‘Nyɛtiua Ekpakpafeemɔ Sɛɛ Daa Nɛɛ’
1 Nɔ ni fata Kristofoi ashihilɛ gbɛ lɛ he ji ‘ni aaatiu ekpakpafeemɔ sɛɛ aha mɛi fɛɛ daa.’ (1 Tes. 5:15) Kɛ wɔmiiya wɔ kpokpaa wulu nɔ kpeei lɛ, wɔnáa hegbɛi babaoo ni wɔkɛaafee nɔ̃ kpakpa ko wɔha mɛi krokomɛi. Yɛ bei ni tamɔ nɛkɛ mli lɛ, maŋbii lɛ kwɛɔ wɔ, ni mɛi fɛɛ ni wɔkɛkpeɔ lɛ náa susumɔi komɛi yɛ wɔhe yɛ bɔ ni wɔkɛ amɛ yeɔ haa lɛ he. Bɔni afee ni wɔbu gbɛi kpakpa ni wɔyɔɔ ákɛ Yehowa Odasefoi lɛ he lɛ, ehe miihia ni wɔkɛ wɔnifeemɔi atsɔɔ akɛ ‘wɔkɛ woo haa mɛi fɛɛ.’ (1 Pet. 2:17) Nɔ ni fata he ji ‘ní wɔfóŋ wɔnɔ mli, shi ni wɔɔfó wɔnanemɛi anɔ mli.’ (Fil. 2:4) Susumɔ bɔ ni enɛ kɔɔ tsũ ni ataoɔ kɛha kpee lɛ he gbɛjianɔtoo lɛ he lɛ he okwɛ.
2 Ani okɛ otsũ taomɔ he gbɛbimɔ he wolo lɛ eha? (1) Kaatao tsũ ni yɛ sɛɛ mli lɛ owɔɔɔ mli yɛ eko ni hi fe no ni oná lɛ hewɔ. (2) Kaakpa gbɛ akɛ kpee shishi gbɛjianɔtoo lɛ baanyɛ aha bo wɔɔhe kɛ́ okɛ tsũ taomɔ he gbɛbimɔ wolo haaa. (3) Kɛ otee gbɔiatoohe kɛha wɔɔhe taomɔ lɛ, jiemɔ tsuishitoo kɛ bulɛ kpo otsɔɔ gbɔiatoohe nitsulɔi lɛ yɛ be mli ni amɛbɔɔ mɔdɛŋ ni amɛha oná wɔɔhe lɛ. (4) Kɛ leebi niyenii ni akɛhaa ni aheee shika fata he lɛ, okɛ nɛkɛ gbɛjianɔtoo ni yɔɔ kɛha mɛi pɛ ni bawɔɔ gbɔiatoohe lɛ akatsu nii yɛ gbɛ fɔŋ nɔ. (5) Okɛ mlai fɛɛ ni awo yɛ owɔɔhe lɛ ni kɔɔ bɔ ni esa ákɛ akɛ jɛmɛ nibii atsu nii aha lɛ he lɛ atsu nii. (6) Taakɛ afɔɔ feemɔ lɛ, shĩ nikeenii ko oha gbɔiatoohe tsũi lɛ amlisaalɔ lɛ.
3 Ekpakpafeemɔ ni Aaatsɔɔ Gbekɛbii Lɛ: Be ko ni eho lɛ, ayɔse yɛ kpeei lɛ ekomɛi ashishi akɛ, ashĩɔ gbekɛbii komɛi ni mɔ ni hiɛ efã bɛ ni kɛ nineshiwalɛ baakudɔ amɛ beni kpee lɛ yaa nɔ lɛ, ni enɛ baa lɛ nakai hu yɛ wɔɔhei lɛ. (Abɛi 29:15) Yɛ bei babaoo mli lɛ, anaa akɛ gbekɛbii ni tamɔ nɛkɛ lɛ kamɔɔ saai anɔ amɛwɔɔ yɛ kpee lɛ shishi loo amɛmiishwɛ yɛ saai lɛ anɔ, loo amɛmiifo shi kɛkɛ yɛ he ni afeɔ kpee lɛ yɛ lɛ loo yɛ agba lɛ sɛɛgbɛ. Mɛi krokomɛi ni mɛi ni hiɛ efã lɛ ateŋ mɛi komɛi fata he lɛ yaa nihɔɔlɔi aŋɔɔ amɛyaheɔ aiskrim kɛ daaŋjiemɔ nibii tamɔ nɔ ni kpee lɛ shishi ji shisharamɔhe ko kɛkɛ ni abayeɔ nii yɛ. Gbekɛbii komɛi feɔ hoo waa diɛŋtsɛ yɛ wɔɔhei lɛ hu, ni amɛgbáa mɛi krokomɛi ni ji Odasefoi kɛ mɛi ni amɛjeee Odasefoi lɛ anaa ni amɛhaaa amɛhe ajɔ amɛ.
4 Fɔlɔi, dani abaaya kpee lɛ, ebaafee nɔ ni yeɔ buaa kɛ́ nyɛŋɔ be ní nyɛkɛ nyɛbii lɛ tĩ Kristofoi ajeŋba diɛŋtsɛ ni akpaa gbɛ be fɛɛ be kɛjɛɔ amɛdɛŋ, ni akpaa gbɛ kɛjɛɔ amɛdɛŋ yɛ he fɛɛ he hu lɛ mli lɛ. (Efe. 6:4) Ákɛ nɔkwɛmɔnɔ lɛ, tsɔɔmɔ mli oha amɛ akɛ Kristofoi asuɔmɔ kpakpa lɛ “efeee nii ni esaaa, epeleee lɛ diɛŋtsɛ enɔ̃, emli wooo la.” (1 Kor. 13:5) Mɛi ni hiɛ efã lɛ baanyɛ ama wiemɔi nɛɛ anɔ mi kɛtsɔ nɔkwɛmɔnɔ kpakpa ni mɛi fɛɛ naa ni amɛbaafee amɛfɔ̃ shi lɛ nɔ. Gbekɛbii, nyɛbaanyɛ nyɛnyiɛ ekpakpafeemɔ sɛɛ kɛtsɔ nyɛfɔlɔi atoiboo, bulɛ ni nyɛaajie lɛ kpo nyɛtsɔɔ mɛi krokomɛi anibii, kɛ mɛi ni bɛŋkɛ nyɛ lɛ ahesusumɔ nɔ. (Kol. 3:20) Yɛ be mli ni wɔkɛ ekomefeemɔ bɔɔ mɔdɛŋ koni wɔfee mɛi fɛɛ ekpakpa lɛ, ‘wɔwulaa Nyɔŋmɔ ni ji wɔyiwalaherelɔ lɛ tsɔɔmɔ lɛ yɛ nibii fɛɛ mli.’—Tito 2:10.
5 Jeee mɛi fɛɛ ni naa wɔ lɛ pɛ ji mɛi ni wɔjeŋba kpakpa lɛ náa amɛnɔ hewalɛ kpakpa shi enáa mɛi ni wieɔ shiɔ wɔ yɛ yiŋtoo kome loo yiŋtoo kroko hewɔ lɛ hu anɔ hewalɛ kpakpa. Yɛ nɔ fɛɛ nɔ ni wɔfeɔ yɛ kpee lɛ shishi kɛ maŋtiase ni afeɔ kpee lɛ yɛ mli lɛ mli he fɛɛ he lɛ—kɛ́ wɔnyiɛ gbɛjegbɛ nɔ jio, wɔmiiye nii yɛ niyelihe jio, wɔmiijɔɔ wɔhe yɛ wɔ wɔɔhe lɛ, loo wɔmiiŋɔ hegbɛi ni wɔkɛye trukaa odase jio lɛ—esa akɛ Kristofoi awiemɔ kɛ nifeemɔi ni wɔkɛtsuɔ nii lɛ atsɔɔ akɛ wɔmiisumɔ ni wɔtiu ekpakpafeemɔ sɛɛ.
[Caption on page 4]
Ofainɛ Kaimɔ:
■ Ná tsuishitoo ni ojie bulɛ kpo otsɔɔ mɛi ni feɔ bo gbɔ lɛ.
■ Okɛ wɔɔhe he mlai atsu nii koni mɛi fɛɛ aná he sɛɛ.
■ Okɛ leebi niyenii he gbɛjianɔtoo ni aheee shika lɛ akatsu nii yɛ gbɛ fɔŋ nɔ.
■ Kwɛmɔ nɔ ni obii lɛ feɔ lɛ anɔ jogbaŋŋ.