha ehiɛ amɛ ni emii ashɛ ehe.—Mat. 7:12; Fil. 2:1-4.
12 Wo nikaselɔ lɛ hewalɛ ni eya kpokpaa nɔ kpee, kpee krɛdɛɛ gbi, loo kpokpaa wulu nɔ kpee kɛ́ hegbɛ lɛ ba nɔŋŋ lɛ. Ekolɛ obaanyɛ okɛ lɛ afata otsɔne mlitamɔ he gbɛjianɔ ni otoɔ lɛ he.
13 Ha Ena Hiɛsɔɔ ni Jɛ Tsuiŋ: Organized to Accomplish Our Ministry wolo lɛ baafa 92 tsɔɔ mli akɛ: “Kɛ hiɛsɔɔ ni mli kwɔ ni oyɔɔ kɛha Yehowa gbɛjianɔtoo lɛ je kpo yɛ okɛ mɛi ni yɔɔ wiemɔ lɛ he miishɛɛ lɛ asanegbaai amli lɛ, ewaŋ kɛhaŋ amɛ akɛ amɛaana hiɛsɔɔ babaoo, ni ebaatsirɛ amɛ koni amɛya hiɛ waa diɛŋtsɛ yɛ Yehowa ni amɛaale lɛ lɛ mli.” Wiemɔ nyɛ asafo lɛ he ekpakpa be fɛɛ be, shi jeee bɔ ni esaaa. (Lala 84:11; 133:1, 3b) Tsĩi asafo lɛ kɛ bɔ ni ehe hiaa ni nikaselɔ lɛ kɛ ehe abɔ he lɛ tã, kɛ oosɔle yɛ Biblia mli nikasemɔ lɛ mli.—Efes. 1:15-17.
14 Eka shi faŋŋ akɛ, wɔmiisumɔ ni mɛi heei lɛ ana hiɛsɔɔ ni jɛ tsuiŋ amɛha naanyobɔɔ ni ŋɔɔ kɛ mumɔŋ shweshweeshwe feemɔ ni anaa yɛ Nyɔŋmɔ webii ateŋ lɛ. (1 Tim. 3:15; 1 Pet. 2:17; 5:9) Akɛ Yehowa Odasefoi lɛ, nyɛhaa wɔfea bɔ fɛɛ bɔ ni wɔɔnyɛ, koni wɔtsɔɔ Nyɔŋmɔ Wiemɔ lɛ kaselɔi agbɛ kɛya gbɛjianɔtoo ni yɔɔ wɔ gbɛi lɛ sɛɛ lɛ mli.
[Mfoniri he niŋmaa ni yɔɔ baafa 3]
Nikaselɔi yaa amɛhiɛ waa yɛ mumɔŋ kɛ amɛ diɛŋtsɛ amɛna gbɛjianɔtoo lɛ
[Mfoniri he niŋmaa ni yɔɔ baafa 4]
Kaashashao shi akɛ ooofɔ̃ nikaselɔi anine kɛya kpeei