‘Nyɛtsɔmɔa Niiatsɛmɛi yɛ Ejurɔfeemɔ Gbɛfaŋ’

¹ Bɔfo Paulo kɛ Timoteo kɛ Tito ná tsakpaa ni yɔɔ gbagbalii yɛ esɔɔmɔ nitsumɔ ni ekãa yɔɔ mli lɛ naagbee afii lɛ amli. Eŋma ekãawoo wiemɔi ni tamɔ nɔ kome too lɛ nɔŋŋ kɛha amɛteŋ mɔ fɛɛ mɔ. Ekɛɛ Tito akɛ esa akɛ “mɛi ni ehe Nyɔŋmɔ nɔ eye lɛ ajwɛŋ nɔ, ni amɛbɔ nitsumɔi kpakpai ahe mɔdɛŋ.” (Tito 3:8) Ekɛɛ Timoteo akɛ mɛi ni kɛ amɛhiɛ fɔ̃ɔ Nyɔŋmɔ nɔ lɛ ‘atsɔmɔ niiatsɛmɛi yɛ ejurɔfeemɔ gbɛfaŋ.’ (1 Tim. 6:17, 18) Enɛ ji ŋaawoo ni sa jogbaŋŋ kɛha wɔ fɛɛ! Shi mɛni baakanya wɔ koni wɔfee ejurɔ yɛ wɔwala shihilɛ mli? Ni mɛɛ nitsumɔi pɔtɛɛ komɛi esa akɛ wɔtsu yɛ naagbee gbii ni kã wɔhiɛ lɛ amli?

² Kanyamɔ nɔ̃ kɛha niiatsɛmɛi ni wɔɔtsɔmɔ yɛ ejurɔfeemɔ gbɛfaŋ lɛ baa kɛjɛɔ nɔ ni wɔheɔ wɔyeɔ kɛ suɔmɔ ni wɔyɔɔ kɛha Yehowa lɛ kɛ kɛjɛ hiɛnɔkamɔ ni ekɛha wɔ lɛ mli. (1 Tim. 6:19; Tito 2:11) Akaiɔ wɔ titri yɛ nɛkɛ beaŋ yɛ afi lɛ mli akɛ, Yehowa tsu e-Bi lɛ kɛba shikpɔŋ lɛ nɔ bɔni afee ni Yesu anyɛ atse e-Tsɛ he koni egbele naanɔ wala gbɛ kɛha adesai fɛɛ ni sa lɛ. (Mat. 20:28; Yoh. 3:16) Abaaha enɛ mli afee faŋŋ yɛ Kristo gbele lɛ Kaimɔ lɛ shishi yɛ March 28 lɛ. Yɛ hiɛnɔkamɔ ni wɔyɔɔ yɛ naanɔ ni wɔnine baashɛ nɔ lɛ nɔheremɔ mli lɛ, ani ekanyaaa wɔ ni wɔfee bɔ fɛɛ bɔ ni wɔɔnyɛ koni ‘wɔtsɔmɔ niiatsɛmɛi yɛ ejurɔfeemɔ gbɛfaŋ’? Lɛɛlɛŋ, ekanyaa wɔ! Mɛɛ nitsumɔi wɔbaanyɛ wɔtsu amrɔ nɛɛ?

³ Nitsumɔi Kpakpai ni Abaatsu yɛ March kɛ Esɛɛ Mli: Eka shi faŋŋ akɛ wɔbaaya Kaimɔ lɛ—ni ji afi lɛ mli nifeemɔ ko ni he hiaa fe fɛɛ kɛha Yehowa Odasefoi yɛ je lɛŋ fɛɛ lɛ. (Luka 22:19) Shi wɔmiisumɔ ni kɛji ebaahi lɛ wɔkɛ mɛi babaoo diɛŋtsɛ aná nakai nifeemɔ lɛ mli miishɛɛ lɛ. Kwɛmɔ sɔɔmɔ akɔntaabuu ni yɔɔ 2002 Yearbook lɛ mli, ni obaana akɛ nyɛsɛɛ afi lɛ yɛ shikpɔji babaoo anɔ yɛ jeŋ koji ejwɛ lɛ fɛɛ lɛ, mɛi ni ba Kaimɔ lɛ ayibɔ fa fe shiɛlɔi lɛ ayibɔ toi etɛ, ejwɛ, enumɔ loo nɔ ni fe nakai. Eka shi faŋŋ akɛ ebi mɔdɛŋbɔɔ babaoo yɛ asafoŋbii lɛ agbɛfaŋ koni amɛnyɛ amɛja ninefɔɔ woji kɛha Kaimɔ lɛ babaoo yɛ amɛ shikpɔŋkuku lɛ mli. No hewɔ lɛ, wɔmiisumɔ koni wɔkɛ be babaoo bɔ ni wɔbaanyɛ atsu nii kɛjɛ amrɔ nɛɛ kɛyashi March 28 lɛ ni wɔkɛfɔ̃ mɛi anine kɛba Kaimɔ lɛ shishi, koni wɔye wɔbua amɛ ni amɛkase yiwalaheremɔ he hiɛnɔkamɔ lɛ he sane.

⁴ Beni April baashɛ lɛ, ekolɛ wɔbaaná jetsɛremɔ ni sɛɛ kɛɔ kɛ kɔɔyɔŋ tsakemɔ kpakpa. Te wɔɔfee tɛŋŋ wɔkɛ hegbɛi ni sa nɛɛ atsu nii jogbaŋŋ koni ‘wɔtsɔmɔ niiatsɛmɛi yɛ ejurɔfeemɔ gbɛfaŋ’? Kɛtsɔ gbɛfaŋnɔ ni wɔɔya nɔ wɔná yɛ sanekpakpa shiɛmɔ nitsumɔ lɛ mli kɛ ekãa, kɛ ‘wɔhiɛ ni aaadɔ yɛ nitsumɔi kpakpai ahe.’ (Tito 2:14; Mat. 24:14) Kɛji onyɛɛɛ okɛ ohe awo gbɛgbalɔi awalɔ nitsumɔ lɛ mli yɛ March mli lɛ, ani obaanyɛ ofee nakai yɛ April kɛ May aloo May mli? Kɛji okɛ ohe ewo gbɛgbamɔ nitsumɔ lɛ mli yɛ March mli lɛ, ani obaanyɛ otsa nɔ?

⁵ Mɛi komɛi ni tsuɔ heloonaa nitsumɔ lɛ ena akɛ amɛbaanyɛ amɛkɛ amɛhe awo sɔɔmɔ lɛ mli ŋmɛlɛtswaa kome loo nɔ̃ beni amɛnyiɛ gbɛ nɔ kɛmiiya nitsumɔ, ni amɛmiiye gbɛjegbɛ nɔ odase aloo amɛmiishiɛ amɛmiitsɔɔ mɛi ni tsuɔ nii yɛ nitsumɔhei ni ajeɔ nitsumɔ shishi leebi maŋkpa lɛ. Mɛi krokomɛi kɛ be ni amɛkɛyeɔ nii shwane lɛ mli fã yeɔ odase. Mɛi komɛi enyɛ amɛkɛ nanemɛi nitsulɔi efee Biblia mli nikasemɔ yɛ nakai be lɛ mli. Nyɛmimɛi yei pii ni kwɛɔ shia lɛ enyɛ amɛto be he gbɛjianɔ kɛha sɔɔmɔ nitsumɔ lɛ be mli ni amɛbii lɛ etee skul. Kɛtsɔ shi ni amɛteɔ mra yɛ gbii lɛ ekomɛi amli koni amɛkɛtsu amɛshia mli nitsumɔi lɛ anɔ lɛ, amɛnáa be babaoo yɛ gbi lɛ mli kɛha shiɛmɔ kɛ nitsɔɔmɔ nitsumɔ lɛ.—Efe. 5:15, 16.

⁶ Kɛji onyɛɛɛ okɛ ohe awo gbɛgbalɔi awalɔ nitsumɔ lɛ mli po lɛ, ekolɛ obaanyɛ oto bo diɛŋtsɛ ogbɛjianɔ koni oná gbɛfaŋnɔ babaoo yɛ sɔɔmɔ nitsumɔ lɛ mli, ni ofee bɔ fɛɛ bɔ ni obaanyɛ ‘ni ofee ejurɔ, ni otsɔ niiatsɛ yɛ ejurɔfeemɔ gbɛfaŋ, osumɔ nihamɔ, onine akpɔ’ kɛtsɔ anɔkwale lɛ he sane ni ooogba mɛi krokomɛi lɛ nɔ.—1 Tim. 6:18.

⁷ Kaimɔ Nitsumɔ Kpakpa ni Ji Kaselɔ Feemɔ Lɛ: Daa afi lɛ anáa mɛi ni yɔɔ wiemɔ lɛ he miishɛɛ ni baa Kaimɔ lɛ shishi. Ani mɛi ni yɔɔ asafo lɛ mli lɛ ateŋ mɛi komɛi baanyɛ agbala amɛ jwɛŋmɔ kɛba mɛi ni baa, shi akɛ amɛ ekaseee nii amrɔ nɛɛ lɛ anɔ? Ani abaanyɛ aku sɛɛ ayasara amɛ kɛ gbɛkpamɔ akɛ aaaye abua amɛ koni amɛya amɛhiɛ yɛ mumɔŋ? Ebaanyɛ efee akɛ mɛi ni ba Kaimɔ lɛ shishi lɛ ateŋ mɛi komɛi awekumɛi ji Odasefoi. Ekolɛ mɛi krokomɛi hu ji aŋkroaŋkroi ni kase nii yɛ be ni eho lɛ mli, ni hewalɛwoo pɛ kɛkɛ he hiaa amɛ koni amɛje nikasemɔ shishi ekoŋŋ ni amɛya kpeei daa hu. Kwɛ miishɛɛ ni ebaaha wɔná akɛ wɔɔna ni amɛbafata wɔhe akɛ Yehowa tsuji ni yɔɔ ekãa!

⁸ Yɛ gbɛfaŋnɔ ni yaa hiɛ ni abaaná yɛ sɔɔmɔ nitsumɔ lɛ mli yɛ March kɛ no sɛɛ lɛ, eeenyɛ ebalɛ akɛ wɔbaaná mɛi babaoo ni yɔɔ wiemɔ lɛ he miishɛɛ ni wɔbaanyɛ wɔku sɛɛ wɔyasara amɛ. Bɔɔ mɔdɛŋ ni oshi sanebimɔ ko oha amɛ. Koni agbɛnɛ owo shi akɛ obaaha sanebimɔ lɛ hetoo be kroko kɛji oba. Hegbɛ baagbele kɛha sɛɛkuu kɛ saramɔ kɛji wɔfee enɛ. Ebaafee nɔ ni sa kɛji wɔtsu sɛɛkuu kɛ saramɔ lɛ he nii oya nɔŋŋ. Kɛji wɔnyɛɛɛ wɔje nikasemɔ shishi yɛ klɛŋklɛŋ saramɔ lɛ nɔ lɛ, wɔbaasumɔ ni kɛji ebaahi lɛ wɔje eko shishi yɛ saramɔ ni nyiɛ sɛɛ lɛ nɔ.

⁹ Kɛji wɔkɛ wɔhe wo gbɛjegbɛ nɔ odaseyeli lɛ mli lɛ, esa akɛ efee wɔhiamɔ nii akɛ wɔɔbɔ mɔdɛŋ koni wɔkɛ mɛi aje sanegbaa shishi. Gbɔmɛi ni yɔɔ wiemɔ lɛ he miishɛɛ ni shiɛlɔi kɛ amɛ ekpe be mli ni amɛtsuɔ gbɛjegbɛ nɔ nitsumɔ lɛ kɛ amɛgbɛi, adrɛs, kɛ tɛlifoŋ nɔmbai eha shiɛlɔi babaoo. Kɛji mɔ aŋkro ni okɛ lɛ kpe lɛ bɛ oshikpɔŋkuku lɛ mli lɛ, yaabi “Please Follow Up” (S-43) wolo lɛ eko yɛ Maŋtsɛyeli Asa lɛ nɔ, ŋmalamɔ nɔ nii, koni okɛha asafoŋ woloŋmalɔ lɛ, ni ekɛbaamaje asafo ni tsuɔ nii yɛ shikpɔŋkuku ni mɔ lɛ yɔɔ mli lɛ mli lɛ. Kɛji woloŋmalɔ lɛ nyɛɛɛ atsu he nii lɛ, ekɛbaamaje nitsumɔhe nine lɛ kɛha ehe nitsumɔ. Yɛ nɛkɛ gbɛ nɔ lɛ, abaanyɛ atsu miishɛɛ lɛ he nii.

¹⁰ Kɛji nine shɛ tɛlifoŋ nɔmba nɔ shi jeee adrɛs lɛ, no lɛ feemɔ sɛɛkuu kɛ saramɔ kɛtsɔ mɔ lɛ ni obaatswa lɛ lɛ nɔ. Tsɔ hiɛ ni osaa nɔ ni obaasumɔ ni owie he lɛ he. Ha Reasoning wolo lɛ ahi odɛŋ kɛha niiamlitaomɔ oya. Mɛi komɛi miiye omanye jogbaŋŋ yɛ nikasemɔ ni akɛ mɛi feɔ yɛ tɛlifoŋ nɔ lɛ mli, ni mɛi ni fata he ji mɛi ni ewa kɛha amɛ akɛ amɛnine baashɛ amɛnɔ yɛ shia lɛ. Nyɛmi yoo ko bɔi tɛlifoŋ nɔmbai ahemɔ kɛjɛ yei ni yɔɔ wiemɔ lɛ he miishɛɛ ni ekɛkpe yɛ eshia kɛ shia sɔɔmɔ nitsumɔ lɛ mli lɛ adɛŋ, ni nɔ ni jɛ mli kɛba ji akɛ enyɛ eje Biblia mli nikasemɔi enyɔ shishi.

¹¹ Okɛ Onukpai lɛ Afee Ekome Koni Aye Abua Mɛi ni Ekpa Shiɛmɔyaa Lɛ: Onukpai lɛ yɛ he miishɛɛ waa akɛ amɛbaajɛ suɔmɔ mli amɛsusu mɛi ni ekpa shiɛmɔyaa lɛ ahe. Nɛkɛ mɛi nɛɛ ateŋ mɛi babaoo ejɛ amɛ diɛŋtsɛ amɛsuɔmɔ mli amɛbɔi asafoŋ kpeei baa. Amɛna bɔ ni ehe ehia ni amɛtao amɛkɛ Yehowa gbɛjianɔtoo lɛ teŋ wekukpaa ni yɔɔ gbagbalii bɔni afee ni amɛná mumɔŋ shweshweeshwe shihilɛ ni atsɔɔ mli yɛ Lala 91 lɛ. Amrɔ nɛɛ amɛteŋ mɛi komɛi efee klalo akɛ amɛbaaná gbɛfaŋnɔ yɛ shiɛmɔ nitsumɔ lɛ mli ekoŋŋ. Kɛji mɛi ni ekpa shiɛmɔyaa lɛ ba Kaimɔ lɛ shishi yɛ nyɔŋ nɛɛ nɔ lɛ, ekolɛ amɛbaakpɛlɛ ni akɛ amɛ afee Biblia mli nikasemɔ. Kɛji ebalɛ nakai lɛ, onukpai lɛ baato gbɛjianɔ koni mɔ ko kɛ mɛi ni biɔ yelikɛbuamɔ nɛɛ akase nii. Kɛji afɔ̃ bo nine koni oye obua yɛ nɛkɛ gbɛ nɔ lɛ, hiɛ baasɔ ekomefeemɔ kpo ni obaajie lɛ waa.—Rom. 15:1, 2.

¹² Yaa Nɔ ‘Obɔ Nitsumɔi Kpakpai Ahe Mɔdɛŋ’: Mɛi babaoo ni ná gbɛfaŋnɔ yɛ gbɛgbalɔi awalɔ sɔɔmɔ lɛ mli nyɔŋ kome loo nɔ ni fe nakai lɛ ena akɛ amɛshiɛmɔ nitsumɔ lɛ tee hiɛ yɛ nyɔji ni nyiɛ sɛɛ lɛ amli. Amɛkɛ mɛi ni yɔɔ wiemɔ lɛ he miishɛɛ ni amɛnu he akɛ ehe miihia ni amɛyasara amɛ ekoŋŋ lɛ kpe. Enɛ kanya amɛ koni amɛkɛ nyɛmɔ babaoo awo sɔɔmɔ nitsumɔ lɛ mli ni amɛkɛ amɛhe awo mli shii abɔ bɔni afee ni amɛya mɛi ni yɔɔ wiemɔ lɛ he miishɛɛ lɛ aŋɔɔ ekoŋŋ. Amɛteŋ mɛi komɛi je nikasemɔ shishi, ni no ye ebua amɛ koni amɛná gbɛfaŋnɔ ni fa babaoo yɛ sɔɔmɔ nitsumɔ lɛ mli.

¹³ Mɛi krokomɛi ná miishɛɛ waa yɛ babaoo ni amɛfeɔ yɛ shiɛmɔ kɛ kaselɔ feemɔ nitsumɔ lɛ mli aahu akɛ ekanya amɛ koni amɛpɛi nibii ni he hiaa titri lɛ amli. Nɔ ni jɛ mli kɛba ji akɛ, mɛi komɛi nyɛ amɛtse amɛ heloonaa nitsumɔ nɔ ni amɛbatsɔmɔ daa gbɛgbalɔi awalɔi. Mɛi krokomɛi enyɛ amɛkɛ amɛhe ewo daa gbɛgbamɔ sɔɔmɔ lɛ mli. Amɛnyɛ amɛkɛ amɛhiɛnɔkamɔ fɛɛ fɔ̃ Nyɔŋmɔ nɔ shi jeee nibii ni je lɛ yɔɔ ni ekɛbaaha lɛ anɔ. Amɛna akɛ ní ‘aaasumɔ nihamɔ, ni nine akpɔ’ lɛ kɛ jɔɔmɔi babaoo ni jɛ Yehowa ŋɔɔ ba, ni ewaje amɛ hiɛnɔkamɔ akɛ amɛaaná “anɔkwa wala” lɛ mli gbɛfaŋnɔ. (1 Tim. 6:18, 19) Eji anɔkwale akɛ, yɛ be mli ni mɛi babaoo kɛ amɛhe woɔ gbɛgbamɔ sɔɔmɔ lɛ mli lɛ, asafo muu lɛ fɛɛ náa he sɛɛ. Gbɛgbalɔi sumɔɔ ni amɛwie amɛniiashikpamɔi ahe ni amɛfɔ̃ɔ nine kɛtsɛɔ mɛi krokomɛi koni amɛkɛ amɛ aná gbɛfaŋnɔ yɛ sɔɔmɔ nitsumɔ lɛ mli, enɛ haa anuɔ mumɔŋ shihilɛ diɛŋtsɛ ko ni yɔɔ shiŋŋ he yɛ asafo lɛ mli.

¹⁴ Eba akɛ wɔ fɛɛ ‘wɔbaatsɔmɔ niiatsɛmɛi yɛ ejurɔfeemɔ gbɛfaŋ’ yɛ nɛkɛ Kaimɔ be nɛɛ mli kɛ no sɛɛ fɛɛ kɛtsɔ gbɛfaŋnɔ ni yaa hiɛ ni wɔnáa yɛ Kristofoi asɔɔmɔ nitsumɔ lɛ mli lɛ nɔ. Nyɛhaa wɔjiea hiɛsɔɔ kpo yɛ hiɛnɔkamɔ ni Yehowa kɛha wɔ akɛ wɔbaahi shi kɛya naanɔ yɛ jalɛ shikpɔŋ hee ko nɔ lɛ.—2 Pet. 3:13.