Jɔɔmɔi ni Jɛɔ Hiɛsɔɔ ni Ayɔɔ Kɛha Yehowa Suɔmɔ lɛ Mli Baa—Fã 2
1 Wɔma gbɛ̀i srɔtoi ejwɛ ni abaanyɛ atsɔ nɔ atsɔɔ wɔ hiɛsɔɔ kɛha Yehowa suɔmɔ yɛ sɔɔmɔ nitsumɔ lɛ mli lɛ nɔ mi, yɛ sane nɛɛ fã ni wɔsusu he yɛ nyɔŋ ni ho lɛ mli. (1 Yoh. 4:9-11) Wɔkɛ gbɛ̀i krokomɛi enumɔ ni akɛbaafee enɛ lɛ baafata he. Ajɔɔ wɔ, kɛji akɛ wɔkɛ wɔhe wo mɛi krokomɛi ayelikɛbuamɔ yɛ mumɔŋ lɛ mli kwraa.
2 Trukaa Odaseyeli: Enɛ ji gbɛ ni mɔɔ shi jogbaŋŋ ni atsɔɔ nɔ anaa gbɔmɛi ni jalɛ he hɔmɔ kɛ kumai yeɔ amɛ ni akɛ woji ni yeɔ buaa haa amɛ. Ehi akɛ ‘aaahe be ni kɛ hegbɛ haa lɛ’ ni akɛye odase yɛ shihilɛi fɛɛ mli kɛ mɔ fɛɛ mɔ ni wɔkɛ lɛ aaakpe. (Efe. 5:16) Ehe baahia ni wɔná ekãa ni wɔkɛye odase yɛ nɛkɛ gbɛ nɔ, shi kɛji akɛ wɔhiɛ sɔɔ Nyɔŋmɔ suɔmɔ lɛ kɛ gbɔmɛi ahiamɔ nii lɛ, wɔbaaye odase yɛ hegbɛ fɛɛ hegbɛ ni wɔɔná mli.—2 Tim. 1:7, 8.
3 Ajɔɔ maŋsɛɛ sanekpakpa shiɛlɔ ko babaoo yɛ sanegbaa ni ekɛ naanyo gbɛfalɔ ko ni ekɛ lɛ ta taksi mli lɛ je shishi lɛ hewɔ. Nuu lɛ jie miishɛɛ kpo. Ato sɛɛsaramɔi ahe gbɛjianɔ, ni aje Biblia mli nikasemɔ shishi. Nakai nuu lɛ ba anɔkwale lɛ mli ni etee ehiɛ aahu kɛyashi ebatsɔ asafoŋ onukpa!
4 Woji Aŋmalamɔ: Ekolɛ wɔnyɛɛɛ wɔya shia kɛ shia yɛ gbɔmɔtsoŋ hela ko loo kɔɔyɔŋ tsakemɔ ko ni ehiii lɛ hewɔ. Wɔbaanyɛ wɔŋmala woji wɔmaje amɛ, ni wɔye mɛi ni wɔle amɛ, mɛi ni amɛsuɔlɔi egboi, aloo mɛi ni bɛ shia yɛ shikpɔŋkuku lɛ mli lɛ odase kuku. Wɔbaanyɛ ni wɔkɛ wɔ dɛhiɛmɔ woji ni eba yɛ ebe naa pɛpɛɛpɛ, ni emli sane lɛ damɔ Biblia mli shɛɛ sane ko ni ŋɔɔ nɔ, ni woɔ mɔ ni nine shɛɔ nɔ lɛ hewalɛ koni eha hetoo kɛ́ eyɛ sanebimɔ ko lɛ hewalɛ lɛ eko awo mli wɔha lɛ. Okɛ bo diɛŋtsɛ odrɛs loo Maŋtsɛyeli Asa lɛ nɔ̃ atsu nii; ofainɛ okɛ nitsumɔhe nine lɛ nɔ̃ lɛ akatsu nii.
5 Tɛlifoŋ nɔ Odaseyeli: Enɛ ji gbɛ ni hi jogbaŋŋ ni atsɔɔ nɔ koni nine ashɛ gbɔmɛi ni wɔkɛ amɛ ekpeee yɛ shia kɛ shia nitsumɔ lɛ mli lɛ anɔ. Kɛji akɛ wɔkɛ nilee, mlihilɛ, ŋaalee, kɛ hesaa fee enɛ lɛ, wɔnine baanyɛ ashɛ nɔkpɛlɛmɔ kpakpa nɔ. February 2001 Wɔ Maŋtsɛyeli Sɔɔmɔ lɛ baafa 5 kɛyashi 6 lɛ kɛ ŋaawoo ni anyɛɔ atsuɔ he nii yɛ gbɛ ni aaatsɔ nɔ ni nɔkpakpa ajɛ mli aba haa.
6 Beni nyɛmi yoo ko kɛ tɛlifoŋ yeɔ odase lɛ, ebi yoo ko kɛji akɛ esusu nɔ ni yɔɔ wɔsɛɛ be kɛha lɛ kɛ eweku lɛ he jogbaŋŋ. Yoo lɛ kɛɛ efee nakai. Ejie lɛ kpo akɛ akɛni ehao hewɔ lɛ, etsi ehe kɛjɛ mɛi ahe yɛ shia. Akɛni mɔ he susumɔ diɛŋtsɛ kanya nyɛmi yoo lɛ hewɔ lɛ, yoo lɛ kpɛlɛ nɔ akɛ ekɛ lɛ baakpe yɛ jara ko ni bɛŋkɛ lɛ mli. Nɔ ni jɛ mli ba ji akɛ, yoo lɛ kpɛlɛ Biblia mli nikasemɔ nɔ amrɔ nɔŋŋ!
7 Gbɔi ni Ahereɔ Amɛ Hiɛmɛɛ: Kɛji akɛ wɔsumɔɔ wɔ akutsoŋbii lɛ, wɔhiɛ baahi wɔhe nɔ koni wɔyoo gbɔ ko ni eba wɔkpeehe lɛ ni wɔha enu he akɛ aahere lɛ hiɛmɛɛ. (Rom. 15:7) Ha ena akɛ eyɛ mɛi ni yɔɔ emumɔŋ hilɛ-kɛhamɔ he miishɛɛ diɛŋtsɛ atɛŋ. Bɔ ni wɔkɛ anɔkwayeli susuɔ ehe kɛ Biblia lɛ kasemɔ ni wɔkɛfɔ̃ɔ ehiɛ lɛ baanyɛ akanya lɛ ni ekpɛlɛ wɔ yelikɛbuamɔ lɛ nɔ.
8 Wɔ Jeŋba Kpakpa Lɛ: Wɔtsɔɔ wɔ jeŋba kpakpa nɔ wɔwulaa anɔkwale lɛ. (Tito 2:10) Kɛji akɛ mɛi ni yɔɔ je lɛ mli lɛ wie wɔhe ekpakpa ákɛ Yehowa Odasefoi lɛ, amɛwoɔ wɔ-Nyɔŋmɔ lɛ hiɛ nyam. (1 Pet. 2:12) Enɛ hu baanyɛ aye abua mɛi krokomɛi ni amɛje gbɛ ni kɛ amɛ yaa wala mli lɛ nɔ nyiɛmɔ shishi.
9 Mɛni hewɔ wɔtiii nɛkɛ gbɛ̀i srɔtoi enumɔ nɛɛ amli ni wɔkɛtsɔɔ wɔ hiɛsɔɔ kɛha suɔmɔ babaoo ni Yehowa yɔɔ kɛha wɔ lɛ, ni wɔkɛtsu nii? (1 Yoh. 4:16) Beni ofeɔ nakai lɛ, onine baashɛ jɔɔmɔi babaoo nɔ.