‘Nyɛfea Mɛi Fɛɛ Ejurɔ’
1 “Shiɛmɔ Nyɔŋmɔ Wiemɔ lɛ Kɛmɔ Shi” kɛ “Nyɛtsɔmɔa Niiatsɛmɛi yɛ Ejurɔfeemɔi Agbɛfaŋ” ji saneyitsei ni akɛtsu nii yɛ nɔ ni aŋma ahɔ February kɛ March 2002 Wɔ Maŋtsɛyeli Sɔɔmɔ lɛ mli lɛ mli. (Kol. 1:25; 1 Tim. 6:18) Yɛ nakai saneyitsei lɛ amli lɛ, awo wɔ hewalɛ ni wɔbɔ mɔdɛŋ babaoo koni wɔye wɔbua mɛi ni yɔɔ wiemɔ lɛ he miishɛɛ lɛ ni amɛba Kaimɔ lɛ, ni wɔye wɔbua mɛi ni ekpa shiɛmɔyaa lɛ ni amɛkɛ asafo lɛ abɔ ekoŋŋ, ni wɔye wɔbua wɔbii lɛ kɛ wɔ Biblia mli nikaselɔi ni he esa lɛ ni amɛje shishi amɛshiɛ sanekpakpa lɛ. Ŋwanejee ko bɛ he akɛ wɔná omanyeyelii komɛi amli niiashikpamɔ yɛ mɔdɛŋ ni wɔbɔ waa lɛ hewɔ. Agbɛnɛ, “akɛ nɔ ni wɔyɔɔ deka hewɔ lɛ, nyɛhaa [wɔyaa nɔ] wɔfea mɛi fɛɛ ejurɔ.”—Gal. 6:10.
2 Fɔ̃ɔ Amɛ Nine ni Amɛba Ekoŋŋ: Yɛ Ghana lɛ, mɛi ni amɛjeee sanekpakpa lɛ jajelɔi ni fe 150,000 baa Kaimɔ lɛ daa afi. Akɛni jɛmɛ ni amɛbaa lɛ tsɔɔ miishɛɛ ko ni amɛyɔɔ lɛ hewɔ lɛ, mɛni esa akɛ wɔfee ni wɔkɛkanya mɛi ní “ajie ato naanɔ wala lɛ” koni amɛbatsɔmɔ “heyelilɔi”? (Bɔf. 13:48) Wo amɛ hewalɛ ni amɛku sɛɛ amɛba asafoŋ kpeei amrɔ nɔŋŋ.
3 Mɛni hewɔ ofɔ̃ɔɔ mɔ ko ni yɔɔ wiemɔ lɛ he miishɛɛ lɛ nine kɛbaaa Asafo Woloŋ Nikasemɔ lɛ shishi koni ebaná Yesaia gbalɛ lɛ he nikasemɔ ni yɔɔ miishɛɛ lɛ mli ŋɔɔmɔ? Kɛ mɔ lɛ wekunyo ji bo loo ele bo, ni aha bo nifeemɔ koni obaha wiemɔ yɛ Teokrase Sɔɔmɔ Skul ni baa lɛ mli lɛ, obaanyɛ ofɔ̃ mɔ lɛ nine ni ebabo owiemɔ lɛ toi. Ha ele maŋshiɛmɔi ni abaaha yɛ otsii ni baa lɛ mli lɛ ayitsei. (Esa ákɛ akɛ gbɛjianɔ ni ato ni yɔɔ ebe naa pɛpɛɛpɛ lɛ akpɛtɛ adafitswaa tao lɛ nɔ.) Taomɔ hegbɛ fɛɛ hegbɛ ni oooná koni okɛtee shwelɛ ni eeená eha Yehowa jamɔ lɛ shi. Ni yɛ anɔkwale mli lɛ, kɛ mɔ ko kɛ lɛ ejeko Biblia mli nikasemɔ shishi momo yɛ asafo lɛ mli lɛ, obaanyɛ ojɛ mlihilɛ mli obi ni okɛ lɛ aje nikasemɔ shishi.
4 Yaa nɔ Owo Mɛi ni Ekpa Shiɛmɔyaa lɛ Hewalɛ: Mɛi ni ba Kaimɔ lɛ shishi lɛ ateŋ mɛi babaoo ejɔɔ amɛhe nɔ amɛha Yehowa momo. Shi kɛlɛ, yɛ be ko mli lɛ amɛkpa sanekpakpa lɛ shiɛmɔ kɛ ekãa. Ni kɛlɛ, Paulo wo wɔ hewalɛ ni ‘wɔfee mɛi fɛɛ ejurɔ . . . titri lɛ mɛi ni ji hemɔkɛyeli lɛ webii lɛ.’ (Gal. 6:10) No hewɔ lɛ, esa akɛ mɛi ni ekpa shiɛmɔyaa lɛ afee mɛi ni wɔsusuɔ amɛhe titri.
5 Ekolɛ amɛteŋ mɛi komɛi ekpɛlɛ hewalɛwoo ni onukpai lɛ kɛ mɛi krokomɛi kɛha amɛ ní amɛkɛ amɛhe awo sɔɔmɔ lɛ mli ekoŋŋ lɛ nɔ momo ni amɛkɛmiitsu nii. Kɛ onukpai lɛ kɛ shiɛlɔ ko ni asaa akanya lɛ ha bo ni okɛ lɛ atsu nii lɛ, ná ole akɛ suɔmɔ ni oyɔɔ kɛha Yehowa kɛ shiɛmɔ nitsumɔ lɛ baaha mɔ lɛ anà hekɛnɔfɔɔ yɛ emli. Tsɔɔmɔ lɛ bɔ ni ofeɔ okɛ ohe woɔ sɔɔmɔ nitsumɔ lɛ fai srɔtoi lɛ amli bɔni afee ni enyɛ ená miishɛɛ yɛ mli, ni ekɛ ehe awo shiɛmɔ nitsumɔ lɛ mli daa, ni ebaaná Yehowa dɛŋ jɔɔmɔi.
6 Ye Obua Shiɛlɔi Heei koni Amɛná Shishijee Kpakpa: Beni yoo ko ni ená wiemɔ lɛ he miishɛɛ klɛŋklɛŋ kwraa lɛ yɔse akɛ ena Nyɔŋmɔ anɔkwa gbɛjianɔtoo lɛ, ená he miishɛɛ akɛ eeeje shiɛmɔ nitsumɔ lɛ shishi amrɔ nɔŋŋ. Beni ekase nɔ ni ataoɔ yɛ edɛŋ sɛɛ lɛ, ewie akɛ: “Ha wɔje shishi amrɔ nɔŋŋ.” Kɛji akpɛlɛ mɔ ko ni okɛ lɛ kaseɔ Biblia lɛ nɔ agbɛnɛ koni eje shiɛmɔ nitsumɔ lɛ shishi lɛ, ye obua lɛ ni ena bɔ ni ehe hiaa akɛ “eeeje shishi amrɔ nɔŋŋ,” koni kɛtsɔ no nɔ lɛ oha shiɛlɔ hee lɛ aná shishijee kpakpa. Ye obua lɛ koni eto gbɛjianɔ ni esaa ehe daa kɛha shiɛmɔ nitsumɔ lɛ kɛ ehe ni ekɛaawo mli daa otsi.
7 Kɛ obi ji mɔ ni ebatsɔ shiɛlɔ hee ni abaptisiko lɛ lɛ, okɛ lɛ atsu nii koni eya ehiɛ yɛ bɔ ni afii ni eye kɛ enyɛmɔi yɔɔ lɛ anaa. Kɛtsɔ yelikɛbuamɔ fioo ko ni baajɛ odɛŋ lɛ nɔ lɛ, ekolɛ ebaaha onaa akpɛ ohe yɛ bɔ ni ebaanyɛ ekɛ mɔ ko agba sane jogbaŋŋ aha, ni ekane nii kɛjɛ Biblia lɛ mli, ní ekɛ woji aha lɛ he. Kɛ ená mɔ ko bo lɛ toi jogbaŋŋ yɛ shiɛmɔ nitsumɔ lɛ mli lɛ, ye obua lɛ ni efee sɛɛkuu kɛ saramɔ ni edi miishɛɛ ni ana lɛ sɛɛ.
8 Lɛɛmɔ Bo Diɛŋtsɛ Osɔɔmɔ lɛ Mli: Ani oshihilɛ ŋmɛɔ bo gbɛ ni otsu babaoo yɛ sanekpakpa shiɛmɔ nitsumɔ lɛ mli yɛ Kaimɔ be lɛ sɛɛ po? Ani obaanyɛ ni yɛ daa otsi mli lɛ okɛ ŋmɛlɛtswaa kome loo enyɔ afata nɔ ni ofɔɔ feemɔ yɛ shiɛmɔ nitsumɔ lɛ mli lɛ he? Ani ootsɔ̃ hiɛ ookwɛ kalanda lɛ nɔ koni ona be ni obaanyɛ okɛ ohe awo gbɛgbalɔi awamɔ nitsumɔ lɛ mli ekoŋŋ? Aloo ani obaanyɛ oto oshihilɛ he gbɛjianɔ ni okɛ ohe awo be-fɛɛ sɔɔmɔ lɛ mli? Mɔdɛŋ fɛɛ ni wɔbɔɔ yɛ sɔɔmɔ lɛ mli lɛ baaye abua mɔ ko koni ekpɛlɛ anɔkwale lɛ nɔ! (Bɔf. 8:26-39) Be mli ni wɔkpaa be ni ka wɔhiɛ lɛ gbɛ lɛ, nyɛhaa ‘wɔnyiɛa ekpakpafeemɔ sɛɛ daa wɔha wɔhe kɛ mɛi fɛɛ.’—1 Tes. 5:15.
[Caption on page 3]
Yaa Nɔ ni Oye Obua:
□✔ Mɛi ni ba Kaimɔ lɛ shishi
□✔ Shiɛlɔi ni asaa akanya amɛ ekoŋŋ
□✔ Shiɛlɔi heei ni abaptisiko amɛ