Fɔlɔi—Nyɛtsɔsea Nyɛbii lɛ Kɛjɛa Amɛgbekɛbiiashi
1 “Tsɔɔmɔ gbekɛ gbɛ ni sa akɛ etsɔ nɔ, ni kɛ egbɔ hu lɛ, ejeŋ nɔ.” (Abɛi 22:6) Fɔlɔi, kɛji akɛ nyɛsumɔɔɔ ni nyɛbii ‘aje’ anɔkwale gbɛ lɛ nɔ lɛ, mɛɛ be esa akɛ tsɔsemɔ ni tamɔ nɛkɛ aje shishi? Kɛjɛ amɛgbekɛbiiashi!
2 Eka shi faŋŋ akɛ beni Paulo kɛɛ akɛ Timoteo mumɔŋ tsɔsemɔ je shishi kɛjɛ “egbekɛbiiashi” lɛ, eetsɔɔ akɛ kɛjɛ ebifabiiaŋ. (2 Tim. 3:14, 15) Nɔ ni jɛ mli ba ji akɛ, Timoteo da ni ebatsɔ mumɔŋ gbɔmɔ. (Fil. 2:19-22) Fɔlɔi, esa akɛ nyɛ hu nyɛjɛ ‘gbekɛbiiashi’ nyɛkɛ tsɔsemɔ ni he hiaa nyɛbii lɛ aha amɛ koni ‘amɛdara yɛ Yehowa hiɛ.’—1 Sam. 2:21.
3 Nyɛkɛ Nu ni He Hiaa Amɛ Koni Amɛdara lɛ Ahaa Amɛ: Tamɔ bɔ pɛ ni nu he hiaa tsei bibii daa koni amɛnyɛ amɛdara kɛbatsɔmɔ tsei wuji lɛ, nakai nɔŋŋ ebiɔ ni aha gbekɛbii ni eye afii srɔtoi lɛ ayi obɔ kɛ nu ni ji Biblia lɛ mli anɔkwale lɛ koni amɛdara kɛbatsɔmɔ Nyɔŋmɔ tsuji ni edara yɛ mumɔŋ. Shishijee gbɛ ni atsɔɔ nɔ atsɔɔ gbekɛbii anɔkwale lɛ ni aye abua amɛ ni amɛná amɛkɛ Yehowa teŋ wekukpaa ni yɔɔ gbagbalii lɛ ji kɛtsɔ weku Biblia mli nikasemɔ ni afeɔ daa nɔ. Shi fɔlɔi, nyɛsusua be sɛɛkɛlɛ ni gbekɛ fɛɛ gbekɛ jwɛŋmɔ nyɛɔ emɔɔ nii lɛ he. Kɛha gbekɛbii lɛ, ekolɛ nitsɔɔmɔ bei ni sɛɛ kɛlɛɛɛ, ni aaafee lɛ kpitiokpitio lɛ baamɔ shi jogbaŋŋ fe nitsɔɔmɔ bei fioo ni sɛɛ kɛ.—5 Mose 11:18, 19.
4 Kaabu nyɛmɔ ni obii lɛ yɔɔ ni amɛkɛaakase nii lɛ akɛ nɔ ko bibioo. Gbaa amɛ saji ni kɔɔ Biblia mli gbɔmɛi ahe. Hã amɛtɛ̃ŋ Biblia mli saji ahe mfonirii loo amɛfee Biblia mli shihilɛ he nɔkwɛmɔnii. Okɛ vidiokasɛtii kɛ kasɛtii ni wɔyɔɔ lɛ atsu nii kɛmɔ shi, kɛ Biblia mli dramai lɛ hu. Nyɛtsakea nikasemɔ lɛ yɛ afii ni nyɛbii lɛ eye kɛ nyɛmɔi ni amɛyɔɔ ni akɛkaseɔ nii lɛ anaa. Shishijee tsɔsemɔ lɛ baafee shishijee nibii, ni faaa; shi be mli ni gbekɛ ko daa lɛ, esa akɛ etsɔsemɔ lɛ mli alɛɛ ni eya nɔ babaoo. Hã Biblia mli nikasemɔ afee nɔ ni ŋɔɔ kɛ nɔ ni akɛ gbɛ̀i srɔtoi tsuɔ he nii. Nyɛmiisumɔ ni nyɛbii lɛ aná ‘shwelɛ’ kɛha Wiemɔ lɛ, no hewɔ lɛ nyɛhaa nikasemɔ lɛ aŋɔɔa bɔ ni nyɛbaanyɛ.—1 Pet. 2:2.
5 Nyɛhaa Amɛkɛ Amɛhe Awoa Asafo Nifeemɔi Amli: Nyɛkɛ otii ni kɛ nɔyaa baa amamɔa nyɛbii lɛ ahiɛ bɔni afee ni amɛkɛ amɛhe awo asafo lɛ nifeemɔi amli kɛmɔ shi. Mɛni baanyɛ afee klɛŋklɛŋ oti ni ma amɛhiɛ? Fɔlɔi komɛi ni yɔɔ bii bibii enyɔ lɛ kɛɛ akɛ: “Amɛyi enyɔ lɛ fɛɛ amɛje shishi amɛnine shɛ tsɔsemɔ nɔ yɛ bɔ ni ataa shi dioo yɛ Maŋtsɛyeli Asa lɛ nɔ lɛ nɔ.” Sɛɛ mli lɛ, ye obua gbekɛbii koni amɛha saji ahetoo yɛ amɛ diɛŋtsɛ amɛwiemɔi amli yɛ kpeei ashishi, agbɛnɛ koni amɛha efee oti ni ma amɛhiɛ akɛ amɛkɛ amɛhe baawo Teokrase Sɔɔmɔ Skul lɛ mli. Otii kpakpai ni nine baanyɛ ashɛ nɔ yɛ sɔɔmɔ nitsumɔ lɛ mli ji, ni akɛ dɛhiɛmɔ woji baaha yɛ shinaai anaa, ni akane ŋmalɛi, akɛ wolo tɛtrɛɛ he shiɛmɔ wiemɔ aha, kɛ shiatsɛmɛi ni akɛaaná sanegbai ni shishinumɔ yɔɔ mli.
6 Feemɔ Nɔkwɛmɔnɔ ni Ekãa Yɔɔ Mli: Ani obii lɛ nuɔ ni oowie Yehowa he daa ní oosɔle ooha lɛ? Ani amɛnaa bo akɛ ookase e-Wiemɔ lɛ, oyaa kpeei, okɛ ohe woɔ shiɛmɔ nitsumɔ lɛ mli, ni onáa miishɛɛ yɛ Nyɔŋmɔ suɔmɔnaa nifeemɔ mli? (Lala 40:9) Ehe miihia waa akɛ amɛaana akɛ oofee nakai ni akɛ nyɛbaafee ekome kɛfee nibii nɛɛ. Biyoo ko ni eda wie yɛ enyɛ, ni etsɔse bii ekpaa ni amɛbatsɔmɔ Odasefoi anɔkwafoi lɛ he akɛ: “Nɔ ni wɔnáa he miishɛɛ fe fɛɛ ji nɔkwɛmɔnɔ ni Awo diɛŋtsɛ feɔ lɛ—emɔɔ shi jogbaŋŋ fe wiemɔi diɛŋtsɛ.” Fɔlɔ ko ni yɔɔ bii ejwɛ lɛ kɛɛ akɛ: “Wiemɔ ni ji ‘Yehowa baa klɛŋklɛŋ,’ ni wɔkɛɔ lɛ jeee wiemɔ folo ko kɛkɛ shi moŋ nakai wɔhiɔ shi wɔhaa.”
7 Fɔlɔi, nyɛjea shishi mra nyɛtsɔsea nyɛbii lɛ, nyɛtsɔa amɛ anɔkwalei ni jɛ Nyɔŋmɔ Wiemɔ lɛ mli, nyɛkɛ otii ni kɛ nɔyaa baa amamɔ amɛhiɛ, ni nyɛfee nɔkwɛmɔnɔ ni hi fe fɛɛ nyɛhaa amɛ. Nyɛbaaná miishɛɛ kɛji nyɛfee nakai!