Wiemɔ Biblia Mli Nikasemɔ He Otsɔɔ Mɛi Daa
1. Kɛ́ wɔɔye Yesu fãmɔ ni yɔɔ Mateo 28:19, 20 lɛ nɔ lɛ, mɛni ebiɔ ni wɔfee?
1 Yesu fã wɔ akɛ ‘wɔfee mɛi ekaselɔi ni wɔtsɔɔ amɛ nii.’ (Mat. 28:19, 20) No hewɔ lɛ, wɔmiisumɔ ni wɔfee klalo be fɛɛ be akɛ wɔbaawie bɔ ni wɔkɛ mɛi feɔ Biblia mli nikasemɔ wɔhaa lɛ he wɔtsɔɔ mɛi, shi jeee yɛ gbi ni aje gbɛ ato yɛ otsi lɛ naagbee kɛha Biblia mli nikasemɔ feemɔ lɛ pɛ nɔ. Ŋaawoi ni nyiɛ sɛɛ nɛɛ baanyɛ aye abua wɔ.
2. Namɛi wɔbaanyɛ wɔkɛɛ amɛ akɛ wɔbaasumɔ ni wɔkɛ amɛ akase Biblia lɛ?
2 Okɛ Mɛi Awie He: Babaoo ni wɔkɛ mɛi wieɔ akɛ wɔmiisumɔ ni wɔkɛ amɛ akase Biblia lɛ, babaoo ni wɔbaaná Biblia mli nikaselɔi. (Jaj. 11:6) Ani oka gbɛ ni yɔɔ tɛ̃ɛ lɛ okwɛ dã? Yɛ nyɔɔŋ ko nɔ lɛ, asafo ko ni yɔɔ United States lɛ bɔ mɔdɛŋ akɛ amɛbaafee enɛ yɛ nakai nyɔɔŋ lɛ mli fɛɛ. Amɛná miishɛɛ waa beni amɛkɛ mɛi hei 42 bɔi Biblia lɛ kasemɔ lɛ! Kaasusu akɛ mɛi ni okɛkpeɔ yɛ shiɛmɔ nitsumɔ lɛ mli ni yɔɔ wiemɔ lɛ he miishɛɛ lɛ le akɛ ootao ni okɛ amɛ akase Biblia lɛ. Mɛni hewɔ be kroko kɛ́ otee amɛŋɔɔ lɛ, okɛ amɛ ewieee akɛ obaasumɔ ni okɛ amɛ akase Biblia lɛ? Kɛ́ amɛkpɛlɛɛɛ nɔ lɛ, no fiteee nɔ ko. Obaanyɛ oya nɔ owie he otsɔɔ mɛi. Ani obi okutsoŋbii, owekumɛi, onanemɛi nitsulɔi, kɛ onanemɛi skulbii kɛji amɛbaasumɔ ni okɛ amɛ akase Biblia lɛ? Agbɛnɛ hu, obaanyɛ obi o-Biblia mli nikaselɔi lɛ kɛji amɛyɛ nanemɛi loo wekumɛi ni baasumɔ ni akɛ amɛ akase Biblia lɛ.
3. Mɛɛ dɛhiɛmɔ wolo wɔyɔɔ ni baaye abua wɔ ni wɔje Biblia mli nikasemɔ shishi, ni mɛɛ be wɔbaanyɛ wɔkɛtsu nii?
3 Dɛhiɛmɔ Wolo ni Baanyɛ Aye Abua Wɔ: Dɛhiɛmɔ wolo ko ni baaye abua wɔ ni wɔje Biblia mli nikasemɔ shishi ji, Ani Obaasumɔ ní Ole Anɔkwale Lɛ? Obaanyɛ okɛ eko aha shĩatsɛmɛi kɛ́ amɛŋɔ wɔwoji krokomɛi lɛ eko loo amɛŋɔɔɔ eko. Wɔbaanyɛ wɔkɛtsu nii kɛ́ wɔmiishiɛ yɛ nitsumɔhei, gbɛjegbɛi ahe, beni wɔkɛ woji miimaje, kɛ beni wɔfeɔ sɛɛkuu-kɛsaramɔi. Wɔbaanyɛ wɔshi hu yɛ mɛi ni bɛ shĩa lɛ ashinai anaa. Mɛni hewɔ ohiɛɛɛ eko yɛ ohe kɛ́ oyaawo tsɔne, kɛ́ oyaaye jara, kɛ beni otsuɔ nii lɛ? Sane ni yɔɔ wolo lɛ sɛɛ lɛ wieɔ bɔ ni wɔkɛ mɛi kaseɔ Biblia lɛ wɔhaa lɛ he kuku, ni ejieɔ Biblia lɛ Tsɔɔ wolo lɛ yi ehaa mɛi.
4. Te wɔɔfee tɛŋŋ wɔkɛ Le Anɔkwale Lɛ dɛhiɛmɔ wolo lɛ atsu nii kɛje nikasemɔ shishi?
4 Beni oha mɔ ko dɛhiɛmɔ wolo lɛ sɛɛ lɛ, obaanyɛ okɛ sanebimɔi ni yɔɔ wolo lɛ hiɛ lɛ atsɔɔ lɛ ni obi lɛ akɛ, “Te sanebimɔi nɛɛ ateŋ nɔ ni onyaa he waa lɛ?” No sɛɛ lɛ, okɛ lɛ asusu hetoo lɛ he kɛjɛ dɛhiɛmɔ wolo lɛ mli, ni okane loo owie sane ni yɔɔ wolo lɛ sɛɛ ni tsɔɔ bɔ ni wɔkɛ mɛi kaseɔ Biblia lɛ wɔhaa lɛ he otsɔɔ lɛ. No sɛɛ lɛ, obaanyɛ otsɔɔ lɛ he ni ebaana sane ni nyɛsusu he lɛ he saji babaoo yɛ, yɛ Biblia lɛ Tsɔɔ wolo lɛ mli, ni okɛ wolo lɛ aha lɛ, koni oto gbɛjianɔ ni oku osɛɛ okɛ lɛ ayatsa sanegbaa lɛ nɔ.
5. Mɛni hewɔ esa akɛ wɔfee klalo akɛ wɔbaawie bɔ ni wɔkɛ mɛi feɔ Biblia mli nikasemɔ wɔhaa lɛ he wɔtsɔɔ mɛi lɛ?
5 Mɛi babaoo yɛ wɔshikpɔŋkuku lɛ mli lolo ni miisumɔ ni amɛle nɔ ni Biblia lɛ tsɔɔ diɛŋtsɛ. Kɛ́ wɔfee klalo akɛ wɔbaawie bɔ ni wɔkɛ mɛi feɔ Biblia mli nikasemɔ wɔhaa lɛ he wɔtsɔɔ mɛi lɛ, ebaaha wɔná hegbɛi babaoo ni wɔkɛye wɔbua mɛi ní amɛbanyiɛ wala gbɛ lɛ nɔ, ni no baaha wɔná miishɛɛ.—Mat. 7:13, 14.