Aaye Odase—Kɛyashi Shikpɔŋ lɛ Naagbeehei

Namɛi baasumɔ ni amɛkwɛ vidio ni ji To the Ends of the Earth (Kɛyashi Shikpɔŋ lɛ Naagbeehei) lɛ shii abɔ? Mɛi ni amɛkɛfee oti ni ma amɛhiɛ akɛ amɛbaatsɔmɔ maŋsɛɛ sanekpakpa shiɛlɔi lɛ. Mɛni hewɔ? Bɔni afee ni amɛle nɔ ni yaa nɔ yɛ Buu-Mɔɔ Biblia Gilead Skul lɛ. Vidio lɛ ye skul ni ekaaa ni afee koni elɛɛ odaseyeli nitsumɔ lɛ mli kɛyashi “shikpɔŋ naagbeehei lɛ fɛɛ” lɛ afii 50 he gbi jurɔ lɛ. (Lala 22:28) Ekwɛmɔ baaha hiɛsɔɔ ni oyɔɔ kɛha sanekpakpa lɛ shiɛmɔ ni he hiaa fe fɛɛ lɛ aya hiɛ, ni ebaakanya bo kɛha nitsumɔ ni fa. Susumɔ enɛ he: (1) Beni shɛɔ afi 1940 afii lɛ shishijee mli lɛ, no mli lɛ mɛni ebafee nɔ titri ni Yehowa gbɛjianɔtoo lɛ susuɔ he? (Bɔf. 1:8) (2) Mɛɛ Biblia gbalɛ ni yɔɔ naakpɛɛ baa mli yɛ afi 1942 mli, ni mɛɛ gbɛ nɔ nɔ ni wɔkɛ wɔjwɛŋmɔ ema nɔ lɛ yɔɔ srɔto yɛ je lɛ fɛɛ nɔ he? (Kpoj. 17:8; w89 4/15 bf. 14 kk. 12) (3) Mɛɛ gbɛjianɔ ato koni aŋɔ hegbɛ ni toiŋjɔlɛ be ni akpaa gbɛ yɛ Jeŋ Ta II sɛɛ lɛ kɛbaaha lɛ atsu nii? (jv bf. 522 kk. 1-2) (4) Mɛɛ sui ji nɔ ni ohiɛ sɔɔ yɛ klɛŋklɛŋ Gilead Skul nikaselɔi aklas lɛ he? (5) Nikaselɔi enyiɛ kase nii amɛgbe naa yɛ Gilead klɛŋklɛŋ afii 50 lɛ mli, ni shikpɔji enyiɛ atsu amɛ kɛtee nɔ? (6) Biblia mli nikasemɔi loo tsɔsemɔi enyiɛ nikaselɔi lɛ anine shɛɔ nɔ diɛŋtsɛ? (7) Mɛni feɔ mɔ maŋsɛɛ sanekpakpa shiɛlɔ kɛ Nyɔŋmɔ Wiemɔ lɛ tsɔɔlɔ kpakpa? (8) Maŋsɛɛ sanekpakpa shiɛlɔ shihilɛ tamɔ mɛni, ni mɛɛ kaai esa akɛ ekɛkpe? (9) Te maŋsɛɛ sanekpakpa shiɛlɔi nuɔ amɛshihilɛ gbɛ lɛ he amɛhaa tɛŋŋ, ni mɛɛ miishɛɛ krɛdɛɛ jɛɔ amɛ he kɛ-afɔleshaa shihilɛ gbɛ lɛ mli baa? (10) Mɛni maŋsɛɛ sanekpakpa shiɛlɔi akpei abɔ lɛ enyɛ amɛtsu kɛbashi bianɛ? Okɛ nɔkwɛmɔnii aha. (11) Te onuɔ nyɛmimɛi hii kɛ yei ní amɛtee “shikpɔŋ naagbeehei lɛ” koni amɛyashiɛ lɛ he ohaa tɛŋŋ? (12) Nɔkwɛmɔnɔ ni maŋsɛɛ sanekpakpa shiɛlɔi lɛ efee amɛfɔ̃ shi lɛ woɔ bo hewalɛ koni ofee mɛni, ni mɛni hewɔ?